ਲਖਨਊ : – ਮਮਤਾ ਬੈਨਰਜੀ ਨੇ ਇਥੇ ਅਖਿਲੇਸ਼ ਯਾਦਵ ਲਈ ਲਖਨਊ ਵਿਖੇ ਚੋਣ ਪ੍ਰਚਾਰ ਕੀਤਾ| ਅਖਿਲੇਸ਼ ਯਾਦਵ ਨੇ ਲਖਨਊ ਵਿੱਚ ਬੰਗਾਲ ਦੀ ਮੁੱਖ ਮੰਤਰੀ ਮਮਤਾ ਬੈਨਰਜੀ ਨਾਲ ਸਾਂਝੀ ਪ੍ਰੈਸ ਕਾਨਫਰੰਸ ਕੀਤੀ। ਅਖਿਲੇਸ਼ ਨੇ ਕਿਹਾ ਕਿ ਦੀਦੀ ਨੇ ਬੰਗਾਲ ‘ਚ ਭਾਜਪਾ ਨੂੰ ਹਰਾਇਆ। ਦੀਦੀ ਦਿੱਲੀ ਤੋਂ ਇੱਥੇ ਆਈ ਸੀ, ਪਰ ਦਿੱਲੀ ਵਾਲੇ ਯੂਪੀ ਨਹੀਂ ਆਏ। ਇਸ ਦੌਰਾਨ ਮਮਤਾ ਬੈਨਰਜੀ ਨੇ ਕਿਹਾ ਕਿ ਜੇਕਰ ਯੋਗੀ ਆਏਗਾ ਤਾਂ ਸਾਨੂੰ ਸਾਰਿਆਂ ਨੂੰ ਖਾ ਜਾਵੇਗਾ। ਅਖਿਲੇਸ਼ ਯਾਦਵ ਦਾ ਧੰਨਵਾਦ ਕਰਦੇ ਹੋਏ ਮਮਤਾ ਬੈਨਰਜੀ ਨੇ ਕਿਹਾ ਕਿ ਤੁਸੀਂ ਜਯਾ ਬੱਚਨ ਅਤੇ ਕਿਰਨਮਯ ਨੰਦਾ ਨੂੰ ਬੰਗਾਲ ਭੇਜ ਕੇ ਸਾਡੇ ਲਈ ਪ੍ਰਚਾਰ ਕੀਤਾ ਸੀ।
ਇਸ ਤੋਂ ਬਾਅਦ ਉਨ੍ਹਾਂ ਨੇ ਭਾਜਪਾ ‘ਤੇ ਚੁਟਕੀ ਲੈਂਦਿਆਂ ਕਿਹਾ, ‘ਜਦੋਂ ਕੋਵਿਡ ‘ਚ ਲੋਕ ਮਰ ਰਹੇ ਸਨ, ਤਦ ਯੋਗੀ ਜੀ, ਤੁਸੀਂ ਯੂਪੀ ‘ਚ ਕਿੱਥੇ ਸੀ? ਤੁਹਾਨੂੰ ਉਨ੍ਹਾਂ ਲੋਕਾਂ ਦੇ ਪਰਿਵਾਰਾਂ ਤੋਂ ਮੁਆਫੀ ਮੰਗਣੀ ਚਾਹੀਦੀ ਹੈ ਜਿਨ੍ਹਾਂ ਦੀਆਂ ਲਾਸ਼ਾਂ ਤੁਸੀਂ ਗੰਗਾ ਵਿੱਚ ਵਹਾਉਣ ਲਈ ਮਜ਼ਬੂਰ ਕੀਤਾ? ਤੁਸੀਂ ਜਨਤਾ ਤੋਂ ਮੁਆਫੀ ਮੰਗੋ। ਮਮਤਾ ਨੇ ਕਿਹਾ- ਮੋਦੀ ਕਹਿੰਦੇ ਹਨ ਕਿ ਅਸੀਂ ਯੂਪੀ ਨੂੰ ਪੈਸਾ ਦਿੱਤਾ। ਮੋਦੀ ਜੀ ਤੁਸੀਂ ਆਪਣੀ ਜੇਬ ‘ਚੋਂ ਪੈਸੇ ਦਿੱਤੇ? ਇਹ ਸਾਰਾ ਪੈਸਾ ਰਾਜਾਂ ਤੋਂ ਆਉਂਦਾ ਹੈ। ਇਹ ਜਨਤਾ ਦਾ ਪੈਸਾ ਹੈ।