ਦੱਖਣੀ ਭਾਰਤੀ ਫਿਲਮਾਂ ਦੇ ਮਸ਼ਹੂਰ ਅਦਾਕਾਰ ਡੇਨੀਅਲ ਬਾਲਾਜੀ ਦਾ ਦੇਹਾਂਤ ਹੋ ਗਿਆ ਹੈ। 48 ਸਾਲਾ ਅਦਾਕਾਰ ਨੂੰ ਸੀਨੇ ਵਿੱਚ ਦਰਦ ਦੀ ਸ਼ਿਕਾਇਤ ਤੋਂ ਬਾਅਦ ਬੀਤੇ ਸ਼ੁੱਕਰਵਾਰ ਸਵੇਰੇ ਹਸਪਤਾਲ ਵਿੱਚ ਭਰਤੀ ਕਰਵਾਇਆ ਗਿਆ ਸੀ। ਇਲਾਜ ਦੌਰਾਨ ਉਨ੍ਹਾਂ ਨੂੰ ਦਿਲ ਦਾ ਦੌਰਾ ਪਿਆ, ਜਿਸ ਤੋਂ ਬਾਅਦ ਉਨ੍ਹਾਂ ਨੂੰ ਬਚਾਇਆ ਨਹੀਂ ਜਾ ਸਕਿਆ। ਦੱਖਣ ਇੰਡਸਟਰੀ ਦੇ ਕਈ ਵੱਡੇ ਕਲਾਕਾਰਾਂ ਨੇ ਅਦਾਕਾਰ ਦੇ ਦੇਹਾਂਤ ‘ਤੇ ਦੁੱਖ ਪ੍ਰਗਟ ਕੀਤਾ ਹੈ।
ਦੱਸ ਦਈਏ ਕਿ ਡੇਨੀਅਲ ਦਾ ਅੰਤਿਮ ਸੰਸਕਾਰ ਉਨ੍ਹਾਂ ਦੇ ਪੁਰਸਾਈਵਲਕਮ ਨਿਵਾਸ ‘ਤੇ ਕੀਤਾ ਗਿਆ। ਵਿਜੇ ਸੇਤੂਪਤੀ ਸਮੇਤ ਤਾਮਿਲ ਫਿਲਮ ਇੰਡਸਟਰੀ ਦੇ ਕਈ ਵੱਡੇ ਕਲਾਕਾਰ ਅਭਿਨੇਤਾ ਨੂੰ ਅੰਤਿਮ ਸ਼ਰਧਾਂਜਲੀ ਦੇਣ ਪਹੁੰਚੇ। ਜ਼ਿਕਰਯੋਗ ਹੈ ਕਿ ਬਾਲਾਜੀ ਨੇ ਆਪਣੇ ਕਰੀਅਰ ਦੀ ਸ਼ੁਰੂਆਤ ਕਮਲ ਹਾਸਨ ਦੀ ਫਿਲਮ ‘ਮਰੁਧਨਯਾਗਮ’ ਨਾਲ ਕੀਤੀ ਸੀ, ਜੋ ਕਦੇ ਰਿਲੀਜ਼ ਨਹੀਂ ਹੋਈ ਸੀ। ਇਸ ਫਿਲਮ ਤੋਂ ਇਲਾਵਾ ਬਾਲਾਜੀ ਵੇਟਾਇਯਾਡੂ ਵਿਲੈਯਾਡੂ’, ‘ਪੋਲਾਧਵਮ’ ਅਤੇ ‘ਵਾਡਾ ਚੇਨਈ’ ਵਰਗੀਆਂ ਫਿਲਮਾਂ ‘ਚ ਨਜ਼ਰ ਆਏ ਸਨ।
ਇਸਤੋਂ ਬਾਅਦ ਉਹਨਾਂ ਨੇ ਟੈਲੀਵਿਜ਼ਨ ਵੱਲ ਰੁਖ ਕੀਤਾ। ਟੀਵੀ ਸ਼ੋਅ ‘ਚਿੱਠੀ’ ਨਾਲ ਉਹ ਘਰ-ਘਰ ‘ਚ ਮਸ਼ਹੂਰ ਹੋ ਗਏ ਸੀ। ਆਪਣੇ 27 ਸਾਲ ਦੇ ਕਰੀਅਰ ਵਿੱਚ, ਡੈਨੀਅਲ ਨੇ ਕਮਲ ਹਾਸਨ, ਥਲਾਪਤੀ ਵਿਜੇ, ਸੂਰਿਆ ਅਤੇ ਧਨੁਸ਼ ਸਮੇਤ ਦੱਖਣੀ ਸਿਨੇਮਾ ਦੇ ਕਈ ਵੱਡੇ ਕਲਾਕਾਰਾਂ ਨਾਲ ਸਕ੍ਰੀਨ ਸ਼ੇਅਰ ਕੀਤੀ।
