ਫ਼ਿਲਮ ‘ਫੁਕਰੇ’ ਆਪਣੇ ਤੀਜੇ ਭਾਗ ਨੂੰ ਲੈ ਕੇ ਦਰਸ਼ਕਾਂ ਦਾ ਮਨੋਰੰਜਨ ਕਰਨ ਲਈ ਤਿਆਰ ਹੈ। ਵਰੁਣ ਸ਼ਰਮਾ ਨੇ ਕੁਝ ਦਿਨ ਪਹਿਲਾਂ ਹੀ ਤਸਵੀਰ ਸਾਂਝੀ ਕਰਕੇ ਪ੍ਰਸ਼ੰਸਕਾਂ ਨੂੰ ਜਾਣਕਾਰੀ ਦਿੱਤੀ ਸੀ ਕਿ ਫ਼ਿਲਮ ‘ਫੁਕਰੇ’ ਦਾ ਤੀਜਾ ਭਾਗ ਆ ਰਿਹਾ ਹੈ ਅਤੇ ਇਸ ਦੀ ਸ਼ੂਟਿੰਗ ਵੀ ਸ਼ੁਰੂ ਹੋ ਚੁੱਕੀ ਹੈ। ਪਰ ਇਸ ਵਾਰ ਇਸ ਫ਼ਿਲਮ ’ਚ ਅਲੀ ਫਜ਼ਲ ਨਹੀਂ ਦਿਖਣ ਵਾਲੇ ਹਨ। ਉਸ ਦੀ ਜਗ੍ਹਾ ਮੇਕਰਜ਼ ਕਿਸੇ ਹੋਰ ਸਟਾਰ ਨੂੰ ਕਾਸਟ ਕਰਨਗੇ। ਜਾਣਕਾਰੀ ਮੁਤਾਬਕ ਅਲੀ ਫਜ਼ਲ ਇਸ ਫ਼ਿਲਮ ਦੀ ਤੀਜੀ ਫ੍ਰੈਂਚਾਇਜ਼ੀ ਦਾ ਹਿੱਸਾ ਨਹੀਂ ਰਹਿਣਗੇ।
ਅਲੀ ਕੋਲ ਕਈ ਪ੍ਰਾਜੈਕਟਸ ਹਨ, ਜਿਨ੍ਹਾਂ ’ਚ ਉਹ ਰੁੱਝੇ ਨਜ਼ਰ ਆਉਣਗੇ। ਉਨ੍ਹਾਂ ਕੋਲ ਇਸ ਸਮੇਂ ਇਸ ਫ਼ਿਲਮ ਲਈ ਡੇਟਸ ਨਹੀਂ ਹਨ। ਅਲੀ ਨੇ ਆਪਣੀਆਂ ਡੇਟਸ ਵਿਸ਼ਾਲ ਭਾਰਦਵਾਜ ਦੀ ਫ਼ਿਲਮ ‘ਖ਼ੁਫ਼ੀਆ’ ਲਈ ਰੱਖੀਆਂ ਹਨ। ਅਜਿਹੇ ’ਚ ‘ਫੁਕਰੇ 3’ ਦੀ ਸ਼ੂਟਿੰਗ ਕਰਨਾ ਉਨ੍ਹਾਂ ਲਈ ਕਾਫੀ ਮੁਸ਼ਕਿਲ ਹੈ, ਇਸ ਲਈ ਉਹ ਫ਼ਿਲਮ ਦਾ ਹਿੱਸਾ ਨਹੀਂ ਹਨ। ਫਰਵਰੀ ਮਹੀਨੇ ਦੀ ਸ਼ੁਰੂਆਤ ’ਚ ਅਲੀ ਫਜ਼ਲ ‘ਕਾਂਦਾਹਾਰ’ ਦੀ ਸ਼ੂਟਿੰਗ ’ਚ ਰੁੱਝੇ ਸਨ। ਇਸ ਤੋਂ ਬਾਅਦ ਉਹ ਆਪਣੀ ਹਾਲੀਵੁੱਡ ਫ਼ਿਲਮ ‘ਡੈੱਥ ਆਨ ਦਿ ਨਾਇਲ’ ਦੀ ਪ੍ਰਮੋਸ਼ਨ ’ਚ ਰੁੱਝ ਗਏ। ਆਪਣੇ ਕਮਿੱਟਮੈਂਟਸ ਨੂੰ ਧਿਆਨ ’ਚ ਰੱਖਦਿਆਂ ਅਲੀ ਨੇ ਇਹ ਕਦਮ ਚੁੱਕਿਆ ਹੈ।
