ਭਾਰਤੀ ਰੇਲਵੇ ਨੇ ਦੇਸ਼ ਦੀ ਪਹਿਲੀ ਵੰਦੇ ਮੈਟਰੋ ਲਈ ਨਵਾਂ ਨਾਂ ਸੋਚਿਆ ਹੈ। ਜੇਕਰ ਤੁਸੀਂ ਵੀ ਜਾਣਨਾ ਚਾਹੁੰਦੇ ਹੋ ਕਿ ਵੰਦੇ ਮੈਟਰੋ ਨੂੰ ਕਿਸ ਨਾਂ ਨਾਲ ਬੁਲਾਇਆ ਜਾਵੇਗਾ, ਤਾਂ ਜਾਣ ਲਓ ਕਿ ਇਸ ਦਾ ਨਾਂ ‘ਨਮੋ ਭਾਰਤ ਰੈਪਿਡ ਰੇਲ’ ਰੱਖਿਆ ਗਿਆ ਹੈ। ਇਹ ਜਾਣਕਾਰੀ ਭਾਰਤੀ ਰੇਲਵੇ ਤੋਂ ਮਿਲੀ ਹੈ। ਅੱਜ, ਸੋਮਵਾਰ, 16 ਸਤੰਬਰ ਨੂੰ ਪ੍ਰਧਾਨ ਮੰਤਰੀ ਮੋਦੀ ਭੁਜ ਅਤੇ ਅਹਿਮਦਾਬਾਦ ਦੇ ਵਿਚਕਾਰ ਦੇਸ਼ ਦੀ ਪਹਿਲੀ ਵੰਦੇ ਮੈਟਰੋ ਟਰੇਨ (ਨਮੋ ਭਾਰਤ ਰੈਪਿਡ ਰੇਲ) ਅਤੇ ਕੁਝ ਹੋਰ ਵੰਦੇ ਭਾਰਤ ਟਰੇਨਾਂ ਨੂੰ ਹਰੀ ਝੰਡੀ ਦਿਖਾਉਣਗੇ। ਇਸ ਦੇ ਲਈ ਪੀਐਮ ਮੋਦੀ ਐਤਵਾਰ ਸ਼ਾਮ ਨੂੰ ਅਹਿਮਦਾਬਾਦ ਪਹੁੰਚ ਗਏ ਹਨ।
ਭੁਜ-ਅਹਿਮਦਾਬਾਦ ਵਿਚਕਾਰ ਚੱਲਣ ਵਾਲੀ ਵੰਦੇ ਮੈਟਰੋ ਟਰੇਨ, ਜੋ ਹੁਣ ਨਮੋ ਭਾਰਤ ਰੈਪਿਡ ਰੇਲ ਬਣ ਗਈ ਹੈ, ਦੇ ਨੰਬਰ 94802 ਅਤੇ 94801 ਹੋਣਗੇ। ਇਹ ਟਰੇਨ ਭੁਜ-ਅਹਿਮਦਾਬਾਦ ਦੀ ਦੂਰੀ 5 ਘੰਟੇ 45 ਮਿੰਟਾਂ ‘ਚ ਤੈਅ ਕਰ ਸਕਦੀ ਹੈ। ਵੰਦੇ ਮੈਟਰੋ ਟਰੇਨ ਦੇ ਯਾਤਰੀਆਂ ਲਈ, ਇਸਦੀ ਆਮ ਯਾਤਰਾ 17 ਸਤੰਬਰ ਤੋਂ ਅਹਿਮਦਾਬਾਦ ਤੋਂ ਸ਼ੁਰੂ ਹੋਣ ਜਾ ਰਹੀ ਹੈ। ਨਮੋ ਭਾਰਤ ਰੈਪਿਡ ਰੇਲ ਯਾਤਰਾ ਲਈ ਪ੍ਰਤੀ ਯਾਤਰੀ ਕਿਰਾਇਆ 455 ਰੁਪਏ ਤੈਅ ਕੀਤਾ ਗਿਆ ਹੈ। ਵੰਦੇ ਮੈਟਰੋ ਟਰੇਨ ਵਿੱਚ 12 ਕੋਚ ਹੋਣਗੇ ਜਿਸ ਵਿੱਚ 1150 ਯਾਤਰੀ ਸਫਰ ਕਰ ਸਕਣਗੇ।
