‘ਜੈ ਸੰਤੋਸ਼ੀ ਮਾਂ’ ਵਰਗੀਆਂ ਬਲਾਕਬਸਟਰ ਫਿਲਮਾਂ ਬਣਾਉਣ ਵਾਲੇ ਨਿਰਮਾਤਾ ਦਾਦਾ ਸਤਰਾਮ ਰੋਹੜਾ ਦਾ ਦੇਹਾਂਤ ਹੋ ਗਿਆ ਹੈ। ਉਨ੍ਹਾਂ ਨੇ 18 ਜੁਲਾਈ ਨੂੰ 85 ਸਾਲ ਦੀ ਉਮਰ ‘ਚ ਆਖਰੀ ਸਾਹ ਲਿਆ। 1975 ਵਿੱਚ ਰਿਲੀਜ਼ ਹੋਈ ‘ਜੈ ਸੰਤੋਸ਼ੀ ਮਾਂ’ ਭਾਰਤ ਦੀਆਂ ਸਭ ਤੋਂ ਵੱਡੀਆਂ ਬਲਾਕਬਸਟਰ ਫਿਲਮਾਂ ਵਿੱਚੋਂ ਇੱਕ ਰਹੀ ਹੈ।
ਸਤਰਾਮ ਰੋਹੜਾ ਦੇ ਦੇਹਾਂਤ ਦੀ ਜਾਣਕਾਰੀ ‘ਰੇਡੀਓ ਸਿੰਧੀ’ ਦੇ ਇੰਸਟਾਗ੍ਰਾਮ ਪੇਜ ‘ਤੇ ਸਾਂਝੀ ਕੀਤੀ ਗਈ ਹੈ। ਸ਼ੇਅਰ ਕੀਤੀ ਪੋਸਟ ਵਿੱਚ ਲਿਖਿਆ ਹੈ ਕਿ – ਸਾਨੂੰ ਇਹ ਦੱਸਦੇ ਹੋਏ ਬਹੁਤ ਦੁੱਖ ਹੋ ਰਿਹਾ ਹੈ ਕਿ ਮਸ਼ਹੂਰ ਗਾਇਕ ਅਤੇ ਫਿਲਮ ਨਿਰਮਾਤਾ ਦਾਦਾ ਸਤਰਾਮ ਰੋਹੜਾ ਦਾ 18 ਜੁਲਾਈ 2024 ਨੂੰ ਦਿਹਾਂਤ ਹੋ ਗਿਆ। ਉਨ੍ਹਾਂ ਦੀ ਮਹਾਨ ਆਤਮਾ ਨੂੰ ਸ਼ਾਂਤੀ ਮਿਲੇ ਅਤੇ ਇਸ ਔਖੀ ਘੜੀ ਵਿੱਚ ਉਨ੍ਹਾਂ ਦੇ ਪਰਿਵਾਰ ਨੂੰ ਬਲ ਬਖਸ਼ੇ। ਦਾਦਾ ਸਤਰਾਮ ਰੋਹੜਾ ਨੇ ਦਾਦਾ ਰਾਮ ਪੰਜਵਾਨੀ, ਭਾਗਵੰਤੀ ਨਾਵਾਨੀ, ਕਮਲਾ ਕੇਸਵਾਨੀ ਅਤੇ ਹੋਰ ਕਈ ਮਸ਼ਹੂਰ ਗਾਇਕਾਂ ਨਾਲ ਕਈ ਸੁਪਰਹਿੱਟ ਗੀਤ ਦਿੱਤੇ।ਦਾਦਾ ਸਤਰਾਮ ਰੋਹੜਾ ਦਾ ਦੇਹਾਂਤ ਸਿੰਧੀ ਭਾਈਚਾਰੇ ਲਈ ਬਹੁਤ ਵੱਡਾ ਘਾਟਾ ਹੈ ਅਤੇ ਕੋਈ ਵੀ ਉਨ੍ਹਾਂ ਦੀ ਕਮੀ ਨੂੰ ਪੂਰਾ ਨਹੀਂ ਸਕਦਾ।”
ਉਨ੍ਹਾਂ ਨੇ 1966 ‘ਚ ਫਿਲਮ ‘ਸ਼ੇਰਾ ਡਾਕੂ’ ਰਾਹੀਂ ਨਿਰਮਾਣ ਦੀ ਦੁਨੀਆ ‘ਚ ਕਦਮ ਰੱਖਿਆ। ਇਸ ਤੋਂ ਬਾਅਦ ਉਨ੍ਹਾਂ ਨੇ ‘ਰੌਕੀ ਮੇਰਾ ਨਾਮ’, ‘ਘਰ ਕੀ ਲਾਜ’, ‘ਨਵਾਬ ਸਾਹਿਬ’ ਅਤੇ ‘ਜੈ ਕਾਲੀ’ ਵਰਗੀਆਂ ਫਿਲਮਾਂ ਦਾ ਨਿਰਮਾਣ ਕੀਤਾ। ਇਸ ਦੇ ਨਾਲ ਹੀ ਸਾਲ 1975 ‘ਚ ਰਿਲੀਜ਼ ਹੋਈ ਫਿਲਮ ‘ਜੈ ਸੰਤੋਸ਼ੀ ਮਾਂ’ ਬਲਾਕਬਸਟਰ ਫਿਲਮ ਸਾਬਤ ਹੋਈ। ਦੱਸਿਆ ਜਾਂਦਾ ਹੈ ਕਿ ‘ਜੈ ਸੰਤੋਸ਼ੀ ਮਾਂ’ ਨੇ ਥੀਏਟਰ ‘ਚ ਅਜਿਹੇ ਰਿਕਾਰਡ ਬਣਾਏ ਜੋ ਅੱਜ ਤੱਕ ਕੋਈ ਹੋਰ ਫਿਲਮ ਨਹੀਂ ਬਣਾ ਸਕੀ। ਖਬਰਾਂ ਮੁਤਾਬਕ ‘ਜੈ ਸੰਤੋਸ਼ੀ ਮਾਂ’ ਦਾ ਬਜਟ ਸਿਰਫ 5 ਲੱਖ ਰੁਪਏ ਸੀ ਪਰ ਉਸ ਸਮੇਂ ਇਸ ਨੇ ਕਰੀਬ 5 ਕਰੋੜ ਰੁਪਏ ਦੀ ਕਮਾਈ ਕੀਤੀ ਸੀ, ਜੋ ਅੱਜ ਦੇ ਮੁਕਾਬਲੇ 100 ਗੁਣਾ ਜ਼ਿਆਦਾ ਹੈ।