ਕਹਿੰਦੇ ਹਨ ਪਿਆਰ ਅੰਨ੍ਹਾ ਹੁੰਦਾ ਤੇ ਪਿਆਰ ਕੋਈ ਜਾਤ-ਪਾਤ ਅਤੇ ਕਿਸੇ ਵੀ ਤਰ੍ਹਾਂ ਦੀ ਊਚ-ਨੀਚ ਨਹੀਂ ਦੇਖਦਾ। ਕੁਝ ਅਜਿਹਾ ਹੀ ਇੱਕ ਮਾਮਲਾ ਸਾਹਮਣੇ ਆਇਆ ਹੈ ਜਿਸ ਵਿਚ ਫਿਨਲੈਂਡ ਦੀ ਇਕ ਕੁੜੀ ਨੇ ਕਟਿਹਾਰ ਦੇ ਰਹਿਣ ਵਾਲੇ ਨੌਜਵਾਨ ਨਾਲ ਵਿਆਹ ਕਰਵਾਇਆ ਹੈ। ਪ੍ਰੇਮਿਕਾ ਆਪਣੇ ਪਰਿਵਾਰਕ ਮੈਂਬਰਾਂ ਨਾਲ ਕਟਿਹਾਰ ਪਹੁੰਚੀ, ਜਿੱਥੇ ਦੋਵਾਂ ਨੇ ਪੂਰਨ ਦੇਵੀ ਮੰਦਰ ‘ਚ ਸੱਤ ਫੇਰੇ ਲਏ। ਦੋਵਾਂ ਦੇ ਪਰਿਵਾਰਾਂ ਨੇ ਹਿੰਦੀ ਅਤੇ ਭੋਜਪੁਰੀ ਗੀਤਾਂ ‘ਤੇ ਖੂਬ ਡਾਂਸ ਕੀਤਾ। ਹੁਣ ਦੋਵਾਂ ਦੇ ਵਿਆਹ ਦੀ ਸੋਸ਼ਲ ਮੀਡੀਆ ‘ਤੇ ਕਾਫੀ ਚਰਚਾ ਹੋ ਰਹੀ ਹੈ।
ਫਿਨਲੈਂਡ ਦੀ ਰਹਿਣ ਵਾਲੀ 25 ਸਾਲਾ ਜੂਲੀਆ ਨੇ ਫੇਸਬੁੱਕ ‘ਤੇ ਕਟਿਹਾਰ ਦੇ ਲਾਲੀ ਸ਼ਿਵਾਜੀ ਨਗਰ ਨਿਵਾਸੀ ਪ੍ਰਣਬ ਆਨੰਦ ਨਾਲ ਦੋਸਤੀ ਕੀਤੀ। ਇਹ ਦੋਸਤੀ ਹੌਲੀ-ਹੌਲੀ ਡੂੰਘੇ ਪਿਆਰ ਵਿੱਚ ਬਦਲ ਗਈ। ਬਦਲਦੇ ਸਮੇਂ ਦੇ ਨਾਲ ਪਿਆਰ ਇੰਨਾ ਵਧਿਆ ਕਿ ਜੂਲੀਆ ਆਪਣੇ ਪਰਿਵਾਰ ਨਾਲ ਪ੍ਰੇਮੀ ਪ੍ਰਣਬ ਆਨੰਦ ਨੂੰ ਲੈਣ ਲਈ ਕਟਿਹਾਰ ਪਹੁੰਚ ਗਈ। ਦੋਹਾਂ ਦੇ ਪਰਿਵਾਰ ਨੇ ਉਨ੍ਹਾਂ ਦੇ ਪਿਆਰ ਨੂੰ ਸਮਝਿਆ ਅਤੇ ਪੂਰਨੀਆ ਦੇ ਪੂਰਨ ਦੇਵੀ ਮੰਦਰ ‘ਚ ਹਿੰਦੂ ਰੀਤੀ-ਰਿਵਾਜਾਂ ਅਨੁਸਾਰ ਉਨ੍ਹਾਂ ਦਾ ਵਿਆਹ ਖੁਸ਼ੀ ਨਾਲ ਕੀਤਾ। ਦੋਵਾਂ ਦੇ ਰਿਸ਼ਤੇਦਾਰ ਵੀ ਇਸ ਇਤਿਹਾਸਕ ਖੂਬਸੂਰਤ ਪਲ ਦੇ ਗਵਾਹ ਬਣੇ।
