ਸਾਊਦੀ ਅਰਬ IPL ਯਾਨੀ ਇੰਡੀਅਨ ਪ੍ਰੀਮੀਅਰ ਲੀਗ ‘ਚ ਅਰਬਾਂ ਡਾਲਰ ਦਾ ਨਿਵੇਸ਼ ਕਰਨਾ ਚਾਹੁੰਦਾ ਹੈ। ਫੁੱਟਬਾਲ ਤੋਂ ਬਾਅਦ ਹੁਣ ਸਾਊਦੀ ਦੀ ਨਜ਼ਰ ਕ੍ਰਿਕਟ ‘ਤੇ ਹੈ। ਸਾਊਦੀ ਅਰਬ ਪਹਿਲਾਂ ਹੀ ਫੁੱਟਬਾਲ ਅਤੇ ਗੋਲਫ ਵਿੱਚ ਵੱਡਾ ਨਿਵੇਸ਼ ਕਰ ਚੁੱਕਾ ਹੈ। ਹੁਣ ਇਹ ਦੇਸ਼ ਦੁਨੀਆ ਦੀ ਦੂਜੀ ਸਭ ਤੋਂ ਪ੍ਰਸਿੱਧ ਖੇਡ ਵਿੱਚ ਨਿਵੇਸ਼ ਕਰਕੇ ਅੰਤਰਰਾਸ਼ਟਰੀ ਖੇਡਾਂ ਦੀ ਦੁਨੀਆ ਵਿੱਚ ਆਪਣੇ ਆਪ ਨੂੰ ਸਥਾਪਿਤ ਕਰਨ ਦੀ ਕੋਸ਼ਿਸ਼ ਕਰ ਰਿਹਾ ਹੈ। ਸਾਊਦੀ ਅਰਬ ਦਾ ਪ੍ਰਸਤਾਵ ਆਈਪੀਐਲ ਨੂੰ ਕੰਪਨੀ ਵਿੱਚ ਤਬਦੀਲ ਕਰਨ ਦਾ ਹੈ।
ਰਿਪੋਰਟ ਮੁਤਾਬਕ ਕ੍ਰਾਊਨ ਪ੍ਰਿੰਸ ਮੁਹੰਮਦ ਬਿਨ ਸਲਮਾਨ ਦੇ ਸਲਾਹਕਾਰਾਂ ਨੇ ਭਾਰਤ ਸਰਕਾਰ ਦੇ ਅਧਿਕਾਰੀਆਂ ਨੂੰ ਉਸ ਦੀ ਨਿਵੇਸ਼ ਯੋਜਨਾ ਬਾਰੇ ਜਾਣਕਾਰੀ ਦਿੱਤੀ ਹੈ। ਯੋਜਨਾ ਇਹ ਹੈ ਕਿ ਆਈ.ਪੀ.ਐੱਲ ਨੂੰ ਇਕ ਕੰਪਨੀ ਦੇ ਤੌਰ ‘ਤੇ ਟਰਾਂਸਫਰ ਕੀਤਾ ਜਾਵੇਗਾ। ਇਸ ਦੀ ਕੀਮਤ ਲਗਭਗ 30 ਬਿਲੀਅਨ ਡਾਲਰ ਹੋਵੇਗੀ। ਇਸ ਤੋਂ ਬਾਅਦ ਸਾਊਦੀ ਅਰਬ ਇਸ ‘ਚ ਵੱਡੀ ਹਿੱਸੇਦਾਰੀ ਖਰੀਦਣਾ ਚਾਹੁੰਦਾ ਹੈ। ਸਾਊਦੀ ਅਰਬ ਨੇ 5 ਬਿਲੀਅਨ ਡਾਲਰ ਨਾਲ ਮਹੱਤਵਪੂਰਨ ਹਿੱਸੇਦਾਰੀ ਖਰੀਦਣ ਦੀ ਇੱਛਾ ਜ਼ਾਹਰ ਕੀਤੀ ਹੈ। ਸੂਤਰਾਂ ਮੁਤਾਬਕ ਇਹ ਚਰਚਾ ਉਸ ਸਮੇਂ ਹੋਈ ਜਦੋਂ ਕ੍ਰਾਊਨ ਪ੍ਰਿੰਸ ਸਤੰਬਰ ‘ਚ ਭਾਰਤ ਦੌਰੇ ‘ਤੇ ਆਏ ਸਨ।
ਸਾਊਦੀ ਅਰਬ ਚਾਹੁੰਦਾ ਹੈ ਕਿ ਫੁੱਟਬਾਲ ਲੀਗ ਦੀ ਤਰਜ਼ ‘ਤੇ ਆਈ.ਪੀ.ਐੱਲ. ਦਾ ਵਿਸਤਾਰ ਦੂਜੇ ਦੇਸ਼ਾਂ ‘ਚ ਵੀ ਹੋਵੇ। ਸਾਊਦੀ ਅਰਬ ਇਸ ਸੌਦੇ ਨੂੰ ਜਲਦੀ ਕਰਨਾ ਚਾਹੁੰਦਾ ਹੈ। ਇਸ ਦੇ ਨਾਲ ਹੀ ਭਾਰਤ ਸਰਕਾਰ ਅਤੇ ਬੀਸੀਸੀਆਈ ਪੂਰੇ ਵਿਚਾਰ ਵਟਾਂਦਰੇ ਤੋਂ ਬਾਅਦ ਹੀ ਇਸ ਬਾਰੇ ਕੋਈ ਫੈਸਲਾ ਲੈਣਗੇ।