ਜਲੰਧਰ : – ਰੂਸ ਯੂਕਰੇਨ ਦੀ ਜੰਗ ਨੂੰ 8ਵਾਂ ਦਿਨ ਹੈ ਰੂਸ ਯੂਕਰੇਨ ਤੇ ਲਗਾਤਾਰ ਆਪਣੇ ਹਮਲੇ ਨੂੰ ਤੇਜ਼ ਕਰ ਰਿਹਾ ਹੈ, ਜਿਥੇ ਭਾਰਤੀ ਵਿਦਿਆਰਥੀ ਨੂੰ ਵਾਪਸ ਲਿਆਉਣ ਦਾ ਕੰਮ ਜ਼ੋਰਾਂ ਤੇ ਚਲ ਰਿਹਾ ਹੈ ਓਥੇ ਹੀ ਆਦਮਪੁਰ ਦੇ ਦੋ ਪਰਿਵਾਰ ਚਿੰਤਾ ਵਿੱਚ ਹਨ ਕਿਉਂਕਿ ਉਨ੍ਹਾਂ ਦੇ ਪੁੱਤਰ ਹੋਰਾਂ ਵਾਂਗ ਘਰ ਵਾਪਸ ਨਹੀਂ ਆ ਸਕਦੇ ਹਨ। ਉਹ 6 ਫਰਵਰੀ ਤੋਂ ਯੂਕਰੇਨ ਦੀ ਜੇਲ ਵਿਚ ਬੰਦ ਹਨ ਕਿਉਂਕਿ ਇਹ ਦੋਵੇਂ ਆਪਣੇ ਵੀਜ਼ੇ ਦੀ ਮਿਆਦ ਪੁੱਗਣ ਤੋਂ ਬਾਅਦ ਰੁਕ ਗਏ ਸਨ ਅਤੇ ਰੋਮਾਨੀਆ ਦੀ ਸਰਹੱਦ ਪਾਰ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਸਨ। ਦੋਵੇਂ ਨੌਜਵਾਨ ਰਮਨਦੀਪ ਅਤੇ ਰਜਤ ਸਹੋਤਾ ਹਨ, ਦੋਵੇਂ ਇੱਥੋਂ ਦੇ ਆਦਮਪੁਰ ਦੇ ਗਾਜ਼ੀਪੁਰ ਮੁਹੱਲੇ ਦੇ ਰਹਿਣ ਵਾਲੇ ਹਨ।
ਉਨ੍ਹਾਂ ਨੇ ਬਾਰਡਰ ਪਾਰ ਕਰਨ ਦੀ ਕੋਸ਼ਿਸ਼ ਕੀਤੀ, ਪਰ ਕਥਿਤ ਤੌਰ ‘ਤੇ ਯੂਕਰੇਨੀ ਪੁਲਿਸ ਦੁਆਰਾ ਉਨ੍ਹਾਂ ਨੂੰ ਫੜ ਲਿਆ ਗਿਆ ਅਤੇ ਉਦੋਂ ਤੋਂ ਹਿਰਾਸਤ ਵਿੱਚ ਹਨ।
ਰਜਤ ਦੇ ਪਿਤਾ ਨੇ ਦੱਸਿਆ , “ਮੁੰਡਿਆਂ ਨੇ ਸਾਨੂੰ ਦੱਸਿਆ ਕਿ ਉਨ੍ਹਾਂ ਨੂੰ 10 ਦਿਨਾਂ ਵਿੱਚ ਵਾਪਸ ਭੇਜ ਦਿੱਤਾ ਜਾਵੇਗਾ। ਬਾਅਦ ਵਿੱਚ, ਉਹਨਾਂ ਨੇ ਸਾਨੂੰ ਦੱਸਿਆ ਕਿ ਇਸ ਵਿੱਚ ਕੁਝ ਦਿਨ ਹੋਰ ਲੱਗ ਸਕਦੇ ਹਨ। ਅਗਲੇ ਪੰਜ-ਛੇ ਦਿਨ ਉਨ੍ਹਾਂ ਨੇ ਸਾਨੂੰ ਫ਼ੋਨ ਨਹੀਂ ਕੀਤਾ। ਅਸੀਂ ਉਨ੍ਹਾਂ ਦਾ ਨੰਬਰ ਲਗਾਉਣ ਦੀ ਕੋਸ਼ਿਸ਼ ਕਰਦੇ ਰਹੇ, ਪਰ ਕੋਈ ਜਵਾਬ ਨਹੀਂ ਮਿਲਿਆ। ਅਸੀਂ ਸੱਚਮੁੱਚ ਚਿੰਤਤ ਹਾਂ। ਪਿਛਲੇ ਸ਼ਨੀਵਾਰ, ਉਨ੍ਹਾਂ ਨੂੰ ਉਥੇ ਪੁਲਿਸ ਵਾਲਿਆਂ ਦੇ ਫੋਨਾਂ ਤੋਂ ਦੋ ਮਿੰਟ ਲਈ ਕਾਲ ਕਰਨ ਦੀ ਇਜਾਜ਼ਤ ਦਿੱਤੀ ਗਈ ਸੀ।
ਉਨ੍ਹਾਂ ਨੇ ਸਾਨੂੰ ਆਪਣੀ ਜੇਲ੍ਹ ਦੀ ਲੋਕੇਸ਼ਨ ਭੇਜੀ ਸੀ , ਜੋ ਕਿ ਪੋਲੈਂਡ ਦੀਆਂ ਸਰਹੱਦਾਂ ਤੋਂ 50 ਕਿਲੋਮੀਟਰ ਦੂਰ ਜੰਗਲ ਵਿੱਚ ਹੈ। ਲੜਕਿਆਂ ਨੇ ਦੱਸਿਆ ਕਿ ਯੁੱਧ ਦੇ ਬਾਵਜੂਦ ਯੂਕਰੇਨੀ ਪੁਲਿਸ ਉਨ੍ਹਾਂ ਨੂੰ ਨਹੀਂ ਛੱਡ ਰਹੀ ਹੈ| (TT)