ਲੁਧਿਆਣਾ ਰੇਲਵੇ ਸਟੇਸ਼ਨ ‘ਤੇ ਯਾਤਰੀਆਂ ਤੋਂ ਮੋਬਾਈਲ, ਪਰਸ ਜਾਂ ਬੈਗ ਚੋਰੀ ਦੇ ਮਾਮਲੇ ਲਗਾਤਾਰ ਸਾਹਮਣੇ ਆ ਰਹੇ ਹਨ। ਤਾਜ਼ਾ ਜਾਣਕਾਰੀ ਅਨੁਸਾਰ ਟਰੇਨ ਨੰਬਰ 16032 ਦੇ ਕੋਚ ਨੰਬਰ ਐੱਸ-6 ਵਿੱਚ ਸੀਟ ਨੰਬਰ 33 ‘ਤੇ ਸਫ਼ਰ ਕਰ ਰਹੀ ਔਰਤ ਉਮਾ ਰਣ ਸਿੰਘ ਦਾ ਬੈਗ ਚੋਰੀ ਹੋ ਗਿਆ। ਉਹ ਆਪਣੀ ਬੇਟੀ ਦੀ ਡਿਲੀਵਰੀ ਕਰਵਾਉਣ ਲਈ ਨਾਗਪੁਰ ਜਾ ਰਹੀ ਸੀ।
ਔਰਤ ਦਾ ਕਹਿਣਾ ਹੈ ਕਿ ਉਸਨੇ ਆਪਣਾ ਹੈਂਡ ਬੈਗ ਸੀਟ ਦੇ ਹੇਠਾਂ ਰੱਖਿਆ ਹੋਇਆ ਸੀ। ਸਵੇਰੇ ਕਰੀਬ 6 ਵਜੇ ਜਦੋਂ ਉਸ ਨੇ ਜਦ ਬੈਗ ਵੇਖਿਆ ਤਾਂ ਉਹ ਆਪਣੀ ਥਾਂ ‘ਤੇ ਨਹੀਂ ਸੀ। ਉਮਾ ਰਣ ਸਿੰਘ ਦੇ ਜਵਾਈ ਪਵਿਤਰ ਨੇ ਦੱਸਿਆ ਕਿ ਬੈਗ ਵਿੱਚ ਕੁੱਲ 15 ਹਜ਼ਾਰ ਰੁਪਏ ਅਤੇ ਨਵੇਂ ਕੱਪੜੇ ਸਨ। ਉਨ੍ਹਾਂ ਨੇ ਇਸ ਸਬੰਧ ਵਿਚ ਰੇਲ ਮਦਦ ਪੋਰਟਲ ‘ਤੇ ਸ਼ਿਕਾਇਤ ਵੀ ਦਰਜ ਕਰਵਾਈ ਹੈ।
ਉਮਾ ਰਣ ਸਿੰਘ ਨੇ ਕਿਹਾ ਕਿ ਟਰੇਨ ‘ਚ ਸਫਰ ਕਰਨਾ ਅਸੁਰੱਖਿਅਤ ਹੋ ਗਿਆ ਹੈ। ਯਾਤਰੀ ਰਾਤ ਨੂੰ ਟਰੇਨ ਵਿੱਚ ਆਰਾਮ ਵੀ ਨਹੀਂ ਕਰ ਸਕਦੇ। ਦੱਸ ਦੇਈਏ ਕਿ ਜਦੋਂ ਇਹ ਘਟਨਾ ਵਾਪਰੀ ਤਾਂ ਔਰਤ ਟਰੇਨ ਵਿੱਚ ਆਰਾਮ ਕਰ ਰਹੀ ਸੀ।