ਲੁਧਿਆਣਾ ‘ਚ ਵਿਜੀਲੈਂਸ ਟੀਮ ਸੋਮਵਾਰ ਨੂੰ ਸਾਬਕਾ ਵਿਧਾਇਕ ਤੇ ਸਾਬਕਾ ਆਈਏਐਸ ਅਧਿਕਾਰੀ ਕੁਲਦੀਪ ਸਿੰਘ ਵੈਦ ਦੇ ਘਰ ਕਰੀਬ 9 ਘੰਟੇ ਮੌਜੂਦ ਰਹੀ। ਵਿਜੀਲੈਂਸ ਨੇ ਕੌਂਸਲਰ ਹਰਕਰਨਦੀਪ ਵੈਦ ਪੁੱਤਰ ਕੁਲਦੀਪ ਵੈਦ ਨੂੰ ਜਾਂਚ ਵਿੱਚ ਸ਼ਾਮਲ ਕੀਤਾ ਹੈ। ਵਿਜੀਲੈਂਸ ਕੁਲਦੀਪ ਵੈਦ ਨੂੰ ਵੀ ਜਲਦ ਤਲਬ ਕਰ ਸਕਦੀ ਹੈ। ਟੀਮ ਨੇ ਵੈਦ ਦੇ ਘਰੋਂ ਨਕਦੀ ਅਤੇ ਸੋਨਾ ਵੀ ਬਰਾਮਦ ਕੀਤਾ ਹੈ। ਕੁਲਦੀਪ ਵੈਦ ਦੀ ਸਰਾਭਾ ਨਗਰ ਕੋਠੀ ਵਿੱਚੋਂ ਵੱਡੀ ਮਾਤਰਾ ਵਿੱਚ ਸ਼ਰਾਬ ਦੀਆਂ ਬੋਤਲਾਂ ਬਰਾਮਦ ਹੋਈਆਂ ਹਨ। ਜਿਸ ਵਿੱਚ 7 ਇੰਪੋਰਟਡ ਸਕਾਚ ਬੋਤਲਾਂ ਚੰਡੀਗੜ੍ਹ ਬ੍ਰਾਂਡ ਦੀਆਂ ਹਨ ਅਤੇ ਇਹ ਬੋਤਲਾਂ ਉਨ੍ਹਾਂ ਦੀਆਂ ਮੁਸ਼ਕਿਲਾਂ ਵਧਾ ਸਕਦੀਆਂ ਹਨ। ਟੀਮ ਨੇ ਉਸ ਦੇ ਕੈਫੇ ‘ਤੇ ਵੀ ਦਸਤਕ ਦਿੱਤੀ ਸੀ।
ਵੈਦ ਦੀ ਕੋਠੀ ਵਿੱਚੋਂ ਸਕਾਚ, ਵਿਸਕੀ, ਵਾਈਨ ਤੇ ਬੀਅਰ ਸਮੇਤ ਕੁੱਲ 73 ਸ਼ਰਾਬ ਦੀਆਂ ਬੋਤਲਾਂ ਬਰਾਮਦ ਹੋਈਆਂ ਹਨ। ਕੁਲਦੀਪ ਵੈਦ ਅਤੇ ਉਸ ਦੇ ਪੁੱਤਰ ਕੋਲ ਐੱਲ.-50 ਐਕਸਾਈਜ਼ ਲਾਇਸੈਂਸ ਹੈ। ਇਸ ਕਾਰਨ ਉਹ ਆਪਣੇ ਘਰ ਵਿੱਚ 24 ਬੋਤਲਾਂ ਰੱਖ ਸਕਦਾ ਹੈ ਪਰ ਇਸ ਫਾਰਮੂਲੇ ਤੋਂ ਬਾਅਦ ਵੀ ਉਨ੍ਹਾਂ ਕੋਲ ਡੇਢ ਬੋਤਲ ਵਿਸਕੀ ਅਤੇ ਸੱਤ ਬੋਤਲਾਂ ਵਾਈਨ ਦੀਆਂ ਪਾਈਆਂ ਗਈਆਂ ਹਨ। ਵਿਜੀਲੈਂਸ ਨੇ ਨਾਜਾਇਜ਼ ਬੋਤਲਾਂ ਮਿਲਣ ‘ਤੇ ਐਕਸਾਈਜ਼ ਵਿਭਾਗ ਨੂੰ ਸੂਚਿਤ ਕਰ ਦਿੱਤਾ ਹੈ।
