ਪੰਜਾਬ ਭਾਜਪਾ ਚੋਣ ਮੈਨੀਫੈਸਟੋ (ਸੰਕਲਪ ਪੱਤਰ) ਤਿਆਰ ਕਰਨ ਲਈ ਆਮ ਲੋਕਾਂ ਤੋਂ ਸੁਝਾਅ ਲਵੇਗੀ। ਪੰਜਾਬ ਭਾਜਪਾ ਦੇ ਪ੍ਰਧਾਨ ਸੁਨੀਲ ਜਾਖੜ ਨੇ ਸ਼ੁੱਕਰਵਾਰ ਨੂੰ ਚੰਡੀਗੜ੍ਹ ‘ਚ ਪ੍ਰੈੱਸ ਕਾਨਫਰੰਸ ਦੌਰਾਨ ਇਹ ਖੁਲਾਸਾ ਕੀਤਾ। ਪੰਜਾਬ ਭਾਜਪਾ ਵਲੋਂ ਮੋਦੀ ਦੀ ਗਰੰਟੀ ਤਹਿਤ ਭਾਜਪਾ ਦਾ ਚੋਣ ਮਨੋਰਥ ਪੱਤਰ ਤਿਆਰ ਕਰਨ ਲਈ ਅੱਜ ਪੰਜਾਬ ਦੇ ਸਾਰੇ ਲੋਕ ਸਭਾ ਹਲਕਿਆਂ ਵਿੱਚ ਸੁਝਾਅ ਲੈਣ ਲਈ ਜਾਣ ਵਾਲੀਆਂ ਗਰੰਟੀ ਵੈਨਾਂ ਨੂੰ ਹਰੀ ਝੰਡੀ ਦਿੱਤੀ ਗਈ।
ਸੁਨੀਲ ਜਾਖੜ ਨੇ ਕਿਹਾ ਕਿ ਉਨ੍ਹਾਂ ਦੀ ਪਾਰਟੀ ਚੋਣਾਂ ‘ਚ ਉਹੀ ਗਾਰੰਟੀ ਦੇਵੇਗੀ, ਜਿਸ ਨੂੰ ਪੂਰਾ ਕੀਤਾ ਜਾ ਸਕੇ। ਭਾਜਪਾ ਦੀ ਟੈਗਲਾਈਨ ਹੈ, ਅਸੀਂ ਵਾਅਦੇ ਨਹੀਂ, ਹਕੀਕਤ ਬੁਣਦੇ ਹਾਂ।’ ਸੁਝਾਅ ਲੈਣ ਦੀ ਮੁਹਿੰਮ 10 ਦਿਨਾਂ ਤੱਕ ਚੱਲੇਗੀ। ਇਸ ਮੁਹਿੰਮ ਵਿੱਚ 2 ਵੈਨਾਂ ਹਰ ਲੋਕ ਸਭਾ ਹਲਕੇ ਦੇ ਹਰ ਪਿੰਡ ਵਿੱਚ ਜਾਣਗੀਆਂ। ਇਨ੍ਹਾਂ ਵੈਨਾਂ ਰਾਹੀਂ ਲੋਕਾਂ ਤੋਂ ਸੁਝਾਅ ਲਏ ਜਾਣਗੇ।
ਸੁਝਾਅ ਲੈਣ ਲਈ 3 ਮਾਧਿਅਮ ਹੋਣਗੇ। ਇਸ ‘ਚ ਲੋਕ ਨਮੋ ਐਪ ‘ਤੇ ਜਾ ਕੇ ਸੁਝਾਅ ਦੇ ਸਕਣਗੇ। ਇਸ ਤੋਂ ਇਲਾਵਾ ਇੱਕ ਸੁਝਾਅ ਬਾਕਸ ਰੱਖਿਆ ਜਾਵੇਗਾ।ਇਸ ਤੋਂ ਇਲਾਵਾ ਇੱਕ ਫੋਨ ਨੰਬਰ ਹੋਵੇਗਾ ਜਿਸ ‘ਤੇ ਲੋਕਾਂ ਨੂੰ ਮਿਸ ਕਾਲ ਕਰਨੀ ਹੋਵੇਗੀ। ਜਲਦੀ ਹੀ ਲੋਕਾਂ ਦੇ ਸੁਝਾਅ ਲੈ ਕੇ ਨੈਸ਼ਨਲ ਕਮੇਟੀ ਨੂੰ ਭੇਜੇ ਜਾਣਗੇ।