ਜਲੰਧਰ ਸ਼ਹਿਰ ਦੇ ਨਾਲ ਲੱਗਦੇ ਕਬੂਲਪੁਰਾ ‘ਚ ਮਾਮੂਲੀ ਝਗੜੇ ‘ਚ ਤੇਜ਼ਧਾਰ ਹਥਿਆਰਾਂ ਦੀ ਵਰਤੋਂ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਇੱਕ ਵਿਅਕਤੀ ਨੇ ਗੁਆਂਢੀ ਨੂੰ ਜ਼ਿਆਦਾ ਰੌਲਾ ਪੈਣ ਕਰਕੇ ਕੰਮ ਬੰਦ ਕਰਨ ਲਈ ਕਿਹਾ ਤਾਂ ਗੁਆਂਢੀ ਗੁੱਸੇ ਵਿੱਚ ਆ ਗਿਆ। ਉਸ ਨੇ ਘਰ ਵਿੱਚ ਪਈ ਤਲਵਾਰ ਕੱਢ ਲਈ ਅਤੇ ਕੰਮ ਕਰਨ ਤੋਂ ਰੋਕਣ ਵਾਲੇ ਵਿਅਕਤੀ ’ਤੇ ਹਮਲਾ ਕਰ ਦਿੱਤਾ। ਇਸ ਹਮਲੇ ‘ਚ ਸੁਰਜੀਤ ਕੁਮਾਰ ਪੁੱਤਰ ਜਗੀਰ ਚੰਦ ਦੇ ਸਿਰ ਅਤੇ ਲੱਤਾਂ ‘ਤੇ ਸੱਟਾਂ ਲੱਗੀਆਂ ਅਤੇ ਟਾਂਕੇ ਲਗਾਉਣੇ ਪਏ ।
ਜਾਣਕਾਰੀ ਦਿੰਦਿਆ ਪੀੜਤ ਸੁਰਜੀਤ ਨੇ ਦੱਸਿਆ ਕਿ ਰਾਤ ਕਰੀਬ 2 ਵਜੇ ਗੁਆਂਢੀ ਉਸ ਦੀ ਕੰਧ ’ਤੇ ਕੁੱਝ ਠੋਕ ਰਿਹਾ ਸੀ ਤੇ ਬੱਚੇ ਵੀ ਸੌਂ ਨਹੀਂ ਸਕਦੇ ਸਨ। ਉਹ ਸਾਦੇ ਢੰਗ ਨਾਲ ਗੁਆਂਢੀ ਬਲਵੀਰ ਸਿੰਘ ਦੇ ਘਰ ਗਿਆ। ਉਨ੍ਹਾਂ ਦੱਸਿਆ ਕਿ ਤੁਹਾਡੇ ਘਰ ਕੰਮ ਚੱਲ ਰਿਹਾ ਹੈ, ਜਿਸ ਕਰਕੇ ਸ਼ੋਰ ਸ਼ਰਾਬਾ ਹੋ ਰਿਹਾ ਤੇ ਸੋਣਾ ਮੁਸ਼ਕਿਲ ਹੈ,ਕੰਮ ਸਵੇਰੇ ਕਰ ਲੈਣਾ।
ਸੁਰਜੀਤ ਨੇ ਦੱਸਿਆ ਕਿ ਬੱਸ ਇਸੇ ਗੱਲ ਨੂੰ ਲੈ ਕੇ ਬਲਵੀਰ ਅਤੇ ਉਸ ਦਾ ਲੜਕਾ ਸੰਨੀ ਗਾਲੀ-ਗਲੋਚ ਕਰਨ ਲੱਗੇ। ਬਾਅਦ ‘ਚ ਅਚਾਨਕ ਬਲਬੀਰ ਨੇ ਆਪਣੀ ਤਲਵਾਰ ਨਾਲ ਉਸ ਦੀਆਂ ਲੱਤਾਂ ਅਤੇ ਸਿਰ ‘ਤੇ ਹਮਲਾ ਕਰ ਦਿੱਤਾ। ਇਸ ਦੌਰਾਨ ਸਥਾਨਕ ਪੰਚ ਅਤੇ ਹੋਰ ਲੋਕ ਪਹੁੰਚ ਗਏ। ਲੋਕ ਉਸ ਨੂੰ ਹਸਪਤਾਲ ਲੈ ਗਏ।
