ਪੱਛਮੀ ਬੰਗਾਲ ਦੇ ਅਧਿਆਪਕ ਭਰਤੀ ਘੁਟਾਲੇ ਵਿੱਚ ਮਮਤਾ ਦੇ ਮੰਤਰੀ ਪਾਰਥ ਦੀ ਕਰੀਬੀ ਅਰਪਿਤਾ ਮੁਖਰਜੀ ਦੇ ਦੂਜੇ ਫਲੈਟ ਤੋਂ ਵੀ ਭਾਰੀ ਮਾਤਰਾ ਵਿੱਚ ਨਕਦੀ ਬਰਾਮਦ ਕੀਤੀ ਗਈ ਹੈ। ਅਰਪਿਤਾ ਮੁਖਰਜੀ ਦੇ ਦੂਜੇ ਘਰ ਤੋਂ ਕਰੀਬ 27.9 ਕਰੋੜ ਰੁਪਏ ਦੀ ਨਕਦੀ ਮਿਲੀ ਹੈ। ਇਸ ਦੇ ਨਾਲ ਹੀ 5 ਕਿਲੋ ਸੋਨਾ ਵੀ ਜ਼ਬਤ ਕੀਤਾ ਗਿਆ ਹੈ। ਇਨਫੋਰਸਮੈਂਟ ਡਾਇਰੈਕਟੋਰੇਟ (ਈ.ਡੀ.) ਨੇ ਬੁੱਧਵਾਰ ਸ਼ਾਮ ਨੂੰ ਬੇਲਘਾਰੀਆ ਸਥਿਤ ਉਸਦੇ ਦੂਜੇ ਫਲੈਟ ‘ਤੇ ਛਾਪੇਮਾਰੀ ਕੀਤੀ, ਜੋ ਵੀਰਵਾਰ ਸਵੇਰ ਤੱਕ ਚੱਲੀ।
ਈਡੀ ਅਧਿਕਾਰੀਆਂ ਨੇ ਦੱਸਿਆ ਕਿ ”ਅਰਪਿਤਾ ਨੇ ਪਹਿਲਾਂ ਕਦੇ ਨਹੀਂ ਦੱਸਿਆ ਸੀ ਕਿ ਉਸ ਦੇ ਦੂਜੇ ਫਲੈਟ ‘ਤੇ ਵੀ ਨਕਦੀ ਰੱਖੀ ਗਈ ਸੀ। ਪਰ ਜਦੋਂ ਅਸੀਂ ਘਰ ‘ਤੇ ਛਾਪਾ ਮਾਰਿਆ ਤਾਂ ਸਾਨੂੰ 2000 ਅਤੇ 500 ਰੁਪਏ ਦੇ ਨੋਟਾਂ ਦੇ ਬੰਡਲ ਮਿਲੇ। ਇਸ ਤੋਂ ਇਲਾਵਾ ਸਾਨੂੰ 4.31 ਕਰੋੜ ਰੁਪਏ ਦਾ ਸੋਨਾ ਵੀ ਮਿਲਿਆ ਹੈ। ਇਸ ਵਿੱਚ 1 ਕਿਲੋ ਦੀਆਂ 3 ਸੋਨੇ ਦੀਆਂ ਇੱਟਾਂ, 6 ਬਰੇਸਲੇਟ (ਸਾਰੇ 500-500 ਗ੍ਰਾਮ) ਅਤੇ ਇੱਕ ਸੋਨੇ ਦਾ ਪੈੱਨ ਮਿਲਿਆ ਹੈ। ਅਰਪਿਤਾ ਦੇ ਦੋਵਾਂ ਘਰਾਂ ‘ਚੋਂ ਹੁਣ ਤੱਕ ਕਰੀਬ 50 ਕਰੋੜ ਦੀ ਨਕਦੀ ਅਤੇ ਵੱਡੀ ਮਾਤਰਾ ‘ਚ ਸੋਨਾ ਬਰਾਮਦ ਹੋ ਚੁੱਕਿਆ ਹੈ।
