ਕੋਰੋਨਾ ਵਾਇਰਸ ਦੇ ਵਧਦੇ ਮਾਮਲਿਆਂ ਦੌਰਾਨ ਅਮਰੀਕਾ ਅਤੇ ਆਇਰਲੈਂਡ ਵਿਚਾਲੇ ਸੀਮਤ ਓਵਰਾਂ ਦੀ ਕ੍ਰਿਕਟ ਸੀਰੀਜ਼ ਦੇ ਵਨ ਡੇ ਮੈਚ ਰੱਦ ਕਰ ਦਿੱਤੇ ਗਏ ਹਨ। ਆਇਰਲੈਂਡ ਟੀਮ ਦੇ ਸਹਿਯੋਗੀ ਸਟਾਫ ਦੇ 2 ਮੈਂਬਰ ਪਾਜ਼ੇਟਿਵ ਪਾਏ ਗਏ ਸਨ। ਇਸ ਤੋਂ ਇਲਾਵਾ ਖਿਡਾਰੀਆਂ ਦੇ ਸਾਥੀਆਂ ’ਚ ਵੀ ਵਾਇਰਸ ਦੇ ਮਾਮਲੇ ਮਿਲੇ ਸਨ, ਜਿਨ੍ਹਾਂ ’ਚੋਂ ਆਇਰਲੈਂਡ ਦੇ 2 ਕ੍ਰਿਕਟਰ ਸੰਪਰਕ ’ਚ ਸਨ।
ਸਾਰੇ ਖਿਡਾਰੀਆਂ ਦੀ ਜਾਂਚ ਰਿਪੋਰਟ ਹਾਲਾਂਕਿ ਨੈਗੇਟਿਵ ਆਈ ਹੈ। 3 ਮੈਚਾਂ ਦੀ ਸੀਰੀਜ਼ ਦਾ ਪਹਿਲਾ ਮੈਚ ਰੱਦ ਕੀਤਾ ਜਾ ਚੁੱਕਾ ਸੀ। ਦੂਜੇ ਵਨ ਡੇ ਨੂੰ ਇਕ ਦਿਨ ਲਈ ਮੁਲਤਵੀ ਕਰ ਦਿੱਤਾ ਗਿਆ ਸੀ ਕਿਉਂਕਿ ਅੰਪਾਇਰਿੰਗ ਟੀਮ ਅਤੇ ਅਮਰੀਕੀ ਟੀਮ ਦੇ ਮੈਂਬਰਾਂ ’ਚ ਕੁੱਝ ਪਾਜ਼ੇਟਿਵ ਮਾਮਲੇ ਪਾਏ ਗਏ ਹਨ। ਦੋਵਾਂ ਟੀਮਾਂ ਦੇ ਵਿਚ ਟੀ-20 ਸੀਰੀਜ਼ 1-1 ਨਾਲ ਡਰਾਅ ਰਹੀ ਸੀ।
