ਮਸ਼ਹੂਰ ਅਦਾਕਾਰਾ ਅਤੇ ਟੀਵੀ ਸ਼ੋਅ ਨਿਰਮਾਤਾ ਮੰਜੂ ਸਿੰਘ (73) ਦਾ ਵੀਰਵਾਰ (14 ਅਪ੍ਰੈਲ) ਨੂੰ ਦਿਲ ਦਾ ਦੌਰਾ ਪੈਣ ਕਾਰਨ ਦੇਹਾਂਤ ਹੋ ਗਿਆ। ਮੰਜੂ ਸਿੰਘ ਨੇ ‘ਸਵਰਾਜ’, ‘ਏਕ ਕਹਾਨੀ’, ‘ਸ਼ੋ ਟਾਈਮ’ ਵਰਗੇ ਕਮਾਲ ਦੇ ਸ਼ੋਅ ਬਣਾਏ ਹਨ। ਲੋਕ ਉਸ ਨੂੰ ਪਿਆਰ ਨਾਲ ‘ਦੀਦੀ’ ਕਹਿ ਕੇ ਬੁਲਾਉਂਦੇ ਸਨ। ਉਹ ਬੱਚਿਆਂ ਦੇ ਸ਼ੋਅ ‘ਖੇਲ ਖਿਲਾੜੀ’ ਦੀ ਐਂਕਰ ਵੀ ਰਹਿ ਚੁੱਕੀ ਹੈ, ਉਸ ਨੇ ਇਸ ਸ਼ੋਅ ‘ਚ ਸੱਤ ਸਾਲ ਕੰਮ ਕੀਤਾ। ਉਨ੍ਹਾਂ ਨੇ ਰਿਸ਼ੀਕੇਸ਼ ਮੁਖਰਜੀ ਦੀ ਫਿਲਮ ‘ਗੋਲਮਾਲ’ ‘ਚ ਵੀ ਰਤਨਾ ਦਾ ਕਿਰਦਾਰ ਨਿਭਾਇਆ ਸੀ। ਗਾਇਕ ਅਤੇ ਪਟਕਥਾ ਲੇਖਕ ਸਵਾਨੰਦ ਕਿਰਕੀਰੇ ਨੇ ਸੋਸ਼ਲ ਮੀਡੀਆ ਰਾਹੀ ਮੰਜੂ ਸਿੰਘ ਦੇ ਦੇਹਾਂਤ ਹੋਣ ਦੀ ਜਾਣਕਾਰੀ ਸਾਂਝੀ ਕੀਤੀ ਹੈ।
ਸਵਾਨੰਦ ਨੇ ਦੂਰਦਰਸ਼ਨ ਲਈ ਆਪਣੇ ਨਾਲ ਕੰਮ ਕਰਨ ਦੇ ਦਿਨਾਂ ਨੂੰ ਯਾਦ ਕਰਦੇ ਹੋਏ ਪੋਸਟ ਸ਼ੇਅਰ ਕੀਤੀ। ਗਾਇਕ ਨੇ ਲਿਖਿਆ, “ਮੰਜੂ ਸਿੰਘ ਜੀ ਨਹੀਂ ਰਹੇ! ਮੰਜੂ ਜੀ ਮੈਨੂੰ ਦੂਰਦਰਸ਼ਨ ਲਈ ਆਪਣਾ ਸ਼ੋਅ ਸਵਰਾਜ ਲਿਖਣ ਲਈ ਦਿੱਲੀ ਤੋਂ ਮੁੰਬਈ ਲੈ ਕੇ ਆਏ! ਉਨ੍ਹਾਂ ਨੇ ਡੀਡੀ ਲਈ ‘ਏਕ ਕਹਾਣੀ’, ‘ਸ਼ੋ ਟਾਈਮ’ ਆਦਿ ਕਈ ਸ਼ਾਨਦਾਰ ਸ਼ੋਅ ਕੀਤੇ। ਰਿਸ਼ੀਕੇਸ਼ ਮੁਖਰਜੀ ਦੀ ਫਿਲਮ ‘ਗੋਲਮਾਲ’ ਦੀ ਰਤਨਾ ‘ਤੇ ਸਾਡੀ ਪਿਆਰੀ ਮੰਜੂ ਜੀ ਮੈਂ ਤੁਹਾਡੇ ਪਿਆਰ ਨੂੰ ਕਿਵੇਂ ਭੁੱਲ ਸਕਦਾ ਹਾਂ… ਅਲਵਿਦਾ!”
ਸੋਸ਼ਲ ਮੀਡੀਆ ਯੂਜ਼ਰਸ ਨੇ ਅਭਿਨੇਤਰੀ ਦੀਆਂ ਫਿਲਮਾਂ ਨੂੰ ਯਾਦ ਕਰਦੇ ਹੋਏ ਸਵਾਨੰਦ ਦੀ ਪੋਸਟ ‘ਤੇ ਪ੍ਰਤੀਕਿਰਿਆ ਦਿੱਤੀ। ਗਾਇਕ ਤੋਂ ਇਲਾਵਾ ਕਈ ਮਸ਼ਹੂਰ ਹਸਤੀਆਂ ਨੇ ਵੀ ਮੰਜੂ ਸਿੰਘ ਦੀ ਮੌਤ ‘ਤੇ ਦੁੱਖ ਦਾ ਪ੍ਰਗਟਾਵਾ ਕੀਤਾ ਹੈ।
