ਨਵੀਂ ਦਿੱਲੀ, 7 ਮਈ 2024 – ਇੰਡੀਅਨ ਪ੍ਰੀਮੀਅਰ ਲੀਗ (IPL) 2024 ਦੇ 56ਵੇਂ ਮੈਚ ਵਿੱਚ ਅੱਜ ਦਿੱਲੀ ਕੈਪੀਟਲਜ਼ ਦਾ ਸਾਹਮਣਾ ਰਾਜਸਥਾਨ ਰਾਇਲਜ਼ ਨਾਲ ਹੋਵੇਗਾ। ਇਹ ਮੈਚ ਦਿੱਲੀ ਦੇ ਘਰੇਲੂ ਮੈਦਾਨ ਅਰੁਣ ਜੇਤਲੀ ਸਟੇਡੀਅਮ ‘ਚ ਸ਼ਾਮ 7:30 ਵਜੇ ਤੋਂ ਖੇਡਿਆ ਜਾਵੇਗਾ। ਟਾਸ ਸ਼ਾਮ 7 ਵਜੇ ਹੋਵੇਗਾ। ਇਸ ਸੀਜ਼ਨ ਵਿੱਚ ਡੀਸੀ ਅਤੇ ਆਰਆਰ ਵਿਚਾਲੇ ਇਹ ਦੂਜਾ ਮੈਚ ਹੋਵੇਗਾ। ਪਿਛਲੇ ਮੈਚ ਵਿੱਚ ਰਾਜਸਥਾਨ ਨੇ 12 ਦੌੜਾਂ ਨਾਲ ਜਿੱਤ ਦਰਜ ਕੀਤੀ ਸੀ।
ਅੱਜ ਆਰਆਰ ਦਾ ਇਸ ਸੀਜ਼ਨ ਦਾ 11ਵਾਂ ਮੈਚ ਹੋਵੇਗਾ। ਟੀਮ 10 ‘ਚੋਂ 8 ਜਿੱਤਣ ਅਤੇ 2 ਹਾਰ ਕੇ 16 ਅੰਕਾਂ ਨਾਲ ਅੰਕ ਸੂਚੀ ‘ਚ ਦੂਜੇ ਸਥਾਨ ‘ਤੇ ਹੈ। ਦੂਜੇ ਪਾਸੇ, ਡੀਸੀ ਦਾ ਸੀਜ਼ਨ ਵਿੱਚ 12ਵਾਂ ਮੈਚ ਹੋਵੇਗਾ। ਡੀਸੀ 11 ਵਿੱਚੋਂ 5 ਜਿੱਤਾਂ ਅਤੇ 6 ਹਾਰਾਂ ਦੇ ਬਾਅਦ 10 ਅੰਕਾਂ ਨਾਲ ਛੇਵੇਂ ਸਥਾਨ ‘ਤੇ ਹੈ।
ਰਾਜਸਥਾਨ ਅਤੇ ਦਿੱਲੀ ਵਿਚਾਲੇ IPL ‘ਚ ਹੁਣ ਤੱਕ 28 ਮੈਚ ਖੇਡੇ ਜਾ ਚੁੱਕੇ ਹਨ। ਦਿੱਲੀ ਨੇ 13 ਅਤੇ ਰਾਜਸਥਾਨ ਨੇ 15 ਜਿੱਤੇ ਹਨ। ਦਿੱਲੀ ਦੇ ਘਰੇਲੂ ਮੈਦਾਨ ਅਰੁਣ ਜੇਤਲੀ ਸਟੇਡੀਅਮ ‘ਚ ਦੋਵਾਂ ਟੀਮਾਂ ਵਿਚਾਲੇ ਹੁਣ ਤੱਕ 8 ਮੈਚ ਖੇਡੇ ਜਾ ਚੁੱਕੇ ਹਨ। ਡੀਸੀ ਨੇ 5 ਅਤੇ ਆਰਆਰ ਨੇ 3 ਜਿੱਤੇ। ਦੋਵੇਂ ਟੀਮਾਂ ਆਖਰੀ ਵਾਰ ਇੱਥੇ 2019 ਵਿੱਚ ਆਈਆਂ ਸਨ। ਉਦੋਂ ਦਿੱਲੀ ਜਿੱਤ ਗਈ ਸੀ। ਰਾਜਸਥਾਨ ਨੇ ਆਖਰੀ ਵਾਰ ਇੱਥੇ 2015 ਵਿੱਚ ਮੈਚ ਜਿੱਤਿਆ ਸੀ। ਇਸ ਤੋਂ ਬਾਅਦ ਦੋ ਮੈਚ ਖੇਡੇ ਗਏ ਅਤੇ ਦੋਵੇਂ ਹੀ ਦਿੱਲੀ ਨੇ ਜਿੱਤੇ।
