ਇਸਰੋ ਅੱਜ ਯਾਨੀ 17 ਅਗਸਤ ਨੂੰ ਚੰਦਰਯਾਨ-3 ਦੇ ਪ੍ਰੋਪਲਸ਼ਨ ਮਾਡਿਊਲ ਨੂੰ ਲੈਂਡਰ ਅਤੇ ਰੋਵਰ ਤੋਂ ਵੱਖ ਕਰੇਗਾ। ਹੁਣ ਪ੍ਰੋਪਲਸ਼ਨ ਮਾਡਿਊਲ 3-6 ਮਹੀਨੇ ਤੱਕ ਚੰਦਰਮਾ ਦੇ ਪੰਧ ‘ਚ ਰਹਿ ਕੇ ਧਰਤੀ ਤੋਂ ਆਉਣ ਵਾਲੇ ਰੇਡੀਏਸ਼ਨ ਦਾ ਅਧਿਐਨ ਕਰੇਗਾ ਜਦਕਿ ਲੈਂਡਰ-ਰੋਵਰ 23 ਅਗਸਤ ਨੂੰ ਸ਼ਾਮ 5:47 ‘ਤੇ ਚੰਦਰਮਾ ਦੀ ਸਤ੍ਹਾ ‘ਤੇ ਉਤਰੇਗਾ। ਇੱਥੇ ਉਹ 14 ਦਿਨਾਂ ਤੱਕ ਪਾਣੀ ਦੀ ਖੋਜ ਸਮੇਤ ਹੋਰ ਪ੍ਰਯੋਗ ਕਰਨਗੇ।
ਇਸ ਸਮੇਂ ਚੰਦਰਯਾਨ ਇੱਕ ਗੋਲ ਚੱਕਰ ਵਿੱਚ ਘੁੰਮ ਰਿਹਾ ਹੈ ਜਿਸ ਵਿੱਚ ਚੰਦਰਮਾ ਤੋਂ ਇਸਦੀ ਘੱਟੋ ਘੱਟ ਦੂਰੀ 153 ਕਿਲੋਮੀਟਰ ਅਤੇ ਵੱਧ ਤੋਂ ਵੱਧ ਦੂਰੀ 163 ਕਿਲੋਮੀਟਰ ਹੈ। ਇਸਰੋ ਦੇ ਵਿਗਿਆਨੀਆਂ ਨੇ 16 ਅਗਸਤ ਨੂੰ ਸਵੇਰੇ 08:30 ਵਜੇ ਕੁਝ ਸਮੇਂ ਲਈ ਯਾਨ ਦੇ ਥਰਸਟਰਾਂ ਨੂੰ ਫਾਇਰ ਕੀਤਾ। ਇਸ ਤੋਂ ਬਾਅਦ ਚੰਦਰਯਾਨ 153 ਕਿਲੋਮੀਟਰ X 163 ਕਿਲੋਮੀਟਰ ਦੇ ਲਗਭਗ ਗੋਲ ਚੱਕਰ ਵਿੱਚ ਆ ਗਿਆ ਸੀ।
ਦੱਸ ਦਈਏ ਕਿ 22 ਦਿਨਾਂ ਦੀ ਯਾਤਰਾ ਤੋਂ ਬਾਅਦ ਚੰਦਰਯਾਨ 5 ਅਗਸਤ ਨੂੰ ਸ਼ਾਮ 7:15 ਵਜੇ ਚੰਦਰਮਾ ਦੇ ਪੰਧ ‘ਤੇ ਪਹੁੰਚਿਆ ਸੀ। ਜਦੋਂ ਚੰਦਰਯਾਨ ਨੇ ਪਹਿਲੀ ਵਾਰ ਚੰਦਰਮਾ ਦੇ ਪੰਧ ਵਿੱਚ ਪ੍ਰਵੇਸ਼ ਕੀਤਾ, ਤਾਂ ਇਸਦੀ ਔਰਬਿਟ 164 ਕਿਲੋਮੀਟਰ x 18,074 ਕਿਲੋਮੀਟਰ ਸੀ। ਆਰਬਿਟ ਵਿੱਚ ਦਾਖਲ ਹੋਣ ਸਮੇਂ ਇਸ ਦੇ ਆਨ-ਬੋਰਡ ਕੈਮਰਿਆਂ ਨੇ ਚੰਦਰਮਾ ਦੀਆਂ ਤਸਵੀਰਾਂ ਵੀ ਖਿੱਚੀਆਂ ਸਨ।