ਭਾਰਤੀ ਪੁਲਾੜ ਖੋਜ ਸੰਗਠਨ (ਇਸਰੋ) ਨੇ ਚੰਦਰਯਾਨ-3 ਦੇ ਲੈਂਡਰ ਦੀਆਂ ਤਸਵੀਰਾਂ ਸਾਂਝੀਆਂ ਕੀਤੀਆਂ ਹਨ। ਇਹ ਫੋਟੋਆਂ 6 ਸਤੰਬਰ, 2023 ਨੂੰ ਚੰਦਰਯਾਨ-2 ਦੇ ਡਿਊਲ-ਫ੍ਰੀਕੁਐਂਸੀ ਸਿੰਥੈਟਿਕ ਅਪਰਚਰ ਰਾਡਾਰ (DFSAR) ਯੰਤਰ ਦੁਆਰਾ ਕੈਪਚਰ ਕੀਤੀਆਂ ਗਈਆਂ ਸਨ। ਵਿਕਰਮ ਲੈਂਡਰ 23 ਅਗਸਤ ਨੂੰ ਸ਼ਾਮ 6:04 ਵਜੇ ਚੰਦਰਮਾ ਦੀ ਸਤ੍ਹਾ ‘ਤੇ ਉਤਰਿਆ ਸੀ।
ਪੁਲਾੜ ਏਜੰਸੀ ਨੇ ਆਪਣੇ ਬਿਆਨ ‘ਚ ਦੱਸਿਆ ਕਿ DFSAR ਚੰਦਰਯਾਨ-2 ਆਰਬਿਟਰ ‘ਤੇ ਲਗਾਇਆ ਗਿਆ ਇਕ ਵੱਡਾ ਵਿਗਿਆਨਕ ਯੰਤਰ ਹੈ। ਇਹ L ਅਤੇ S ਬੈਂਡਾਂ ਵਿੱਚ ਮਾਈਕ੍ਰੋਵੇਵ ਦੀ ਵਰਤੋਂ ਕਰਦਾ ਹੈ। ਇਹ ਅਤਿ-ਆਧੁਨਿਕ ਯੰਤਰ ਵਰਤਮਾਨ ਵਿੱਚ ਕਿਸੇ ਵੀ ਗ੍ਰਹਿ ਮਿਸ਼ਨ ‘ਤੇ ਸਭ ਤੋਂ ਉੱਚੇ ਰੈਜ਼ੋਲਿਊਸ਼ਨ ਵਾਲੇ ਪੋਲੈਰੀਮੈਟ੍ਰਿਕ ਚਿੱਤਰ ਪੇਸ਼ ਕਰਦਾ ਹੈ। DFSAR ਪਿਛਲੇ ਚਾਰ ਸਾਲਾਂ ਤੋਂ ਚੰਦਰਮਾ ਦੀ ਸਤ੍ਹਾ ਤੋਂ ਉੱਚ ਗੁਣਵੱਤਾ ਵਾਲੇ ਡੇਟਾ ਨੂੰ ਪ੍ਰਸਾਰਿਤ ਕਰ ਰਿਹਾ ਹੈ। ਇਸ ਤੋਂ ਪਹਿਲਾਂ ਹਾਲ ਹੀ ਵਿੱਚ ਅਮਰੀਕੀ ਪੁਲਾੜ ਏਜੰਸੀ ਨਾਸਾ ਨੇ ਵੀ ਚੰਦਰਯਾਨ-3 ਲੈਂਡਰ ਦੀ ਤਸਵੀਰ ਸਾਂਝੀ ਕੀਤੀ ਸੀ। ਇਹ ਤਸਵੀਰ 27 ਅਗਸਤ ਨੂੰ ਚੰਦਰਮਾ ਦੀ ਪਰਿਕਰਮਾ ਕਰ ਰਹੇ ਇਸ ਦੇ Lunar Reconnaissance Orbiter (LRO) ਦੁਆਰਾ ਲਈ ਗਈ ਸੀ। ਇਸਰੋ ਨੇ 5 ਸਤੰਬਰ ਦੀ ਸ਼ਾਮ ਨੂੰ ਵਿਕਰਮ ਲੈਂਡਰ ਦੀ 3ਡੀ ਤਸਵੀਰ ਵੀ ਸਾਂਝੀ ਕੀਤੀ ਸੀ।
