ਅੱਜ ਕਲ ਅਸੀਂ ਕਿਸੇ ਵੀ ਸਰਕਾਰੀ ਸਕੀਮ ਦਾ ਲਾਭ ਲੈਣ ਜਾਂ ਵਿੱਤੀ ਲੈਣ-ਦੇਣ ਕਰਨ ਲਈ ਆਧਾਰ ਕਾਰਡ ਦੀ ਵਰਤੋਂ ਕਰਦੇ ਹਾਂ। ਇਹ ਕਾਰਡ ਸਾਡੇ ਲਈ ਬਹੁਤ ਸਾਰੇ ਮਹੱਤਵਪੂਰਨ ਕੰਮਾਂ ਲਈ ਜਰੂਰੀ ਦਸਤਾਵੇਜ਼ਾਂ ਵਿੱਚੋ ਇੱਕ ਹੈ। ਆਧਾਰ ਕਾਰਡ ਤੁਹਾਡੀ ਪਛਾਣ ਦਾ ਸਬੂਤ ਹੈ। ਇਸ ਵਿੱਚ 12 ਅੰਕਾਂ ਦਾ ਸੰਖਿਆਤਮਕ ਅੰਕ ਹੁੰਦਾ ਹੈ। ਇਹ ਸੰਖਿਆਤਮਕ ਨੰਬਰ ਤੁਹਾਡੀ ਬਾਇਓਮੈਟ੍ਰਿਕ ਪਛਾਣ ਨੂੰ ਯਕੀਨੀ ਬਣਾਉਣ ਲਈ ਕੰਮ ਕਰਦੇ ਹਨ। ਅਕਸਰ ਕਈ ਲੋਕ ਆਪਣੇ ਆਧਾਰ ਕਾਰਡ ਦੀ ਕਾਪੀ ਕਿਸੇ ਨਾਲ ਕਿਤੇ ਵੀ ਸਾਂਝੀ ਕਰ ਦਿੰਦੇ ਹਨ। ਜੇਕਰ ਤੁਸੀਂ ਵੀ ਇਹ ਗਲਤੀ ਕਰ ਰਹੇ ਹੋ ਤਾਂ ਤੁਹਾਨੂੰ ਤੁਰੰਤ ਸੁਚੇਤ ਹੋਣ ਦੀ ਲੋੜ ਹੈ। ਤੁਹਾਡੀ ਇਹ ਲਾਪਰਵਾਹੀ ਵੱਡਾ ਨੁਕਸਾਨ ਕਰ ਸਕਦੀ ਹੈ। ਸਰਕਾਰ ਨੇ ਇਸ ਸਬੰਧੀ ਚੇਤਾਵਨੀ ਜਾਰੀ ਕੀਤੀ ਹੈ। ਆਪਣੇ ਗਾਈਡਲਾਈਨ ਵਿੱਚ, ਸਰਕਾਰ ਨੇ ਸਿਰਫ “ਮਾਸਕਡ ਆਧਾਰ ਕਾਰਡ” ਨੂੰ ਹੋਰ ਲੋਕਾਂ ਨਾਲ ਸਾਂਝਾ ਕਰਨ ਲਈ ਕਿਹਾ ਹੈ।
“ਮਾਸਕਡ ਆਧਾਰ ਕਾਰਡ” ‘ਚ ਤੁਹਾਡੇ 12 ਅੰਕਾਂ ਦੇ ਸੰਖਿਆਤਮਕ ਕੋਡ ਦਾ ਪੂਰਾ ਨੰਬਰ ਦਿਖਾਈ ਨਹੀਂ ਦਿੰਦਾ। ਮਾਸਕਡ ਆਧਾਰ ‘ਚ ਆਧਾਰ ਨੰਬਰ ਦੇ ਸਿਰਫ ਆਖਰੀ 4 ਅੰਕ ਹੀ ਦਿਖਾਈ ਦਿੰਦੇ ਹਨ। ਤੁਸੀਂ ਮਾਸਕ ਵਾਲਾ ਆਧਾਰ ਕਾਰਡ ਆਨਲਾਈਨ ਆਸਾਨੀ ਨਾਲ ਡਾਊਨਲੋਡ ਕਰ ਸਕਦੇ ਹੋ।
ਸਰਕਾਰ ਨੇ ਦੱਸਿਆ ਹੈ ਕਿ ਜੇਕਰ ਆਧਾਰ ਕਾਰਡ ਦੀ ਕਾਪੀ ਕਿਸੇ ਵਿਅਕਤੀ ਜਾਂ ਸੰਸਥਾ ਨਾਲ ਸਾਂਝੀ ਕੀਤੀ ਜਾਂਦੀ ਹੈ ਤਾਂ ਇਸ ਦੀ ਦੁਰਵਰਤੋਂ ਹੋ ਸਕਦੀ ਹੈ। ਅਜਿਹੇ ‘ਚ ਤੁਹਾਨੂੰ ਵੱਡੇ ਨੁਕਸਾਨ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ। ਲੋਕਾਂ ਨੂੰ ਦਿਸ਼ਾ-ਨਿਰਦੇਸ਼ ਦਿੰਦੇ ਹੋਏ, ਸਰਕਾਰ ਨੇ ਕਿਹਾ ਹੈ ਕਿ ਹਮੇਸ਼ਾ ਸਿਰਫ “ਮਾਸਕਡ ਆਧਾਰ ਕਾਰਡ” ਨੂੰ ਹੀ ਹੋਰ ਲੋਕਾਂ ਜਾਂ ਸੰਸਥਾਵਾਂ ਨਾਲ ਸਾਂਝਾ ਕਰੋ।
