ਇਜ਼ਰਾਇਲੀ ਫੌਜ ਨੇ ਇਕ ਵਾਰ ਫਿਰ ਖਾਣਾ ਲੈਣ ਆਏ ਫਲਸਤੀਨੀਆਂ ‘ਤੇ ਗੋਲੀਬਾਰੀ ਕੀਤੀ ਹੈ। ਤਾਜ਼ਾ ਹਮਲੇ ‘ਚ 19 ਲੋਕਾਂ ਦੀ ਮੌਤ ਹੋ ਗਈ । ਅਮਰੀਕੀ ਮੀਡੀਆ ਸੀਐਨਐਨ ਦੀ ਰਿਪੋਰਟ ਮੁਤਾਬਕ ਗਾਜ਼ਾ ਸ਼ਹਿਰ ਦੇ ਅਲ-ਕੁਵੈਤ ਏਡ ਪੁਆਇੰਟ ‘ਤੇ ਭੁੱਖਮਰੀ ਨਾਲ ਜੂਝ ਰਹੇ ਸੈਂਕੜੇ ਫਲਸਤੀਨੀ ਆਟਾ ਲੈਣ ਲਈ ਲਾਈਨ ‘ਚ ਖੜ੍ਹੇ ਸਨ। ਫਿਰ ਇਜ਼ਰਾਈਲੀ ਸੈਨਿਕਾਂ ਨੇ ਮਸ਼ੀਨਗੰਨਾਂ ਨਾਲ ਗੋਲੀਬਾਰੀ ਸ਼ੁਰੂ ਕਰ ਦਿੱਤੀ।
ਉਧਰ ਇਜ਼ਰਾਈਲ ਨੇ ਇਸ ਖਬਰ ਨੂੰ ਖਾਰਜ ਕਰ ਦਿੱਤਾ ਹੈ। ਇਜ਼ਰਾਇਲੀ ਫੌਜ ਦਾ ਕਹਿਣਾ ਹੈ ਕਿ ਫੌਜੀਆਂ ਨੇ ਖਾਣਾ ਲੈਣ ਆਏ ਫਲਸਤੀਨੀਆਂ ‘ਤੇ ਹਮਲਾ ਨਹੀਂ ਕੀਤਾ। ਇਜ਼ਰਾਈਲ ਪਹਿਲਾਂ ਵੀ ਕਈ ਵਾਰ ਰਾਹਤ ਸਮੱਗਰੀ ਇਕੱਠੀ ਕਰਨ ਆਏ ਫਲਸਤੀਨੀਆਂ ‘ਤੇ ਹਮਲੇ ਕਰ ਚੁੱਕਾ ਹੈ। ਇਨ੍ਹਾਂ ਹਮਲਿਆਂ ਵਿੱਚ ਹੁਣ ਤੱਕ 400 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ।
ਦੱਸ ਦਈਏ ਕਿ 13 ਮਾਰਚ ਨੂੰ ਇਜ਼ਰਾਈਲ ਨੇ ਗਾਜ਼ਾ ਦੇ ਅਲ-ਨੁਸੀਰਤ ਕੈਂਪ ਨੇੜੇ ਸਹਾਇਤਾ ਵੰਡ ਕੇਂਦਰ ‘ਤੇ ਹਵਾਈ ਹਮਲਾ ਕੀਤਾ ਸੀ। ਇਸ ਦੌਰਾਨ 8 ਲੋਕਾਂ ਦੀ ਮੌਤ ਹੋ ਗਈ ਸੀ। ਇਸ ਦੇ ਨਾਲ ਹੀ ਇਜ਼ਰਾਇਲੀ ਸੈਨਿਕਾਂ ਨੇ ਉੱਤਰੀ ਗਾਜ਼ਾ ‘ਚ ਇਕ ਸਹਾਇਤਾ ਸਥਾਨ ‘ਤੇ ਭੋਜਨ ਲੈਣ ਆਏ ਫਲਸਤੀਨੀਆਂ ‘ਤੇ ਗੋਲੀਆਂ ਚਲਾ ਦਿੱਤੀਆਂ। ਇਸ ਦੌਰਾਨ 21 ਲੋਕ ਮਾਰੇ ਗਏ ਸਨ। ਸਮਾਚਾਰ ਏਜੰਸੀ ਰਾਇਟਰਸ ਮੁਤਾਬਕ ਦੋਹਾਂ ਹਮਲਿਆਂ ਵਿਚ ਕੁਲ 29 ਫਲਸਤੀਨੀ ਮਾਰੇ ਗਏ।
