- ਜਿੱਤ ਤੋਂ ਬਾਅਦ ਦੇ ਜਲੂਸ ‘ਤੇ ਵੀ ਲੱਗੀ ਪਾਬੰਦੀ
ਨਵੀਂ ਦਿੱਲੀ, 9 ਜਨਵਰੀ 2022 – ਬੀਤੇ ਦਿਨ 8 ਜਨਵਰੀ ਨੂੰ ਚੋਣ ਕਮਿਸ਼ਨ ਨੇ ਇਸ ਸਾਲ ਪੰਜ ਸੂਬਿਆਂ ਵਿੱਚ ਹੋਣ ਵਾਲੀਆਂ ਵਿਧਾਨ ਸਭਾ ਚੋਣਾਂ ਦੀਆਂ ਤਰੀਕਾਂ ਦਾ ਐਲਾਨ ਕਰ ਦਿੱਤਾ ਹੈ। ਉੱਤਰ ਪ੍ਰਦੇਸ਼, ਉਤਰਾਖੰਡ, ਪੰਜਾਬ, ਗੋਆ ਅਤੇ ਮਨੀਪੁਰ ਵਿੱਚ ਚੋਣਾਂ ਹੋਣੀਆਂ ਹਨ। ਇਸ ਸੰਬੰਧੀ ਜਾਣਕਾਰੀ ਦਿੰਦਿਆਂ ਮੁੱਖ ਚੋਣ ਕਮਿਸ਼ਨਰ ਸੁਸ਼ੀਲ ਚੰਦਰਾ ਨੇ ਦੱਸਿਆ ਕਿ ਦੇਸ਼ ਦੇ 5 ਸੂਬਿਆਂ ਦੇ 690 ਵਿਧਾਨ ਸਭਾ ਹਲਕਿਆਂ ‘ਚ ਚੋਣਾਂ ਹੋਣਗੀਆਂ।
ਦੇਸ਼ ‘ਚ ਇਸ ਸਮੇਂ ਕੋਰੋਨਾ ਵੀ ਸਿਖਰ ‘ਤੇ ਹੈ ਅਤੇ ਕੋਰੋਨਾ ਦੀ ਤੀਜੀ ਲਹਿਰ ਵੀ ਦਸਤਕ ਦੇ ਰਹੀ ਹੈ। ਦੇਸ਼ ‘ਚ ਦਿਨੋ-ਦਿਨ ਕੋਰੋਨਾ ਕੇਸ ਵੀ ਵਧ ਰਹੇ ਹਨ। ਜਿਸ ਨੂੰ ਲੈ ਕੇ ਚੋਣ ਕਮਿਸ਼ਨ ਵੱਲੋਂ ਕੋਰੋਨਾ ਦਰਮਿਆਨ ਚੋਣਾਂ ਕਰਵਾਉਣ ਲਈ ਨਵਾਂ ਪ੍ਰੋਟੋਕੋਲ ਲਾਗੂ ਕੀਤਾ ਜਾਵੇਗਾ। ਜਿਸ ਤਹਿਤ ਚੋਣ ਕਮਿਸ਼ਨ ਨੇ 15 ਜਨਵਰੀ ਤੱਕ ਰੈਲੀਆਂ-ਰੋਡ ਸ਼ੋਆਂ ‘ਤੇ ਰੋਕ ਲਾ ਦਿੱਤੀ ਹੈ ਅਤੇ ਨਾ ਹੀ ਪੈਦਲ ਯਾਤਰਾ ਹੋਵੇਗੀ। ਸਟਰੀਟ ਮੀਟਿੰਗਾਂ, ਬਾਈਕ ਰੈਲੀਆਂ ‘ਤੇ ਵੀ ਪਾਬੰਦੀ ਹੋਵੇਗੀ। ਜਿੱਤ ਤੋਂ ਬਾਅਦ ਉਮੀਦਵਾਰ ਜਿੱਤ ਦਾ ਜਲੂਸ ਨਹੀਂ ਕੱਢ ਸਕਣਗੇ। ਚੋਣ ਪ੍ਰਚਾਰ ਵਰਚੁਅਲ ਰੈਲੀ ਰਾਹੀਂ ਹੀ ਕੀਤਾ ਜਾਵੇਗਾ। ਸਿਰਫ਼ 5 ਲੋਕ ਹੀ ਘਰ-ਘਰ ਜਾ ਕੇ ਚੋਣ ਪ੍ਰਚਾਰ ਕਰ ਸਕਦੇ ਹਨ। ਹਰ ਰੈਲੀ ਤੋਂ ਪਹਿਲਾਂ ਉਮੀਦਵਾਰ ਤੋਂ ਐਫੀਡੇਵਿਟ ਲਿਆ ਜਾਵੇਗਾ।
ਇਸ ਤੋਂ ਬਿਨਾਂ ਵੋਟ ਪਾਉਣ ਮੌਕੇ ਵੀ ਜੇਕਰ ਕੋਈ ਵੋਟਰ ਫੇਸ ਮਾਸਕ ਭੁੱਲ ਜਾਂਦਾ ਹੈ, ਤਾਂ ਉਨ੍ਹਾਂ ਲਈ ਰਾਖਵੇਂ ਮਾਸਕ ਰੱਖੇ ਜਾਣਗੇ। ਟੀਕਾਕਰਨ ਮੁਹਿੰਮ ਤੇਜ਼ ਕੀਤੀ ਜਾ ਰਹੀ ਹੈ। ਸਾਰੇ ਚੋਣ ਵਰਕਰਾਂ ਨੂੰ ਕੋਰੋਨਾ ਵੈਕਸੀਨ ਦੀਆਂ ਦੋਵੇਂ ਖੁਰਾਕਾਂ ਲੈਣੀਆਂ ਜ਼ਰੂਰੀ ਹੋਣਗੀਆਂ।
