ਸੋਮਵਾਰ ਨੂੰ ਯੂਨੀਅਨ ਪਬਲਿਕ ਸਰਵਿਸ ਕਮਿਸ਼ਨ UPSC ਸਿਵਲ ਸਰਵਿਸਿਜ਼ ਪ੍ਰੀਖਿਆ 2021 ਦਾ ਨਤੀਜਾ ਜਾਰੀ ਕਰ ਦਿੱਤਾ ਗਿਆ ਹੈ। UPSC ਵੱਲੋਂ ਜਾਰੀ ਫਾਈਨਲ ਨਤੀਜਿਆਂ ਵਿੱਚ ਸ਼ਰੂਤੀ ਸ਼ਰਮਾ ਨੇ ਪਹਿਲਾ ਸਥਾਨ ਹਾਸਲ ਕੀਤਾ ਹੈ। ਦੂਜੇ ਸਥਾਨ ‘ਤੇ ਅੰਕਿਤਾ ਅਗਰਵਾਲ ਅਤੇ ਤੀਜੇ ਸਥਾਨ ’ਤੇ ਗਾਮਿਨੀ ਸਿੰਗਲਾ ਰਹੀ।
UPSC 2021 ਟਾਪਰ ਗਾਮਿਨੀ ਸਿੰਗਲਾ ਆਨੰਦਪੁਰ ਸਾਹਿਬ ਦੀ ਰਹਿਣ ਵਾਲੀ ਹੈ। ਪੰਜਾਬ ਇੰਜਨੀਅਰਿੰਗ ਕਾਲਜ, ਚੰਡੀਗੜ੍ਹ ਤੋਂ ਕੰਪਿਊਟਰ ਸਾਇੰਸ ਇੰਜਨੀਅਰਿੰਗ ਵਿਭਾਗ ਦੀ ਵਿਦਿਆਰਥਣ ਗਾਮਿਨੀ ਸਿੰਗਲਾ ਨੇ UPSC ਟੌਪਰਸ ਦੀ ਲਿਸਟ ਵਿੱਚ ਸਿਖਰਲੇ ਸਥਾਨਾਂ ਵਿੱਚ ਆਪਣਾ ਨਾਮ ਦਰਜ ਕਰਕੇ ਟ੍ਰਾਈਸਿਟੀ ਦਾ ਮਾਣ ਵਧਾਇਆ ਹੈ।
ਜਿੱਥੇ ਗਾਮਿਨੀ ਸਿੰਗਲਾ ਆਪਣੀ ਕਾਮਯਾਬੀ ਨਾਲ ਖੁਸ਼ ਹੈ, ਉੱਥੇ ਹੀ ਪੀਈਸੀ ਦੇ ਉਸ ਦੇ ਪ੍ਰੋਫ਼ੈਸਰ ਵੀ ਇਸ ਪਲ ਨਾਲ ਮਾਣ ਮਹਿਸੂਸ ਕਰ ਰਹੇ ਹਨ। ਸੀਐਸਈ ਵਿਭਾਗ, ਪੀਈਸੀ ਚੰਡੀਗੜ੍ਹ ਦੇ ਇੱਕ ਫੈਕਲਟੀ, ਪ੍ਰੋਫੈਸਰ ਸੰਜੀਵ ਨੇ ਕਿਹਾ, “ਗਾਮਿਨੀ ਇੱਕ ਬਹੁਤ ਹੀ ਹੁਸ਼ਿਆਰ ਵਿਦਿਆਰਥਣ ਸੀ। ਵਿਭਾਗ ਉਸ ਨੂੰ ਹਮੇਸ਼ਾ ਯਾਦ ਕਰਦਾ ਹੈ ਅਤੇ ਸਾਨੂੰ ਸਾਰਿਆਂ ਨੂੰ ਬਹੁਤ ਭਰੋਸਾ ਸੀ ਕਿ ਉਹ ਜਰੂਰ ਪ੍ਰੀਖਿਆ ਪਾਸ ਕਰੇਗੀ। ਸਾਨੂੰ ਉਸ ‘ਤੇ ਬਹੁਤ ਮਾਣ ਹੈ।”
ਦੱਸ ਦਈਏ ਕਿ ਜਿਹੜੇ ਉਮੀਦਵਾਰਾਂ ਨੇ ਇਹ ਪ੍ਰੀਖਿਆ ਦਿੱਤੀ ਸੀ ਅਤੇ ਇੰਟਰਵਿਊ ਵਿੱਚ ਸ਼ਾਮਲ ਹੋਏ ਸਨ, ਉਹ UPSC ਦੀ ਅਧਿਕਾਰਤ ਵੈੱਬਸਾਈਟ ‘ਤੇ ਜਾ ਕੇ ਆਪਣਾ ਨਤੀਜਾ ਦੇਖ ਸਕਦੇ ਹਨ ਅਤੇ ਡਾਊਨਲੋਡ ਕਰ ਸਕਦੇ ਹਨ। ਯੂਨੀਅਨ ਪਬਲਿਕ ਸਰਵਿਸ ਕਮਿਸ਼ਨ ਵੱਲੋਂ ਜਾਰੀ ਨਤੀਜੇ ਅਨੁਸਾਰ ਇਸ ਪ੍ਰੀਖਿਆ ਵਿੱਚ ਕੁੱਲ 685 ਉਮੀਦਵਾਰਾਂ ਦੀ ਚੋਣ ਕੀਤੀ ਗਈ ਹੈ। ਇਨ੍ਹਾਂ ਵਿੱਚੋਂ 244 ਉਮੀਦਵਾਰ ਜਨਰਲ ਕੈਟਾਗਰੀ ਵਿੱਚੋਂ, 73 ਈਡਬਲਿਊਐਸ, 203 ਓਬੀਸੀ, 105 ਐਸਸੀ ਅਤੇ 60 ਐਸਟੀ ਸ਼੍ਰੇਣੀ ਦੇ ਉਮੀਦਵਾਰ ਚੁਣੇ ਗਏ ਹਨ। ਇਹ ਨਤੀਜਾ ਔਨਲਾਈਨ ਉਪਲਬਧ ਹੈ।
