‘ਗਦਰ 2’ ਤੋਂ ਬਾਅਦ ਸੰਨੀ ਦਿਓਲ ਦੀ ਫਿਲਮ ‘ਬਾਰਡਰ’ ਦਾ ਦੂਜਾ ਭਾਗ ਵੀ ਕਾਫੀ ਚਰਚਾ ਚ ਬਣਿਆ ਹੋਇਆ ਹੈ। ਪਰ ਹੁਣ ਆਖਿਰਕਾਰ ਮੇਕਰਸ ਨੇ ਸੰਨੀ ਦਿਓਲ ਨਾਲ ‘ਬਾਰਡਰ 2’ ਦਾ ਅਧਿਕਾਰਤ ਐਲਾਨ ਕਰ ਦਿੱਤਾ ਹੈ।
ਸੰਨੀ ਦਿਓਲ ਨੇ ਆਪਣੇ ਸੋਸ਼ਲ ਮੀਡੀਆ ਅਕਾਊਂਟ ‘ਤੇ ‘ਬਾਰਡਰ 2’ ਦਾ ਐਲਾਨ ਕਰਦਿਆਂ ਇਕ ਕਲਿੱਪ ਸ਼ੇਅਰ ਕੀਤੀ ਹੈ, ਜਿਸ ‘ਚ ਅਭਿਨੇਤਾ ਆਪਣੀ ਜ਼ਬਰਦਸਤ ਆਵਾਜ਼ ‘ਚ ਆਪਣਾ 27 ਸਾਲ ਪੁਰਾਣਾ ਵਾਅਦਾ ਪੂਰਾ ਕਰਨ ਦੀ ਗੱਲ ਕਰ ਰਹੇ ਹਨ।
ਸੰਨੀ ਦਿਓਲ ਨੇ ਹਾਲ ਹੀ ‘ਚ ਆਪਣੇ ਅਧਿਕਾਰਤ ਇੰਸਟਾਗ੍ਰਾਮ ‘ਤੇ ਇਕ ਵੀਡੀਓ ਸ਼ੇਅਰ ਕੀਤੀ ਹੈ। ਜਿਸ ‘ਚ ਕਿਸੇ ਵੀ ਤਰ੍ਹਾਂ ਦਾ ਕੋਈ ਵਿਜ਼ੂਅਲ ਨਹੀਂ ਹੈ, ਬੈਕਗ੍ਰਾਊਂਡ ‘ਚ ਸਿਰਫ ਸੰਨੀ ਦਿਓਲ ਦੀ ਆਵਾਜ਼ ਸੁਣਾਈ ਦਿੰਦੀ ਹੈ। ਵੀਡੀਓ ‘ਚ ਸੰਨੀ ਇਹ ਕਹਿੰਦੇ ਹੋਏ ਸੁਣਾਈ ਦੇ ਰਹੇ ਹਨ ਕਿ ” ’27 ਸਾਲ ਪਹਿਲਾਂ ਇਕ ਫੌਜੀ ਨੇ ਵਾਅਦਾ ਕੀਤਾ ਸੀ ਕਿ ਉਹ ਵਾਪਸ ਆਵੇਗਾ। ਉਸੇ ਵਾਅਦੇ ਨੂੰ ਪੂਰਾ ਕਰਨ ਲਈ, ਭਾਰਤ ਦੀ ਮਿੱਟੀ ਨੂੰ ਸਲਾਮ ਕਹਿਣ ਲਈ, ਮੈਂ ਦੁਬਾਰਾ ਆ ਰਿਹਾ ਹਾਂ!’ ਫਿਰ ਬੈਕਗ੍ਰਾਊਂਡ ਵਿੱਚ ਕਲਟ ਕਲਾਸਿਕ ਬਾਰਡਰ ਦਾ ਗੀਤ ‘ਸੰਦੇਸ਼ ਆਤੇ ਹੈਂ…’ ਵੀ ਸੁਣਾਈ ਦਿੰਦਾ ਹੈ।
ਬਾਰਡਰ- 2 ਨੂੰ ਭੂਸ਼ਣ ਕੁਮਾਰ, ਕ੍ਰਿਸ਼ਨ ਕੁਮਾਰ, ਜੇਪੀ ਦੱਤਾ ਅਤੇ ਨਿਧੀ ਦੱਤਾ ਦੁਆਰਾ ਬਣਾਇਆ ਜਾ ਰਿਹਾ ਹੈ। ਫਿਲਮ ਦੇ ਨਿਰਦੇਸ਼ਨ ਦੀ ਜ਼ਿੰਮੇਵਾਰੀ ਅਨੁਰਾਗ ਸਿੰਘ ਨੇ ਲਈ ਹੈ। ‘ਬਾਰਡਰ-2’ ਕਦੋਂ ਰਿਲੀਜ਼ ਹੋਵੇਗੀ, ਇਸ ਬਾਰੇ ਅਜੇ ਕੋਈ ਜਾਣਕਾਰੀ ਸਾਹਮਣੇ ਨਹੀਂ ਆਈ ਹੈ। ‘ਬਾਰਡਰ 2’ ਦੀ ਸ਼ੂਟਿੰਗ ਅਕਤੂਬਰ ਤੋਂ ਸ਼ੁਰੂ ਹੋਣ ਜਾ ਰਹੀ ਹੈ।