ਨੇਪਾਲ ਤਿੱਬਤ ‘ਚ ਆਏ ਹੜ੍ਹ ਵਿਚ ਮਰਨ ਵਾਲਿਆਂ ਦਾ ਅੰਕੜਾ 682 ਹੋ ਗਿਆ ਹੈ। ਲਗਭਗ 3000 ਲੋਕ ਅਜੇ ਵੀ ਲਾਪਤਾ ਹਨ। ਇਨ੍ਹਾਂ ਵਿਚ 287 ਭਾਰਤੀ ਵੀ ਸ਼ਾਮਲ ਹਨ। ਇਸ ਤਬਾਹੀ ਦੇ 3 ਦਿਨ ਬਾਅਦ ਗਲੇਸ਼ੀਅਰ ਟੁੱਟਣ ਦਾ ਵੀਡੀਓ ਸਾਹਮਣੇ ਆਇਆ ਹੈ।
ਨੇਪਾਲ ਵਿਚ ਹੜ੍ਹ ਦੌਰਾਨ ਭੋਟੇਕੋਸ਼ੀ ਇਲਾਕੇ ਤੋਂ ਇਕ ਬੈਂਕ ਦਾ ਲਾਕਰ ਵਹਿ ਕੇ ਕਈ ਕਿਲੋਮੀਟਰ ਦੂਰ ਪਹੁੰਚ ਗਿਆ। ਇਸ ਲਾਕਰ ਨੂੰ ਤੋੜ ਕੇ ਉਸ ਵਿਚ ਰੱਖੀ ਨਕਦੀ ਕੱਢਣ ਦੇ ਦੋਸ਼ ਵਿਚ ਪੁਲਿਸ ਨੇ 29 ਲੋਕਾਂ ਨੂੰ ਹਿਰਾਸਤ ਵਿਚ ਲਿਆ ਹੈ। ਪੁਲਿਸ ਮੁਤਾਬਕ ਲਾਕਰ ਹੜ੍ਹ ਵਿਚ ਵਹਿਣ ਦੇ ਬਾਅਦ ਧਾਦਿੰਗ ਦੇਬੇਲਖੁਖੋਲਾ ਕੋਲ ਮਿਲਿਆ ਸੀ। ਪੁਲਿਸ ਨੂੰ ਖਬਰ ਮਿਲੀ ਸੀ ਕਿ ਸਥਾਨਕ ਲੋਕਾਂ ਨੇ ਲਾਕਰ ਤੋੜ ਕੇ ਉਸ ਦੇ ਅੰਦਰ ਰੱਖਿਆ ਕੈਸ਼ ਕੱਢ ਲਿਆ ਹੈ। ਇਸ ਦੇ ਬਾਅਦ ਪੁਲਿਸ ਟੀਮ ਨੇ ਮੌਕੇ ‘ਤੇ ਪਹੁੰਚ ਕੇ ਜਾਂਚ ਸ਼ੁਰੂ ਕੀਤੀ।
ਸ਼ੁਰੂਆਤੀ ਤਲਾਸ਼ੀ ਵਿਚ ਪੁਲਿਸ ਨੇ ਹਿਰਾਸਤ ਵਿਚ ਲਏ ਗਏ ਲੋਕਾਂ ਕੋਲੋਂ 92.68 ਲੱਖ ਨੇਪਾਲੀ ਰੁਪਏ ਯਾਨੀ ਲਗਭਗ 57 ਲੱਖ ਰੁਪਏ ਬਰਾਮਦ ਕੀਤੇ। ਪੁਲਿਸ ਮੁਤਾਬਕ ਹਿਰਾਸਤ ਵਿਚ ਲਏ ਗਏ ਜ਼ਿਆਦਾਤਰ ਲੋਕ ਗਲਛੀ-4 ਦੇ ਮਸਤਾਨ ਦੇ ਰਹਿਣ ਵਾਲੇ ਹਨ। ਕੁਝ ਗਲਛੀ-6 ਦੇ ਆਦਮਘਾਟ ਤੇ ਸਿਧਲੇਕ-7 ਦੇ ਆਦਮਤਾਰ ਦੇ ਰਹਿਣ ਵਾਲੇ ਹਨ।
ਦੂਜੇ ਪਾਸੇ ਕੁਝ ਲੋਕ ਮੂਲ ਤੌਰ ਤੋਂ ਚਿਤਵਨ ਤੇ ਪਰਸਾ ਦੇ ਹਨ ਤੇ ਫਿਲਹਾਲ ਧਾਦਿੰਗ ਵਿਚ ਰਹਿ ਰਹੇ ਹਨ। ਸਾਰਿਆਂ ਦੀ ਉਮਰ 19 ਤੋਂ 49 ਸਾਲ ਦੇ ਵਿਚ ਹੈ। ਪੁਲਿਸ ਹੁਣ ਬਰਾਮਦ ਰਕਮ ਦੇ ਸਰੋਤ ਦੀ ਜਾਂਚ ਕਰ ਰਹੀ ਹੈ। ਨਾਲ ਹੀ ਇਹ ਵੀ ਪਤਾ ਲਗਾਇਆ ਜਾ ਰਿਹਾ ਹੈ ਕਿ ਮਾਮਲੇ ਵਿਚ ਹੋਰ ਲੋਕ ਸ਼ਾਮਲ ਹਨ ਜਾਂ ਨਹੀਂ।
