ਬ੍ਰਿਟੇਨ ਦੇ ਲੋਕ ਹੁਣ ਓਥੋਂ ਦੀਆਂ ਸੁਪਰਮਾਰਕੀਟ ਚੋ 2 ਤੋਂ ਵੱਧ ਆਲੂ ਜਾਂ ਟਮਾਟਰ ਨਹੀਂ ਖਰੀਦ ਸਕਦੇ। ਸੁਪਰਮਾਰਕੀਟ ਵੱਲੋ ਇਕ ਲਿਮਟ ਤੈਅ ਕਰ ਦਿੱਤੀ ਗਈ ਹੈ। ਯਾਨੀ ਪੈਸੇ ਦੇਣ ਦੇ ਬਾਵਜੂਦ ਤੁਸੀਂ ਜ਼ਿਆਦਾ ਮਾਤਰਾ ‘ਚ ਆਲੂ, ਟਮਾਟਰ ਵਰਗੀਆਂ ਚੀਜ਼ਾਂ ਨਹੀਂ ਖਰੀਦ ਸਕਦੇ। ਜਾਣਕਾਰੀ ਮੁਤਾਬਿਕ ਬ੍ਰਿਟੇਨ ਦੀਆਂ 4 ਸਭ ਤੋਂ ਵੱਡੀਆਂ ਸੁਪਰਮਾਰਕੀਟਾਂ ਮੋਰੀਸਨ, ਐਸਡਾ, ਐਲਡੀ ਅਤੇ ਟੈਸਕੋ ਨੇ ਤਾਜ਼ੇ ਫਲਾਂ ਅਤੇ ਸਬਜ਼ੀਆਂ ‘ਤੇ ਸੀਮਾਵਾਂ ਨਿਰਧਾਰਤ ਕੀਤੀਆਂ ਹਨ। ਇਨ੍ਹਾਂ ਵਿੱਚ ਫਲ ਅਤੇ ਸਬਜ਼ੀਆਂ ਜਿਵੇਂ ਕਿ ਟਮਾਟਰ, ਆਲੂ, ਖੀਰੇ, ਸ਼ਿਮਲਾ ਮਿਰਚ ਅਤੇ ਬਰੌਕਲੀ ਸ਼ਾਮਲ ਹਨ। ਯਾਨੀ ਜੇਕਰ ਕੋਈ ਵਿਅਕਤੀ ਟਮਾਟਰ ਖਰੀਦਣਾ ਚਾਹੁੰਦਾ ਹੈ ਤਾਂ ਉਹ ਸਿਰਫ਼ 2 ਤੋਂ 3 ਟਮਾਟਰ ਹੀ ਖਰੀਦ ਸਕਦਾ ਹੈ ਨਾ ਕਿ ਕਿੱਲੋ ਦੇ ਹਿਸਾਬ ਨਾਲ।
ਬ੍ਰਿਟੇਨ ਦੇ ਤੀਜੇ ਸਭ ਤੋਂ ਵੱਡੇ ਕਰਿਆਨਾ ਸਟੋਰ ਨੇ ਪਹਿਲਾਂ ਸੀਮਾ ਤੈਅ ਕੀਤੀ ਸੀ। Asda ਸਟੋਰਾਂ ਨੇ ਟਮਾਟਰ, ਸ਼ਿਮਲਾ ਮਿਰਚ, ਖੀਰੇ, ਸਲਾਦ, ਬਰੋਕਲੀ, ਫੁੱਲ ਗੋਭੀ ਅਤੇ ਰਸਬੇਰੀ ਵਰਗੀਆਂ ਚੀਜ਼ਾਂ ‘ਤੇ ਸੀਮਾਵਾਂ ਲਾਗੂ ਕੀਤੀਆਂ ਹਨ। ਇਹਨਾਂ ਵਿੱਚੋਂ 3 ਤੋਂ ਵੱਧ ਵਸਤੂਆਂ ਐਸਡਾ ਸਟੋਰਾਂ ਤੋਂ ਨਹੀਂ ਖਰੀਦੀਆਂ ਜਾ ਸਕਦੀਆਂ ਹਨ।ਇਸ ਤੋਂ ਬਾਅਦ ਬੁੱਧਵਾਰ ਤੱਕ ਮੌਰੀਸਨ ਦੇ ਨਾਲ ਐਲਡੀ ਅਤੇ ਟੈਸਕੋ ਵੀ ਇਸ ਵਿੱਚ ਸ਼ਾਮਲ ਹੋ ਗਏ। ਮੌਰੀਸਨ ‘ਤੇ, ਗਾਹਕ ਟਮਾਟਰ, ਖੀਰੇ, ਸਲਾਦ ਅਤੇ ਸ਼ਿਮਲਾ ਮਿਰਚਾਂ ਵਰਗੀਆਂ ਸਬਜ਼ੀਆਂ 2 ਤੋਂ ਵੱਧ ਨਹੀਂ ਲੈ ਸਕਦੇ ਹਨ। ਪੂਰਬੀ ਲੰਡਨ, ਲਿਵਰਪੂਲ ਅਤੇ ਯੂਕੇ ਦੇ ਕਈ ਹਿੱਸਿਆਂ ਵਿੱਚ ਦੁਕਾਨਾਂ ਤੋਂ ਫਲ ਅਤੇ ਸਬਜ਼ੀਆਂ ਪਹਿਲਾਂ ਹੀ ਗਾਇਬ ਹਨ।
ਦੱਸਿਆ ਜਾ ਰਿਹਾ ਹੈ ਕਿ ਜਿਨ੍ਹਾਂ ਦੇਸ਼ਾਂ ਤੋਂ ਇਹ ਚੀਜ਼ਾਂ ਆਉਂਦੀਆਂ ਹਨ, ਉਨ੍ਹਾਂ ਦੇਸ਼ਾਂ ਵਿਚ ਇਸ ਵਾਰ ਫ਼ਸਲ ਚੰਗੀ ਨਹੀਂ ਰਹੀ। ਇਸ ਦੇ ਨਾਲ ਹੀ ਬਰਤਾਨੀਆ ਵਿੱਚ ਖੇਤੀ ਸੰਕਟ ਕਾਰਨ ਪੈਦਾਵਾਰ ਵਿੱਚ ਕਮੀ ਆਈ ਹੈ। ਅਜਿਹੇ ‘ਚ ਬ੍ਰਿਟੇਨ ‘ਚ ਇਨ੍ਹਾਂ ਚੀਜ਼ਾਂ ਦੀ ਭਾਰੀ ਕਮੀ ਹੋ ਗਈ ਹੈ।
