ਪੰਜਾਬ ਕਾਂਗਰਸ ਦੇ ਸਾਬਕਾ ਪ੍ਰਧਾਨ ਨਵਜੋਤ ਸਿੱਧੂ ਅੱਜ ਰਾਜਪਾਲ ਬੀਐੱਲ ਪੁਰੋਹਿਤ ਨਾਲ ਮੁਲਾਕਾਤ ਕਰਨਗੇ। ਵੱਡੀ ਗੱਲ ਇਹ ਹੈ ਕਿ ਪਾਰਟੀ ਦੇ ਮੌਜੂਦਾ ਪ੍ਰਧਾਨ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਉਨ੍ਹਾਂ ਦੇ ਨਾਲ ਨਹੀਂ ਹੋਣਗੇ। ਸਿੱਧੂ ਆਪਣੇ ਨੇੜਲੇ ਆਗੂਆਂ ਅਸ਼ਵਨੀ ਸ਼ੇਖੜੀ ਅਤੇ ਨਵਤੇਜ ਚੀਮਾ ਨੂੰ ਨਾਲ ਲੈ ਕੇ ਜਾਣਗੇ। ਰਾਜਪਾਲ ਨੇ 3 ਮੈਂਬਰੀ ਵਫ਼ਦ ਸਮੇਤ ਸਿੱਧੂ ਨੂੰ ਮਿਲਣ ਲਈ 11 ਵਜੇ ਦਾ ਸਮਾਂ ਦਿੱਤਾ ਹੈ। ਹਾਲਾਂਕਿ ਸਿੱਧੂ ਦੀ ਇਸ ‘ਏਕਲਾ ਚੱਲੋ ਰੇ’ ਨੀਤੀ ਨਾਲ ਕਾਂਗਰਸ ਅੰਦਰ ਨਾਰਾਜ਼ਗੀ ਵਧਣ ਲੱਗੀ ਹੈ।
ਸਿੱਧੂ ਰਾਜਪਾਲ ਨਾਲ ਬੈਠਕ ‘ਚ ਕਾਨੂੰਨ ਵਿਵਸਥਾ ਦਾ ਮੁੱਦਾ ਚੁੱਕਣਗੇ। ਸਿੱਧੂ ਦਾ ਕਹਿਣਾ ਹੈ ਕਿ ਨਵੀਂ ਸਰਕਾਰ ਆਉਣ ਤੋਂ ਬਾਅਦ ਪੰਜਾਬ ਵਿੱਚ ਕਈ ਕਤਲ ਹੋਏ ਹਨ। ਸਰਕਾਰ ਅਮਨ-ਕਾਨੂੰਨ ਦੀ ਸਥਿਤੀ ਨੂੰ ਕਾਬੂ ਕਰਨ ਵਿੱਚ ਕਾਮਯਾਬ ਨਹੀਂ ਹੋ ਰਹੀ ਹੈ। ਇਸ ਤੋਂ ਇਲਾਵਾ ਸੂਬੇ ਵਿੱਚ ਪੈਦਾ ਹੋ ਰਹੇ ਬਿਜਲੀ ਸੰਕਟ ਨੂੰ ਵੀ ਉਠਾਇਆ ਜਾਵੇਗਾ। ਕਈ ਹੋਰ ਮੁੱਦੇ ਵੀ ਸਿੱਧੂ ਦੀ ਸੂਚੀ ਵਿੱਚ ਹਨ।
ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਰਾਜਾ ਵੜਿੰਗ ਨੇ ਨਵਜੋਤ ਸਿੱਧੂ ਨੂੰ ਚਿਤਾਵਨੀ ਦਿੱਤੀ ਸੀ ਕਿ ਜੇਕਰ ਉਹ ਕਾਂਗਰਸ ਨੂੰ ਮਜ਼ਬੂਤ ਕਰਨ ਲਈ ਮੀਟਿੰਗ ਕਰ ਰਹੇ ਹਨ ਤਾਂ ਇਹ ਠੀਕ ਹੈ ਪਰ ਇਹ ਆਪਣੇ ਲਈ ਨਾ ਕਰੋ। ਕਾਂਗਰਸ ਵਿੱਚ ਇਸ ਨੂੰ ਬਰਦਾਸ਼ਤ ਨਹੀਂ ਕੀਤਾ ਜਾਵੇਗਾ। ਵੜਿੰਗ ਭਲਕੇ ਰਸਮੀ ਤੌਰ ‘ਤੇ ਪੰਜਾਬ ‘ਚ ਕਾਂਗਰਸ ਪ੍ਰਧਾਨ ਦਾ ਅਹੁਦਾ ਸੰਭਾਲਣਗੇ।
