ਫਤਿਹਾਬਾਦ ਦੇ ਟੋਹਾਣਾ ਇਲਾਕੇ ‘ਚ ਅੱਜ ਤੜਕੇ ਇਕ ਘਰ ਦੇ ਫਰਿੱਜ ‘ਚ ਧਮਾਕਾ ਹੋ ਗਿਆ। ਧਮਾਕੇ ਤੋਂ ਬਾਅਦ ਫਰਿੱਜ ਨੂੰ ਅੱਗ ਲੱਗ ਗਈ। ਫਰਿੱਜ ਕੋਲ ਸੌਂ ਰਹੇ ਨੌਜਵਾਨ ਦੇ ਕੱਪੜਿਆਂ ਨੂੰ ਵੀ ਅੱਗ ਲੱਗ ਗਈ ਪਰ ਸਮੇਂ ਸਿਰ ਜਾਗਣ ‘ਤੇ ਉਹ ਮੌਤ ਤੋਂ ਬਚ ਗਿਆ। ਬਾਅਦ ‘ਚ ਬਿਜਲੀ ਸਪਲਾਈ ਕੱਟ ਕੇ ਅੱਗ ‘ਤੇ ਕਾਬੂ ਪਾਇਆ ਗਿਆ।
ਸੂਚਨਾ ਮਿਲਣ ਤੋਂ ਬਾਅਦ ਪੁਲਿਸ ਵੀ ਮੌਕੇ ‘ਤੇ ਪਹੁੰਚ ਗਈ। ਭਾਟੀਆ ਨਗਰ ਦੇ ਰਹਿਣ ਵਾਲੇ ਮਕਾਨ ਮਾਲਕ ਕ੍ਰਿਸ਼ਨ ਨੇ ਦੱਸਿਆ ਕਿ ਪਰਿਵਾਰ ਰਾਤ ਨੂੰ ਸੁੱਤਾ ਪਿਆ ਸੀ। ਜਿਸ ਕਮਰੇ ਵਿਚ ਉਸ ਦਾ ਲੜਕਾ ਸਾਹਿਲ ਸੌਂ ਰਿਹਾ ਸੀ, ਉਸ ਵਿਚ ਫਰਿੱਜ ਰੱਖਿਆ ਹੋਇਆ ਸੀ। ਸਵੇਰੇ 3 ਵਜੇ ਤੋਂ ਬਾਅਦ ਅਚਾਨਕ ਫਰਿੱਜ ‘ਚ ਧਮਾਕਾ ਹੋਇਆ, ਜਿਸ ਨੂੰ ਸੁਣ ਕੇ ਲੜਕਾ ਜਾਗਿਆ ਅਤੇ ਦੇਖਿਆ ਕਿ ਫਰਿੱਜ ਨੂੰ ਅੱਗ ਲੱਗ ਗਈ ਸੀ। ਚਾਰੇ ਪਾਸੇ ਧੂੰਆਂ ਹੀ ਧੂੰਆਂ ਸੀ। ਜਦੋਂ ਉਸ ਦੇ ਕੱਪੜਿਆਂ ਨੂੰ ਵੀ ਅੱਗ ਲੱਗ ਗਈ ਤਾਂ ਉਸ ਨੇ ਤੁਰੰਤ ਅੱਗ ਬੁਝਾ ਕੇ ਆਪਣਾ ਬਚਾਅ ਕੀਤਾ।
ਦੂਜੇ ਕਮਰੇ ਵਿੱਚ ਜਾ ਕੇ ਉਸ ਨੂੰ ਜਗਾਇਆ ਅਤੇ ਘਟਨਾ ਬਾਰੇ ਦੱਸਿਆ। ਉਸ ਨੇ ਤੁਰੰਤ ਘਰ ਦੀ ਬਿਜਲੀ ਸਪਲਾਈ ਬੰਦ ਕਰ ਦਿੱਤੀ ਅਤੇ ਫਿਰ ਪਾਣੀ ਨਾਲ ਅੱਗ ਬੁਝਾਈ। ਅੱਗ ਲੱਗਣ ਕਾਰਨ ਫਰਿੱਜ ਤੇ ਹੋਰ ਘਰੇਲੂ ਸਮਾਨ ਸੜ ਕੇ ਸੁਆਹ ਹੋ ਗਿਆ। ਇਸ ਦੌਰਾਨ ਆਸ-ਪਾਸ ਦੇ ਲੋਕ ਵੀ ਵੱਡੀ ਗਿਣਤੀ ਵਿੱਚ ਇਕੱਠੇ ਹੋ ਗਏ।
