ਮੰਨਿਆ ਜਾਂਦਾ ਹੈ ਕਿ ਜੇਕਰ ਤੁਹਾਨੂੰ ਗੁਰੂ ‘ਤੇ ਭਰੋਸਾ ਹੈ, ਤਾਂ ਕੋਈ ਵੀ ਚੀਜ਼ ਤੁਹਾਡੇ ਰਸਤੇ ਵਿਚ ਰੁਕਾਵਟ ਨਹੀਂ ਬਣ ਸਕਦੀ। ਇਸ ਗੱਲ ਨੂੰ ਜਮਸ਼ੇਦਪੁਰ ਦੀ ਰਹਿਣ ਵਾਲੀ ਬਜ਼ੁਰਗ ਔਰਤ ਹਰਵੰਤ ਕੌਰ ਨੇ ਸੱਚ ਸਾਬਤ ਕਰ ਦਿੱਤਾ ਹੈ। ਜਿਨ੍ਹਾਂ ਨੇ 97 ਸਾਲ ਦੀ ਉਮਰ ਵਿੱਚ ਬਹੁਤ ਹੀ ਔਖੀ ਮੰਨੀ ਜਾਂਦੀ ਸ਼੍ਰੀ ਹੇਮਕੁੰਟ ਸਾਹਿਬ ਦੀ ਯਾਤਰਾ ਪੂਰੀ ਕੀਤੀ ਹੈ।
ਹਰਵੰਤ ਕੌਰ ਜਮਸ਼ੇਦਪੁਰ ਟਾਟਾ ਨਗਰ ਦੀ ਰਹਿਣ ਵਾਲੀ ਹੈ। ਹੇਮਕੁੰਟ ਸਾਹਿਬ ਸਮੁੰਦਰ ਤਲ ਤੋਂ 15225 ਫੁੱਟ ਦੀ ਉਚਾਈ ‘ਤੇ ਸਥਿਤ ਹੈ। ਹਾਲਾਂਕਿ ਪ੍ਰਸ਼ਾਸਨ, ਸਿਹਤ ਵਿਭਾਗ ਦੇ ਨਾਲ-ਨਾਲ ਉਸ ਦੇ ਪਰਿਵਾਰ ਵਾਲਿਆਂ ਨੇ ਹਰਵੰਤ ਕੌਰ ਨੂੰ ਮਨਾ ਕੀਤਾ ਪਰ ਉਹ ਨਾ ਮੰਨੀ ਅਤੇ ਉਸਨੇ ਘੰਗਰੀਆ ਤੋਂ ਹੇਮਕੁੰਟ ਸਾਹਿਬ ਤੱਕ ਛੇ ਕਿਲੋਮੀਟਰ ਦੀ ਚੜ੍ਹਾਈ ਪੈਦਲ ਹੀ ਕੀਤੀ।
ਜਾਣਕਾਰੀ ਮੁਤਾਬਿਕ ਹਰਵੰਤ ਕੌਰ ਨੂੰ ਰਿਸ਼ਤੇਦਾਰੀ ‘ਚੋ ਪਤਾ ਲੱਗਾ ਕਿ ਭਗਵਾਨ ਸਿੰਘ ਚੱਢਾ ਦੀ ਅਗਵਾਈ ‘ਚ ਬਾਰਾਬੰਕੀ, ਲਖਨਊ, ਕਾਨਪੁਰ, ਫੈਜ਼ਾਬਾਦ, ਚੰਡੀਗੜ੍ਹ ਅਤੇ ਜਮਸ਼ੇਦਪੁਰ ਤੋਂ ਸ਼ਰਧਾਲੂਆਂ ਦਾ ਜਥਾ ਹੇਮਕੁੰਟ ਸਾਹਿਬ ਦੇ ਦਰਸ਼ਨਾਂ ਲਈ ਜਾ ਰਿਹਾ ਹੈ। ਸੰਗਤ ਵਿੱਚ 335 ਸ਼ਰਧਾਲੂ ਸ਼ਾਮਲ ਹਨ। ਇਸ ਲਈ ਉਸ ਨੇ ਵੀ ਸੰਗਤ ਨਾਲ ਯਾਤਰਾ ਕਰਨ ਦਾ ਫੈਸਲਾ ਕੀਤਾ। ਆਖ਼ਰਕਾਰ ਉਸ ਦੀ ਜ਼ਿੱਦ ਦੇ ਸਾਹਮਣੇ ਪੁੱਤਰ ਸਮੇਤ ਰਿਸ਼ਤੇਦਾਰ ਵੀ ਹਾਰ ਗਏ ਅਤੇ ਉਹ ਯਾਤਰਾ ਲਈ ਰਾਜ਼ੀ ਹੋ ਗਏ।
ਸ੍ਰੀ ਹੇਮਕੁੰਟ ਸਾਹਿਬ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਮੁੱਖ ਪ੍ਰਬੰਧਕ ਸੇਵਾ ਸਿੰਘ ਨੇ ਦੱਸਿਆ ਕਿ ਹਰਵੰਤ ਕੌਰ ਲਈ ਡੰਡੀ-ਕੰਡੀ ਦਾ ਵੀ ਪ੍ਰਬੰਧ ਕੀਤਾ ਗਿਆ ਸੀ। ਪਰ ਉਹ ਸੰਗਤ ਸਮੇਤ 16 ਜੁਲਾਈ ਨੂੰ ਗੋਵਿੰਦਘਾਟ ਅਤੇ 17 ਜੁਲਾਈ ਨੂੰ ਹੇਮਕੁੰਟ ਸਾਹਿਬ ਪਹੁੰਚੀ। ਵਾਪਸੀ ‘ਤੇ ਓਹਨਾ ਨੇ ਘੰਗਰੀਆ ਵਿਖੇ ਆਰਾਮ ਕੀਤਾ। ਮੁੱਖ ਪ੍ਰਬੰਧਕ ਨੇ ਦੱਸਿਆ ਕਿ ਸੰਗਤ ਸੋਮਵਾਰ ਨੂੰ ਗੋਵਿੰਦਘਾਟ ਪਹੁੰਚੀ। ਇਸ ਦੌਰਾਨ ਹਰਵੰਤ ਕੌਰ ਨੇ ਕਿਹਾ ਕਿ ਗੁਰੂ ਧਾਮ ਜਾਣ ਦਾ ਉਨ੍ਹਾਂ ਦਾ ਸੰਕਲਪ ਪੂਰਾ ਹੋ ਗਿਆ ਹੈ।