ਜਦੋਂ ਕੋਈ ਵੀ ਵਿਅਕਤੀ ਨੌਕਰੀ ਦੀ ਤਲਾਸ਼ ਕਰਦਾ ਹੈ, ਤਾਂ ਇਸਦੇ ਪਿੱਛੇ ਕੁਝ ਕਾਰਨ ਹੁੰਦੇ ਹਨ। ਪਹਿਲਾ ਉਹ ਚੰਗੀ ਤਨਖ਼ਾਹ ਦੀ ਤਲਾਸ਼ ਕਰ ਰਿਹਾ ਹੁੰਦਾ ਹੈ ਅਤੇ ਦੂਜਾ ਉੱਥੇ ਦਾ ਮਾਹੌਲ ਚੰਗਾ ਹੋਣਾ ਚਾਹੀਦਾ ਹੈ ਤਾਂ ਜੋ ਉਹ ਆਰਾਮ ਨਾਲ ਕੰਮ ਕਰ ਸਕੇ। ਇਸ ਤੋਂ ਬਾਅਦ ਹੀ ਵਿਅਕਤੀ ਉਥੇ ਮਿਲਣ ਵਾਲੀਆਂ ਸਹੂਲਤਾਂ ਬਾਰੇ ਸੋਚਦਾ ਹੈ। ਵੈਸੇ ਤਾਂ ਹਰ ਕੰਪਨੀ ਹਰ ਤਰ੍ਹਾਂ ਦੀਆਂ ਸਹੂਲਤਾਂ ਨਹੀਂ ਦਿੰਦੀਆਂ ਪਰ ਕੁਝ ਕੰਪਨੀਆਂ ਅਜਿਹੀਆਂ ਵੀ ਹਨ ਜੋ ਆਪਣੇ ਕਰਮਚਾਰੀਆਂ ਨੂੰ ਚੰਗੀ ਤਨਖਾਹ ਵੀ ਦਿੰਦੀਆਂ ਹਨ ਅਤੇ ਸਾਰੀਆਂ ਸਹੂਲਤਾਂ ਵੀ ਦਿੰਦੀਆਂ ਹਨ ਪਰ ਅੱਜਕੱਲ੍ਹ ਇਕ ਅਜਿਹਾ ਵਿਅਕਤੀ ਵਾਇਰਲ ਹੋ ਰਿਹਾ ਹੈ, ਜਿਸ ਨੂੰ ਤਨਖਾਹ ਅਤੇ ਹੋਰ ਸਹੂਲਤਾਂ ਤੋਂ ਜ਼ਿਆਦਾ ਖਾਣ ਪੀਣ ਦੀ ਪਈ ਹੈ।
ਅਸਲ ਵਿੱਚ ਵਿਅਕਤੀ ਨੂੰ 43.5 ਲੱਖ ਰੁਪਏ ਦੇ ਸਾਲਾਨਾ ਪੈਕੇਜ ਨਾਲ ਨੌਕਰੀ ਮਿਲ ਰਹੀ ਸੀ, ਪਰ ਫਿਰ ਉਸਨੇ ਅਜਿਹੀ ਸ਼ਰਤ ਰੱਖੀ ਜਿਸ ਨੂੰ ਸੁਣ ਕੇ ਹਰ ਕੋਈ ਹੈਰਾਨ ਰਹਿ ਜਾਵੇਗਾ। ਉਸ ਵਿਅਕਤੀ ਨੇ ਕਿਹਾ ਕਿ ਤਨਖਾਹ ਤਾਂ ਠੀਕ ਹੈ ਪਰ ਕੀ ਕੰਪਨੀ ਮੁਫਤ ਖਾਣਾ ਦੇਵੇਗੀ? ਇਹ ਸ਼ਰਤ ਕਮਿਊਨੀਕੇਸ਼ਨ ਕੰਪਨੀ ਗ੍ਰੇਪਵਾਈਨ ਦੇ ਸੰਸਥਾਪਕ ਸੌਮਿਲ ਤ੍ਰਿਪਾਠੀ ਨੂੰ ਇੰਨੀ ਪਸੰਦ ਆਈ ਕਿ ਉਨ੍ਹਾਂ ਨੇ ਸੋਸ਼ਲ ਮੀਡੀਆ ‘ਤੇ ਇਕ ਪੋਸਟ ਸ਼ੇਅਰ ਕੀਤੀ, ਜਿਸ ‘ਚ ਵਿਅਕਤੀ ਦੀਆਂ ਸਾਰੀਆਂ ਸ਼ਰਤਾਂ ਲਿਖੀਆਂ ਹੋਈਆਂ ਸੀ।
