• ਨਿਗਮ ਦੇਵੇਗਾ ਬਦਲਵਾਂ ਰਸਤਾ

ਲੁਧਿਆਣਾ, 8 ਸਤੰਬਰ 2023 – ਲੁਧਿਆਣਾ ਦੇ ਮਾਡਲ ਟਾਊਨ ਐਕਸਟੈਂਸ਼ਨ ਰੋਡ ‘ਤੇ ਗਿੱਲ ਅਨਾਜ ਮੰਡੀ ਨੇੜੇ ਰੇਲਵੇ ਲਾਈਨ ‘ਤੇ ਓਵਰ ਬ੍ਰਿਜ ਦੀ ਉਸਾਰੀ ਦਾ ਕੰਮ ਸ਼ੁਰੂ ਹੋਣ ਜਾ ਰਿਹਾ ਹੈ। ਇਸ ਨਾਲ 5 ਤੋਂ 7 ਲੱਖ ਦੀ ਆਬਾਦੀ ਨੂੰ ਫਾਇਦਾ ਹੋਵੇਗਾ। ਰੇਲਵੇ ਵਿਭਾਗ ਨੇ ਰੇਲਵੇ ਲਾਈਨ ‘ਤੇ ਪੁਲ ਨੂੰ ਤਿਆਰ ਕਰਨ ਲਈ ਮਿੱਟੀ ਦੇ ਨਮੂਨੇ ਜਾਂਚ ਲਈ ਭੇਜ ਦਿੱਤੇ ਹਨ। ਇਸ ਦੇ ਨਾਲ ਹੀ ਪਾਇਲਿੰਗ ਟੈਸਟਿੰਗ ਦਾ ਕੰਮ ਵੀ ਪੂਰਾ ਕਰ ਲਿਆ ਗਿਆ ਹੈ।

ਪੁਲ ਦਾ ਕੰਮ ਉਦੋਂ ਹੀ ਸ਼ੁਰੂ ਹੋਵੇਗਾ ਜਦੋਂ ਨਿਗਮ ਆਵਾਜਾਈ ਲਈ ਕੋਈ ਬਦਲਵਾਂ ਰਸਤਾ ਮੁਹੱਈਆ ਕਰਵਾਏਗਾ। ਬਦਲਵਾਂ ਰਸਤਾ ਮੁਹੱਈਆ ਕਰਵਾਉਣ ਲਈ ਰਸਤੇ ਵਿੱਚ ਆਉਣ ਵਾਲੇ ਦਰੱਖਤਾਂ ਅਤੇ ਬਿਜਲੀ ਦੇ ਖੰਭਿਆਂ ਨੂੰ ਹਟਾਉਣਾ ਪਵੇਗਾ। ਰੇਲਵੇ ਅਧਿਕਾਰੀਆਂ ਦਾ ਦਾਅਵਾ ਹੈ ਕਿ ਜੇਕਰ ਕੰਮ ਬਿਨਾਂ ਕਿਸੇ ਰੁਕਾਵਟ ਦੇ ਚੱਲਦਾ ਰਿਹਾ ਤਾਂ ਉਹ ਸਿਰਫ਼ 5 ਮਹੀਨਿਆਂ ਵਿੱਚ ਆਪਣੇ ਹਿੱਸੇ ਦਾ ਕੰਮ ਪੂਰਾ ਕਰ ਲੈਣਗੇ। ਪੁਲ ਬਣਨ ਤੋਂ ਬਾਅਦ ਜਨਤਾ ਨਗਰ, ਨਿਊ ਜਨਤਾ ਨਗਰ, ਸ਼ਿਮਲਾਪੁਰੀ, ਗੁਰਪਾਲ ਨਗਰ, ਦੁਰਗਾ ਨਗਰ, ਰਣਜੀਤ ਨਗਰ, ਚੇਤ ਸਿੰਘ ਨਗਰ, ਮਾਡਲ ਟਾਊਨ ਦੇ ਲੋਕਾਂ ਨੂੰ ਲਾਭ ਮਿਲੇਗਾ।

