ਓਮਾਨ ਵਿੱਚ ਇੱਕ ਮਸਜਿਦ ਨੇੜੇ ਗੋਲੀਬਾਰੀ ਵਿੱਚ 4 ਲੋਕਾਂ ਦੀ ਮੌਤ ਹੋ ਗਈ ਹੈ। ਉੱਥੇ ਕਈ ਲੋਕ ਜ਼ਖਮੀ ਹੋਏ ਹਨ। ਗੋਲੀਬਾਰੀ ਮੰਗਲਵਾਰ ਸਵੇਰੇ ਓਮਾਨ ਦੀ ਰਾਜਧਾਨੀ ਮਸਕਟ ਵਿੱਚ ਵਾਦੀ ਅਲ-ਕਬੀਰ ਮਸਜਿਦ ਦੇ ਨੇੜੇ ਹੋਈ। ਅਲ ਜਜ਼ੀਰਾ ਮੁਤਾਬਕ ਮਸਜਿਦ ‘ਚ ਸ਼ੀਆ ਨਾਲ ਸਬੰਧਤ ਇਕ ਧਾਰਮਿਕ ਪ੍ਰੋਗਰਾਮ ਹੋ ਰਿਹਾ ਸੀ।
ਨਾਲ ਹੀ ਓਮਾਨ ਦੀ ਪੁਲਿਸ ਨੇ ਕਿਹਾ ਹੈ ਕਿ ਖੇਤਰ ਵਿੱਚ ਸੁਰੱਖਿਆ ਵਧਾਉਣ ਲਈ ਸਾਰੇ ਜ਼ਰੂਰੀ ਕਦਮ ਚੁੱਕੇ ਗਏ ਹਨ। ਫਿਲਹਾਲ ਹਮਲਾ ਕਿਸ ਨੇ ਕੀਤਾ, ਇਸ ਬਾਰੇ ਜਾਣਕਾਰੀ ਸਾਹਮਣੇ ਨਹੀਂ ਆਈ ਹੈ। ਹਮਲੇ ਨਾਲ ਸਬੰਧਤ ਕਈ ਵੀਡੀਓਜ਼ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋ ਰਹੇ ਹਨ। ਵੀਡੀਓ ਮੁਤਾਬਕ ਗੋਲੀਬਾਰੀ ਸ਼ੁਰੂ ਹੁੰਦੇ ਹੀ ਮਸਜਿਦ ‘ਚ ਹਫੜਾ-ਦਫੜੀ ਮਚ ਗਈ। ਲੋਕਾਂ ਨੇ ਨੇੜਲੇ ਇਮਾਮ ਅਲੀ ਮਸਜਿਦ ਵਿੱਚ ਸ਼ਰਨ ਲਈ।
ਦੱਸ ਦਈਏ ਅਲਜਜ਼ੀਰਾ ਮੁਤਾਬਕ ਹਮਲੇ ‘ਚ ਕੁਝ ਪਾਕਿਸਤਾਨੀ ਨਾਗਰਿਕ ਵੀ ਜ਼ਖਮੀ ਹੋਏ ਹਨ। ਪਾਕਿਸਤਾਨ ਦੇ ਰਾਜਦੂਤ ਨੇ ਵੀ ਹਸਪਤਾਲ ਪਹੁੰਚ ਕੇ ਉਨ੍ਹਾਂ ਨਾਲ ਮੁਲਾਕਾਤ ਕੀਤੀ। ਮਸਕਟ ਸਥਿਤ ਅਮਰੀਕੀ ਦੂਤਾਵਾਸ ਨੇ ਆਪਣੇ ਨਾਗਰਿਕਾਂ ਨੂੰ ਚੌਕਸ ਰਹਿਣ ਦੀ ਸਲਾਹ ਦਿੱਤੀ ਹੈ।
ਓਮਾਨ ਨੂੰ ਮੱਧ ਪੂਰਬ ਦਾ ਵਿਚੋਲਾ ਕਿਹਾ ਜਾਂਦਾ ਹੈ। ਉਹ ਅਕਸਰ ਸੰਧੀਆਂ ਕਰਨ ਅਤੇ ਤਣਾਅ ਦੀਆਂ ਸਥਿਤੀਆਂ ਵਿੱਚ ਦੇਸ਼ਾਂ ਵਿਚਕਾਰ ਸੰਤੁਲਨ ਬਣਾਈ ਰੱਖਣ ਲਈ ਕੰਮ ਕਰਦਾ ਹੈ। ਓਮਾਨ ਵਿੱਚ ਅਪਰਾਧ ਦਰ ਬਹੁਤ ਘੱਟ ਹੈ। ਆਮ ਤੌਰ ‘ਤੇ ਇੱਥੇ ਅਜਿਹੇ ਹਮਲੇ ਨਹੀਂ ਹੁੰਦੇ।
ਓਮਾਨ ‘ਚ ਸ਼ੀਆ ਮੁਸਲਮਾਨ ਮੰਗਲਵਾਰ ਨੂੰ ‘ਆਸ਼ੂਰਾ’ ਮਨਾ ਰਹੇ ਸਨ। ਇਸ ਦਿਨ ਸ਼ੀਆ 7ਵੀਂ ਸਦੀ ਵਿੱਚ ਪੈਗੰਬਰ ਮੁਹੰਮਦ ਦੇ ਪੋਤੇ ਇਮਾਮ ਹੁਸੈਨ ਦੀ ਲੜਾਈ ਵਿੱਚ ਹੋਈ ਸ਼ਹਾਦਤ ਨੂੰ ਯਾਦ ਕਰਦੇ ਹਨ। ਬਹੁਤ ਸਾਰੇ ਸ਼ੀਆ ਮੁਸਲਮਾਨ ਇਸ ਦਿਨ ਇਰਾਕ ਵਿੱਚ ਇਮਾਮ ਹੁਸੈਨ ਦੀ ਦਰਗਾਹ ‘ਤੇ ਜਾਂਦੇ ਹਨ। ਉਹ ਵੀ ਵਰਤ ਰੱਖਦੇ ਹਨ। ਓਮਾਨ ਦੀ 86% ਆਬਾਦੀ ਮੁਸਲਿਮ ਹੈ। ਇਹਨਾਂ ਵਿੱਚੋਂ 45% ਸੁੰਨੀ ਮੁਸਲਮਾਨ ਅਤੇ 45% ਇਬਾਦੀ ਮੁਸਲਮਾਨ ਹਨ। ਦੇਸ਼ ਦੀ ਆਬਾਦੀ ਦਾ 5% ਸ਼ੀਆ ਹਨ।
