ਚੰਦਰਯਾਨ-3 ਨੇ ਲਗਭਗ ਦੋ ਤਿਹਾਈ ਦੂਰੀ ਤੈਅ ਕਰ ਲਈ ਹੈ। ਯਾਨੀ ਚੰਦਰਮਾ ਦੀ ਲਗਭਗ 66% ਯਾਤਰਾ ਪੁਲਾੜ ਯਾਨ ਨੇ ਪੂਰੀ ਕਰ ਲਈ ਹੈ। ਹੁਣ ਇਹ 5 ਅਗਸਤ ਨੂੰ ਸ਼ਾਮ ਕਰੀਬ 7 ਵਜੇ ਚੰਦਰਮਾ ਦੇ ਪੰਧ ‘ਚ ਪ੍ਰਵੇਸ਼ ਕਰੇਗਾ। ਇਸਰੋ ਨੇ ਸ਼ੁੱਕਰਵਾਰ ਨੂੰ ਇਹ ਜਾਣਕਾਰੀ ਦਿੱਤੀ। ਅਤੇ 23 ਅਗਸਤ ਨੂੰ ਇਹ ਚੰਦਰਮਾ ‘ਤੇ ਉਤਰੇਗਾ।
ਦੱਸ ਦਈਏ ਕਿ ਵਿਗਿਆਨੀਆਂ ਨੇ 1 ਅਗਸਤ ਨੂੰ ਕਰੀਬ 12 ਵਜੇ ਚੰਦਰਯਾਨ-3 ਨੂੰ ਧਰਤੀ ਦੇ ਪੰਧ ਤੋਂ ਚੰਦਰਮਾ ਵੱਲ ਭੇਜਿਆ ਸੀ। ਇਸ ਨੂੰ ਟ੍ਰਾਂਸਲੂਨਰ ਇੰਜੈਕਸ਼ਨ ਕਿਹਾ ਜਾਂਦਾ ਹੈ। ਇਸ ਤੋਂ ਪਹਿਲਾਂ ਚੰਦਰਯਾਨ ਅਜਿਹੇ ਅੰਡਾਕਾਰ ਪੰਧ ਵਿਚ ਘੁੰਮ ਰਿਹਾ ਸੀ, ਜਿਸ ਦੀ ਧਰਤੀ ਤੋਂ ਘੱਟੋ-ਘੱਟ ਦੂਰੀ 236 ਕਿਲੋਮੀਟਰ ਅਤੇ ਵੱਧ ਤੋਂ ਵੱਧ ਦੂਰੀ 1,27,603 ਕਿਲੋਮੀਟਰ ਸੀ।
ਜ਼ਿਕਰਯੋਗ ਹੈ ਕਿ ਚੰਦਰਯਾਨ-3 ਵਿੱਚ ਲੈਂਡਰ, ਰੋਵਰ ਅਤੇ ਪ੍ਰੋਪਲਸ਼ਨ ਮੋਡੀਊਲ ਹਨ। ਲੈਂਡਰ ਅਤੇ ਰੋਵਰ ਚੰਦਰਮਾ ਦੇ ਦੱਖਣੀ ਧਰੁਵ ‘ਤੇ ਉਤਰਨਗੇ ਅਤੇ ਉਥੇ 14 ਦਿਨਾਂ ਤੱਕ ਪ੍ਰਯੋਗ ਕਰਨਗੇ। ਪ੍ਰੋਪਲਸ਼ਨ ਮਾਡਿਊਲ ਚੰਦਰਮਾ ਦੇ ਚੱਕਰ ਵਿੱਚ ਰਹਿ ਕੇ ਧਰਤੀ ਤੋਂ ਆਉਣ ਵਾਲੇ ਰੇਡੀਏਸ਼ਨ ਦਾ ਅਧਿਐਨ ਕਰੇਗਾ। ਇਸ ਮਿਸ਼ਨ ਰਾਹੀਂ ਇਸਰੋ ਇਹ ਪਤਾ ਲਗਾਏਗਾ ਕਿ ਚੰਦਰਮਾ ਦੀ ਸਤ੍ਹਾ ‘ਤੇ ਭੁਚਾਲ ਕਿਵੇਂ ਆਉਂਦੇ ਹਨ। ਇਹ ਚੰਦਰਮਾ ਦੀ ਮਿੱਟੀ ਦਾ ਅਧਿਐਨ ਵੀ ਕਰੇਗਾ।