ਪੁਲ ਦੇ ਦੋਵੇਂ ਪਾਸੇ ਰੈਂਪ ਬਣਾਉਣ ਦੀ ਜ਼ਿੰਮੇਵਾਰੀ ਨਗਰ ਨਿਗਮ ਦੀ ਹੋਵੇਗੀ। ਪੁਲ ਦੇ ਬਣਨ ਨਾਲ ਲੋਕ ਬਿਨਾਂ ਕਿਸੇ ਦੇਰੀ ਤੋਂ ਆਪਣੀ ਮੰਜ਼ਿਲ ‘ਤੇ ਪਹੁੰਚ ਸਕਣਗੇ। ਨਿਗਮ ਨੇ ਰੈਂਪ ਤਿਆਰ ਕਰਨ ਦੀ ਜ਼ਿੰਮੇਵਾਰੀ ਪੀ.ਡਬਲਯੂ.ਡੀ ਅਤੇ ਬੀ.ਐਂਡ.ਆਰ ਵਿਭਾਗ ਨੂੰ ਸੌਂਪ ਦਿੱਤੀ ਹੈ। ਲੋਕ ਨਿਰਮਾਣ ਵਿਭਾਗ ਦੋਵੇਂ ਪਾਸੇ ਰੈਂਪ ਦਾ ਡਿਜ਼ਾਈਨ ਤਿਆਰ ਕਰਕੇ ਨਿਗਮ ਨੂੰ ਭੇਜੇਗਾ। ਰੈਂਪ ਤਿਆਰ ਕਰਨ ਲਈ ਨਿਗਮ ਪੈਸੇ ਦੇਵੇਗਾ।

ਅਰੋੜਾ ਪੈਲੇਸ ਚੌਕ ਤੋਂ ਮਿਡਲ ਟਾਊਨ ਐਕਸਟੈਨਸ਼ਨ ਵੱਲ ਨੂੰ ਆਉਂਦੀ ਗਿੱਲ ਰੋਡ ’ਤੇ 60 ਫੁੱਟ ਚੌੜੀ ਸੜਕ ਹੈ। ਇੱਥੋਂ ਦੀ ਅਨਾਜ ਮੰਡੀ ਨੇੜੇ ਲੁਧਿਆਣਾ ਤੋਂ ਧੂਰੀ ਨੂੰ ਜਾਣ ਵਾਲੀ ਰੇਲਵੇ ਲਾਈਨ ਪਿਛਲੇ ਲੰਮੇ ਸਮੇਂ ਤੋਂ ਲੋਕਾਂ ਲਈ ਪ੍ਰੇਸ਼ਾਨੀ ਦਾ ਸਬੱਬ ਬਣੀ ਹੋਈ ਹੈ। ਇਸ ਲਾਈਨ ’ਤੇ ਰੇਲ ਗੱਡੀਆਂ ਦੀ ਭਾਰੀ ਆਵਾਜਾਈ ਕਾਰਨ ਫਾਟਕ ਬੰਦ ਰਹਿੰਦਾ ਹੈ। ਫਾਟਕ ਬੰਦ ਹੋਣ ਕਾਰਨ ਇੱਥੇ ਅਕਸਰ ਜਾਮ ਦੀ ਸਥਿਤੀ ਬਣੀ ਰਹਿੰਦੀ ਹੈ।

ਦਰੱਖਤ ਅਤੇ ਖੰਭੇ ਪੁਲ ਦੇ ਨਿਰਮਾਣ ਵਿੱਚ ਰੁਕਾਵਟ ਪੈਦਾ ਕਰ ਰਹੇ ਹਨ। ਇਸ ਲਈ ਪੁਲ ਦੀ ਉਸਾਰੀ ਤੋਂ ਪਹਿਲਾਂ ਪਾਇਲਿੰਗ ਦਾ ਕੰਮ ਸ਼ੁਰੂ ਕਰ ਦਿੱਤਾ ਜਾਵੇਗਾ। ਰੋਡ ਪੂਰੀ ਤਰ੍ਹਾਂ ਬੰਦ ਰਹੇਗਾ। ਰੇਲਵੇ ਵਿਭਾਗ ਨੇ ਨਿਗਮ ਨੂੰ ਬਦਲਵਾਂ ਰਸਤਾ ਬਣਾਉਣ ਲਈ ਕਿਹਾ ਹੈ। ਤਾਂ ਜੋ ਆਵਾਜਾਈ ਨੂੰ ਹੋਰ ਰਸਤਾ ਦਿੱਤਾ ਜਾ ਸਕੇ। ਬਦਲਵਾਂ ਰਸਤਾ ਬਣਦੇ ਹੀ ਰੇਲਵੇ ਤੁਰੰਤ ਆਪਣਾ ਕੰਮ ਸ਼ੁਰੂ ਕਰ ਦੇਵੇਗਾ।