ਵਿਅਕਤੀ ਨੇ ਕਿਹਾ ਸੀ ਕਿ ਉਹ ਅਜਿਹੀ ਕੰਪਨੀ ਵਿੱਚ ਕੰਮ ਕਰਨਾ ਚਾਹੁੰਦਾ ਹੈ ਜਿੱਥੇ ਉਸਨੂੰ ਦਿਨ ਵਿੱਚ ਚਾਰ ਟਾਈਮ ਖਾਣਾ ਮਿਲ ਸਕੇ ਅਤੇ ਉਹ ਵੀ ਪ੍ਰੋਟੀਨ ਭਰਪੂਰ ਭੋਜਨ। ਉਸ ਨੇ ਇਹ ਵੀ ਦੱਸਿਆ ਹੈ ਕਿ ਉਹ ਗੂਗਲ ‘ਤੇ ਇੰਟਰਵਿਊ ਦੀ ਤਿਆਰੀ ਕਰ ਰਿਹਾ ਹੈ। ਉਸਨੇ ਲੋਕਾਂ ਨੂੰ ਇਹ ਵੀ ਪੁੱਛਿਆ ਹੈ ਕਿ ਕੀ ਕੋਈ ਹੋਰ ਕੰਪਨੀ ਹੈ ਜੋ ਉਸਦੀ ਜ਼ਰੂਰਤ ਨੂੰ ਪੂਰਾ ਕਰ ਸਕਦੀ ਹੈ ਭਾਵ ਉਸਨੂੰ ਦਿਨ ਵਿੱਚ ਚਾਰ ਵਾਰ ਪ੍ਰੋਟੀਨ ਭਰਪੂਰ ਭੋਜਨ ਖੁਆ ਸਕਦੀ ਹੈ, ਕਿਉਂਕਿ ਉਹ ਨਿਯਮਤ ਤੌਰ ‘ਤੇ ਜਿੰਮ ਕਰਦਾ ਹੈ।
ਸੌਮਿਲ ਦੁਆਰਾ ਸ਼ੇਅਰ ਕੀਤੀ ਗਈ ਪੋਸਟ ਵਿੱਚ ਉਸਨੇ ਲਿਖਿਆ ਹੈ, ‘ਮੈਂ ਘੱਟ ਹੀ ਲੋਕਾਂ ਨੂੰ ਆਪਣੀ ਤਰਜੀਹਾਂ ਅਤੇ ਭਵਿੱਖ ਦੇ ਵਿਕਲਪਾਂ ਬਾਰੇ ਇੰਨੀ ਸਪੱਸ਼ਟਤਾ ਦੇ ਨਾਲ ਵੇਖਦਾ ਹਾਂ। ਉਸ ਦੀ ਅਗਲੀ ਨੌਕਰੀ ਮਿਲਣ ਦਾ ਕਾਰਨ ਸਾਦਾ ਹੈ, ‘ਚੰਗਾ ਖਾਣਾ’। ਇਸ ਪੋਸਟ ਨੂੰ ਦੇਖਣ ਤੋਂ ਬਾਅਦ ਲੋਕ ਤਰ੍ਹਾਂ-ਤਰ੍ਹਾਂ ਦੇ ਪ੍ਰਤੀਕਰਮ ਵੀ ਦੇ ਰਹੇ ਹਨ। ਇਕ ਯੂਜ਼ਰ ਨੇ ਲਿਖਿਆ, ‘ਉਸ ਨੂੰ ਜ਼ੋਮੈਟੋ ਨਾਲ ਜੁੜਨਾ ਚਾਹੀਦਾ ਹੈ। ਉਹ ਉਸ ਦਾ ਚੰਗੀ ਤਰ੍ਹਾਂ ਖਿਆਲ ਰੱਖਣਗੇ’।
