ਝਾਰਖੰਡ ਦੇ ਦੇਵਘਰ ‘ਚ ਤ੍ਰਿਕੁਟ ਪਹਾੜ ਦੇ ਰੋਪਵੇਅ ‘ਤੇ 24 ਘੰਟੇ ਬੀਤ ਜਾਣ ਦੇ ਬਾਵਜੂਦ 21 ਜਾਨਾਂ ਹਾਦਸੇ ‘ਚ ਫਸੀਆਂ ਹੋਈਆਂ ਹਨ। ਉਨ੍ਹਾਂ ਨੂੰ ਬਾਹਰ ਕੱਢਣ ਲਈ ਸੈਨਾ, ਹਵਾਈ ਸੈਨਾ ਅਤੇ ਐਨਡੀਆਰਐਫ ਦੀਆ ਟੀਮਾਂ ਲੱਗੀਆਂ ਹੋਈਆਂ ਹਨ। ਸੋਮਵਾਰ ਦੁਪਹਿਰ 12 ਵਜੇ ਐਮਆਈ-17 ਹੈਲੀਕਾਪਟਰ ਦੀ ਮਦਦ ਨਾਲ ਮੁੜ ਬਚਾਅ ਕਾਰਜ ਸ਼ੁਰੂ ਕੀਤਾ ਗਿਆ। ਹੁਣ ਤੱਕ 27 ਸ਼ਰਧਾਲੂਆਂ ਨੂੰ ਬਚਾਇਆ ਜਾ ਚੁੱਕਾ ਹੈ। ਦੋ ਲੋਕਾਂ ਦੀ ਮੌਤ ਹੋ ਗਈ। ਇਨ੍ਹਾਂ ਟਰਾਲੀਆਂ ਵਿੱਚ 48 ਦੇ ਕਰੀਬ ਲੋਕ ਸਾਰੀ ਰਾਤ ਭੁੱਖੇ-ਪਿਆਸੇ ਫਸੇ ਰਹੇ।
ਦੱਸ ਦਈਏ ਕਿ ਰਾਮਨਵਮੀ ਦੀ ਪੂਜਾ ਅਤੇ ਦਰਸ਼ਨਾਂ ਲਈ ਐਤਵਾਰ ਨੂੰ ਇੱਥੇ ਸੈਂਕੜੇ ਸੈਲਾਨੀ ਪੁੱਜੇ ਹੋਏ ਸਨ। ਹਾਦਸਾ ਐਤਵਾਰ ਸ਼ਾਮ 4 ਵਜੇ ਵਾਪਰਿਆ ਜਦੋਂ ਪਹਾੜ ‘ਤੇ ਬਣੇ ਮੰਦਰ ਵੱਲ 26 ਟਰਾਲੀਆਂ ਇੱਕੋ ਸਮੇਂ ਰਵਾਨਾ ਹੋ ਰਹੀਆਂ ਸਨ। ਜਿਸ ਕਾਰਨ ਤਾਰਾਂ ‘ਤੇ ਅਚਾਨਕ ਲੋਡ ਵੱਧ ਗਿਆ ਅਤੇ ਰੋਲਰ ਟੁੱਟ ਗਿਆ। ਤਿੰਨ ਟਰਾਲੀਆਂ ਪਹਾੜ ਨਾਲ ਟਕਰਾ ਗਈਆਂ। ਇਸ ਕਾਰਨ ਦੋ ਟਰਾਲੀਆਂ ਹੇਠਾਂ ਡਿੱਗ ਗਈਆਂ। ਇਸ ‘ਚ ਸਵਾਰ 12 ਲੋਕ ਜ਼ਖਮੀ ਹੋ ਗਏ ਅਤੇ ਦੋ ਲੋਕਾਂ ਦੀ ਮੌਤ ਹੋ ਗਈ। ਦੂਜੇ ਪਾਸੇ ਬਾਕੀ ਟਰਾਲੀਆਂ ਇੱਕ ਦੂਜੇ ਨਾਲ ਟਕਰਾ ਕੇ ਰੁਕ ਗਈਆਂ। ਕੁਝ ਟਰਾਲੀਆਂ ਅਜੇ ਵੀ ਫਸੀਆਂ ਹੋਈਆਂ ਹਨ, ਜਿਨ੍ਹਾਂ ਵਿੱਚ 21 ਸ਼ਰਧਾਲੂ ਅਜੇ ਵੀ ਸਵਾਰ ਹਨ। ਇਨ੍ਹਾਂ ਵਿੱਚ ਛੋਟੇ ਬੱਚੇ ਅਤੇ ਔਰਤਾਂ ਵੀ ਸ਼ਾਮਲ ਹਨ।
ਜ਼ਿਕਰਯੋਗ ਹੈ ਕਿ ਤ੍ਰਿਕੁਟਾਚਲ ਮਹਾਦੇਵ ਮੰਦਰ ਅਤੇ ਰਿਸ਼ੀ ਦਯਾਨੰਦ ਦਾ ਆਸ਼ਰਮ ਤ੍ਰਿਕੁਟਾ ਪਹਾੜੀ ‘ਤੇ ਸਥਿਤ ਹੈ। ਹਰ ਸਾਲ ਹਜ਼ਾਰਾਂ ਲੋਕ ਇੱਥੇ ਮੰਦਰ ਦੇ ਦਰਸ਼ਨ ਲਈ ਆਉਂਦੇ ਹਨ। ਇਸ ਦੇ ਲਈ ਇੱਥੇ ਰੋਪਵੇਅ ਬਣਾਇਆ ਗਿਆ ਹੈ। ਇਹ ਝਾਰਖੰਡ ਦਾ ਇੱਕੋ ਇੱਕ ਅਤੇ ਸਭ ਤੋਂ ਉੱਚਾ ਰੋਪਵੇਅ ਹੈ। ਇਸ ਤੱਕ ਪਹੁੰਚਣ ਲਈ ਇੱਕ-ਇੱਕ ਟਰਾਲੀ ਵਿੱਚ 4-4 ਵਿਅਕਤੀਆਂ ਨੂੰ ਉੱਪਰ ਭੇਜਿਆ ਜਾਂਦਾ ਹੈ।
ਸੈਨਾ ਨੂੰ ਬਚਾਅ ਕਾਰਜਾਂ ‘ਚ ਕਾਫੀ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਦਰਅਸਲ, ਟਰਾਲੀਆਂ ਦੋ ਪਹਾੜਾਂ ਵਿਚਕਾਰ ਫਸੀਆਂ ਹੋਈਆਂ ਹਨ। ਜਿਵੇਂ ਹੀ ਹੈਲੀਕਾਪਟਰ ਨੂੰ ਉਨ੍ਹਾਂ ਦੇ ਨੇੜੇ ਲਿਜਾਇਆ ਗਿਆ ਤਾਂ ਤੇਜ਼ ਹਵਾ ਕਾਰਨ ਉਹ ਹਿੱਲਣ ਲੱਗ ਪਏ। ਏਅਰਲਿਫਟ ਬਹੁਤ ਸਾਵਧਾਨੀ ਨਾਲ ਕੀਤਾ ਜਾ ਰਿਹਾ ਹੈ। ਕੁਝ ਲੋਕਾਂ ਨੂੰ ਰੱਸੀਆਂ ਦੀ ਮਦਦ ਨਾਲ ਬਚਾਇਆ ਜਾ ਰਿਹਾ ਹੈ।