ਵਿਜੀਲੈਂਸ ਨੇ ਵੈਦ ਦੀ ਕੋਠੀ ਵਿੱਚੋਂ ਕਿੰਨੀ ਨਗਦੀ ਬਰਾਮਦ ਕੀਤੀ ਹੈ, ਇਸ ਬਾਰੇ ਹਾਲੇ ਕੋਈ ਖੁਲਾਸਾ ਨਹੀਂ ਹੋਇਆ ਹੈ ਪਰ ਜੇਕਰ ਇਹ ਰਕਮ ਵੱਡੀ ਮਾਤਰਾ ਵਿੱਚ ਸਾਹਮਣੇ ਆਉਂਦੀ ਹੈ ਤਾਂ ਇਸ ਦੀ ਸੂਚਨਾ ਆਮਦਨ ਕਰ ਵਿਭਾਗ ਨੂੰ ਦਿੱਤੀ ਜਾਵੇਗੀ। ਦੱਸ ਦੇਈਏ ਕਿ ਵੈਦ ਕੋਲ ਵੱਡੀ ਗਿਣਤੀ ਵਿੱਚ ਲਗਜ਼ਰੀ ਕਾਰਾਂ ਵੀ ਹਨ। ਸਾਬਕਾ ਵਿਧਾਇਕ ਕੁਲਦੀਪ ਵੈਦ ਦੀ ਕੋਠੀ ‘ਤੇ ਵਿਜੀਲੈਂਸ ਨੇ ਛਾਪਾ ਮਾਰਿਆ ਤਾਂ 6 ਜਾਇਦਾਦਾਂ ਦਾ ਅੰਕੜਾ ਸਾਹਮਣੇ ਆ ਰਿਹਾ ਸੀ। ਇਸ ਦੌਰਾਨ 3 ਤੋਂ 4 ਘੰਟਿਆਂ ਬਾਅਦ 9 ਤੋਂ ਵੱਧ ਜਾਇਦਾਦਾਂ ਦੇ ਕਾਗਜ਼ਾਤ ਅਧਿਕਾਰੀਆਂ ਦੇ ਸਾਹਮਣੇ ਆ ਗਏ ਹਨ। ਜਾਂਚ ਦੌਰਾਨ ਜਾਇਦਾਦਾਂ ਦੀ ਗਿਣਤੀ ਵੱਧ ਰਹੀ ਹੈ ਜਿਸ ਕਾਰਨ ਵੈਦ ਕਿਤੇ ਨਾ ਕਿਤੇ ਮੁਸੀਬਤ ਵਿੱਚ ਫਸ ਸਕਦੇ ਹਨ।
ਵਿਜੀਲੈਂਸ ਵੈਦ ਦੀ ਪਤਨੀ ਅਤੇ ਕੌਂਸਲਰ ਪੁੱਤਰ ਹਰਕਰਨਦੀਪ ਵੈਦ ਅਤੇ ਉਸ ਦੀ ਪਤਨੀ ਅਤੇ ਹੋਰ ਪਰਿਵਾਰਕ ਮੈਂਬਰਾਂ ਦੀ ਜਾਇਦਾਦ ਦੇ ਪੂਰੇ ਵੇਰਵੇ ਇਕੱਠੇ ਕਰ ਰਹੀ ਹੈ। ਵਿਜੀਲੈਂਸ ਨੇ ਦੋ ਬੈਂਕ ਖਾਤਿਆਂ ਦਾ ਪੂਰਾ ਰਿਕਾਰਡ ਆਪਣੇ ਕਬਜ਼ੇ ਵਿੱਚ ਲੈ ਲਿਆ ਹੈ। ਵਿਜੀਲੈਂਸ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਜੇਕਰ ਕੋਈ ਘਪਲਾ ਸਾਹਮਣੇ ਆਇਆ ਤਾਂ ਕਾਰਵਾਈ ਕੀਤੀ ਜਾਵੇਗੀ।
ਵਿਜੀਲੈਂਸ ਦੇ ਐਸਐਸਪੀ ਰਵਿੰਦਰਪਾਲ ਸਿੰਘ ਸੰਧੂ ਨੇ ਦੱਸਿਆ ਕਿ ਫਿਲਹਾਲ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਟੀਮ ਨੇ ਸਾਬਕਾ ਵਿਧਾਇਕ ਕੁਲਦੀਪ ਵੈਦ ਦੇ ਘਰ ਦੀ ਜਾਂਚ ਕੀਤੀ ਹੈ। ਕੁਝ ਸ਼ਰਾਬ ਦੀਆਂ ਬੋਤਲਾਂ ਵੀ ਮਿਲੀਆਂ ਹਨ। ਬਾਕੀ ਜਾਂਚ ਤੋਂ ਬਾਅਦ ਪੂਰਾ ਵੇਰਵਾ ਦਿੱਤਾ ਜਾਵੇਗਾ।












