ਪੂਰਾ ਦੇਸ਼ ਅੱਜ 74ਵਾਂ ਗਣਤੰਤਰ ਦਿਵਸ ਮਨਾ ਰਿਹਾ ਹੈ। 74ਵੇਂ ਗਣਤੰਤਰ ਦਿਵਸ ‘ਤੇ ਰਾਸ਼ਟਰਪਤੀ ਦ੍ਰੋਪਦੀ ਮੁਰਮੂ ਨੇ ਕਰਤਵਯ ਮਾਰਗ ‘ਤੇ ਤਿਰੰਗਾ ਲਹਿਰਾਇਆ। ਇਸ ਤੋਂ ਬਾਅਦ ਪਰੇਡ ਸ਼ੁਰੂ ਹੋਈ। ਇਸ ਸਾਲ ਮਿਸਰ ਦੇ ਰਾਸ਼ਟਰਪਤੀ ਅਬਲੇਦ ਫਤਾਹ ਅਲ-ਸੀਸੀ ਨੇ ਗਣਤੰਤਰ ਦਿਵਸ ਸਮਾਰੋਹ ਵਿੱਚ ਮੁੱਖ ਮਹਿਮਾਨ ਵਜੋਂ ਸ਼ਿਰਕਤ ਕੀਤੀ। ਇਸ ਦੌਰਾਨ ਪਹਿਲੀ ਵਾਰ ਭਾਰਤੀ ਤੋਪਾਂ ਨੇ ਸਲਾਮੀ ਦਿੱਤੀ। ਹੁਣ ਤੱਕ ਬਰਤਾਨੀਆ ਵਿੱਚ ਬਣੀਆਂ ਤੋਪਾਂ ਤੋਂ ਸਲਾਮੀ ਦਿੱਤੀ ਜਾਂਦੀ ਸੀ।
ਦੱਸ ਦਈਏ ਕਿ ਇਸ ਵਾਰ ਅਗਨੀਵੀਰ ਨੇ ਪਹਿਲੀ ਵਾਰ ਗਣਤੰਤਰ ਦਿਵਸ ਪਰੇਡ ਵਿੱਚ ਹਿੱਸਾ ਲਿਆ। ਲੈਫਟੀਨੈਂਟ ਕਮਾਂਡਰ ਦਿਸ਼ਾ ਅਮ੍ਰਿਤ ਦੀ ਅਗਵਾਈ ਵਿੱਚ 144 ਜਵਾਨ ਮਲਾਹਾਂ ਦੀ ਇੱਕ ਜਲ ਸੈਨਾ ਨੇ ਮਾਰਚ ਕੀਤਾ। ਇਸ ਦੌਰਾਨ ਜਵਾਨਾਂ ਵਿੱਚ 3 ਔਰਤਾਂ ਅਤੇ 6 ਪੁਰਸ਼ ਅਗਨੀਵੀਰ ਸ਼ਾਮਲ ਸਨ।
ਇਸ ਤੋਂ ਇਲਾਵਾ ਕੈਪਟਨ ਸੁਨੀਲ ਦਸ਼ਰਥ ਦੀ ਅਗਵਾਈ ਹੇਠ 27 ਏਅਰ ਡਿਫੈਂਸ ਮਿਜ਼ਾਈਲ ਰੈਜੀਮੈਂਟ ਦੇ ਆਕਾਸ਼ ਮਿਜ਼ਾਈਲ ਸਿਸਟਮ ਨੇ ਵੀ ਪਰੇਡ ਵਿੱਚ ਹਿੱਸਾ ਲਿਆ। 512 ਲਾਈਟ ਏਡੀ ਮਿਜ਼ਾਈਲ ਰੈਜੀਮੈਂਟ (ਐੱਸ.ਪੀ.) ਦੀ ਲੈਫਟੀਨੈਂਟ ਚੇਤਨਾ ਸ਼ਰਮਾ ਵੀ ਮੌਜੂਦ ਸਨ। ਦਸ ਦਈਏ ਕਿ 861 ਮਿਜ਼ਾਈਲ ਰੈਜੀਮੈਂਟ ਦੇ ਬ੍ਰਹਮੋਸ ਨੇ ਵੀ ਗਣਤੰਤਰ ਦਿਵਸ ਪਰੇਡ ਵਿੱਚ ਹਿੱਸਾ ਲਿਆ। ਲੈਫਟੀਨੈਂਟ ਪ੍ਰਜਵਲ ਕਾਲਾ ਦੀ ਅਗਵਾਈ ‘ਚ ਦੁਨੀਆ ਨੇ ਭਾਰਤ ਦੇ ਇਸ ਮਿਜ਼ਾਈਲ ਸਿਸਟਮ ਦੀ ਤਾਕਤ ਨੂੰ ਦੇਖਿਆ।