ਦੱਸ ਦੇਈਏ ਕਿ ਕਰੀਬ 10 ਮਹੀਨੇ ਪਹਿਲਾਂ ਨਗਰ ਨਿਗਮ ਦੀ ਬੀਐਂਡਆਰ ਸ਼ਾਖਾ ਵੱਲੋਂ ਇੱਕ ਸੂਚੀ ਤਿਆਰ ਕਰਕੇ ਰਾਜ ਸਰਕਾਰ ਨੂੰ ਭੇਜੀ ਗਈ ਸੀ। ਇਸ ਵਿੱਚ ਦੱਸਿਆ ਗਿਆ ਕਿ ਸ਼ਹਿਰ ਵਿੱਚ ਗਿੱਲ ਰੋਡ, ਦਾਣਾ ਮੰਡੀ, ਸੂਆ ਰੋਡ ਤੋਂ ਦੁੱਗਰੀ ਰੋਡ, ਗਿਆਸਪੁਰਾ ਅਤੇ ਆਤਮਨਗਰ ਨੇੜੇ ਆਰ.ਓ.ਬੀ ਅਤੇ ਆਰ.ਓ.ਬੀ. ਦਾ ਨਿਰਮਾਣ ਕਰਵਾਉਣਾ ਜ਼ਰੂਰੀ ਹੈ।

ਨਿਗਮ ਫਿਲਹਾਲ ਇਨ੍ਹਾਂ ਸਾਰੇ ਪ੍ਰਾਜੈਕਟਾਂ ਦੀ ਵਿਉਂਤਬੰਦੀ ਵਿੱਚ ਜੁਟਿਆ ਹੋਇਆ ਹੈ। ਉੱਥੇ ਹੀ ਰੇਲਵੇ ਨੇ ਟੈਂਡਰਡ ਵਰਕ ਆਰਡਰ ਜਾਰੀ ਕਰ ਦਿੱਤਾ ਹੈ, ਜੋ ਤਾਲਮੇਲ ਦੀ ਕਮੀ ਨੂੰ ਦਰਸਾਉਂਦਾ ਹੈ। ਦੱਸ ਦੇਈਏ ਕਿ 5 ਤੋਂ 7 ਸਾਲ ਪਹਿਲਾਂ ਦਾਣਾ ਮੰਡੀ ਵਿੱਚ ਆਰ.ਓ.ਬੀ. ਬਣਾਉਣ ਦਾ ਪ੍ਰਸਤਾਵ ਤਿਆਰ ਕੀਤਾ ਗਿਆ ਸੀ।

ਉਸ ਸਮੇਂ ਇਹ ਮੰਗ ਵੀ ਸਰਕਾਰ ਨੂੰ ਭੇਜੀ ਗਈ ਸੀ, ਉਦੋਂ ਤੋਂ ਹੀ ਇੱਥੇ ਪੁਲ ਬਣਾਉਣ ਦੀ ਲੋਕਾਂ ਦੀ ਮੰਗ ਅੱਗੇ ਆ ਰਹੀ ਹੈ। ਇਹੀ ਕਾਰਨ ਹੈ ਕਿ ਪੁਰਾਣੀ ਫਾਈਲ ‘ਤੇ ਕੰਮ ਚੱਲ ਰਿਹਾ ਸੀ ਅਤੇ ਅਚਾਨਕ ਵਰਕ ਆਰਡਰ ਜਾਰੀ ਕਰ ਦਿੱਤਾ ਗਿਆ।

ਸੰਪਰਕ ਕਰਨ ’ਤੇ ਨਿਗਮ ਅਧਿਕਾਰੀ ਨੇ ਦੱਸਿਆ ਕਿ ਓਬਰ ਪੁਲ ਦੇ ਦੋਵੇਂ ਪਾਸੇ ਰੈਂਪ ਤਿਆਰ ਕਰਨ ਦਾ ਕੰਮ ਲੋਕ ਨਿਰਮਾਣ ਵਿਭਾਗ ਅਤੇ ਬੀਐਂਡਆਰ ਵਿਭਾਗ ਨੂੰ ਸੌਂਪ ਦਿੱਤਾ ਗਿਆ ਹੈ। ਇਨ੍ਹਾਂ ਦੋਵਾਂ ਰੈਂਪਾਂ ਦਾ ਖਰਚਾ ਨਿਗਮ ਵੱਲੋਂ ਅਦਾ ਕੀਤਾ ਜਾਵੇਗਾ। ਜਿੱਥੋਂ ਤੱਕ ਬਦਲਵੇਂ ਰਸਤੇ ਦਾ ਸਬੰਧ ਹੈ, ਉਹ ਜ਼ਮੀਨ ਮੰਡੀ ਬੋਰਡ ਦੀ ਹੈ। ਉਨ੍ਹਾਂ ਤੋਂ ਪ੍ਰਵਾਨਗੀ ਵੀ ਲਈ ਜਾ ਰਹੀ ਹੈ।