ਅਯੁੱਧਿਆ ‘ਚ ਰਾਮਲਲਾ ਦੀ ਪੂਜਾ ਕਰਨ ਵਾਲੇ ਪੁਜਾਰੀਆਂ ਲਈ ਡਰੈੱਸ ਕੋਡ ਲਾਗੂ ਕੀਤਾ ਗਿਆ ਹੈ। ਰਾਮ ਮੰਦਰ ਦੇ ਪੁਜਾਰੀ ਹੁਣ ਚਿੱਟੀ ਧੋਤੀ ਅਤੇ ਪੀਲੀ ਚੌਬੰਦੀ ਵਿੱਚ ਨਜ਼ਰ ਆਉਣਗੇ। ਟਰੱਸਟ ਵੱਲੋਂ ਜਲਦੀ ਹੀ ਸਾਰੇ ਪੁਜਾਰੀਆਂ ਨੂੰ ਕੱਪੜੇ ਮੁਹੱਈਆ ਕਰਵਾਏ ਜਾਣਗੇ। ਨਾਲ ਹੀ ਰਾਮਲਲਾ ਦੀ ਪੂਜਾ ਕਰਨ ਵਾਲੇ ਸਾਰੇ 25 ਪੁਜਾਰੀਆਂ ਨੂੰ ਰਾਮ ਮੰਦਰ ਟਰੱਸਟ ਵੱਲੋਂ ਕੀਪੈਡ ਫੋਨ ਦਿੱਤੇ ਗਏ ਹਨ। ਹੁਣ ਰਾਮ ਮੰਦਰ ‘ਚ ਪੁਜਾਰੀ ਸਿਰਫ਼ ਕੀਪੈਡ ਫ਼ੋਨ ਹੀ ਵਰਤ ਸਕਣਗੇ। ਐਂਡ੍ਰਾਇਡ ਫੋਨ ਦੀ ਵਰਤੋਂ ‘ਤੇ ਪਾਬੰਦੀ ਲਗਾ ਦਿੱਤੀ ਗਈ ਹੈ।
ਸ਼ੁੱਕਰਵਾਰ ਨੂੰ ਰਾਮ ਮੰਦਰ ਟਰੱਸਟ ਦੇ ਜਨਰਲ ਸਕੱਤਰ ਚੰਪਤ ਰਾਏ ਨੇ ਨਵੇਂ ਪੁਜਾਰੀਆਂ ਨਾਲ ਮੀਟਿੰਗ ਕੀਤੀ ਅਤੇ ਉਨ੍ਹਾਂ ਨੂੰ ਰਾਮ ਮੰਦਰ ਦੀ ਰਹਿਤ ਮਰਯਾਦਾ ਬਾਰੇ ਜਾਣੂ ਕਰਵਾਇਆ। ਇਸ ਸਿਲਸਿਲੇ ‘ਚ ਡਰੈੱਸ ਕੋਡ ਵੀ ਲਾਗੂ ਕੀਤਾ ਗਿਆ ਹੈ। ਮੰਦਰ ਵਿੱਚ ਫੋਟੋਗ੍ਰਾਫੀ ਅਤੇ ਵੀਡੀਓ ਬਣਾਉਣ ਦੀ ਵੀ ਸਖਤ ਮਨਾਹੀ ਹੈ।
ਪੁਜਾਰੀਆਂ ਨੂੰ ਰਾਮ ਮੰਦਰ ‘ਚ ਪੂਜਾ ਸੇਵਾ ਕਰਨ ਲਈ ਤੈਅ ਕੀਤੇ ਗਏ ਰੋਸਟਰ ਬਾਰੇ ਵੀ ਜਾਣਕਾਰੀ ਦਿੱਤੀ ਗਈ ਹੈ। ਸਾਰੇ ਪੁਜਾਰੀਆਂ ਨੂੰ ਜਾਰੀ ਕੀਤੇ ਗਏ ਰੋਸਟਰ ਦੀ ਕਾਪੀ ਮੁਹੱਈਆ ਕਰਵਾਈ ਗਈ ਹੈ। ਨਵੇਂ ਪੁਜਾਰੀ ਪੁਰਾਣੇ ਪੁਜਾਰੀਆਂ ਦੇ ਨਾਲ ਰੋਸਟਰ ਅਨੁਸਾਰ ਪੂਜਾ ਕਰਨਗੇ।