ਅੰਮ੍ਰਿਤਸਰ ਦੀ ਰਹਿਣ ਵਾਲੀ ਭਾਰੀ ਸਰੀਰ ਦੀ ਚਾਹਤ ਤਾ ਹਰ ਕਿਸੇ ਨੂੰ ਯਾਦ ਹੀ ਹੋਵੇਗੀ ਚਾਹਤ ਦੀ 2019 ਵਿੱਚ ਢਾਈ ਸਾਲ ਦੀ ਉਮਰ ਵਿੱਚ ਮੌਤ ਹੋ ਗਈ ਸੀ। ਉਸਦਾ ਭਾਰ ਉਸਦੀ ਮੌਤ ਦਾ ਕਾਰਨ ਬਣ ਗਿਆ ਸੀ। ਅੰਮ੍ਰਿਤਸਰ ਦੇ ਮੋਹਕਮਪੁਰਾ ਇਲਾਕੇ ‘ਚ ਝੁੱਗੀਆਂਵਾਲਾ ਚੌਕ ‘ਚ ਰਹਿਣ ਵਾਲੇ ਸੂਰਜ ਅਤੇ ਉਸ ਦਾ ਪਰਿਵਾਰ ਧੀ ਚਾਹਤ ਦੀ ਮੌਤ ਦੇ ਸਦਮੇ ‘ਚੋਂ ਅਜੇ ਉਭਰ ਨਹੀਂ ਸਕੇ ਹਨ। ਕਿ ਚਾਹਤ ਵਾਂਗ ਉਸ ਦੀ ਭੈਣ ਮਾਨਸੀ ਵੀ ਇਸੇ ਦੌਰ ‘ਚੋਂ ਗੁਜ਼ਰ ਰਹੀ ਹੈ। ਚਾਰ ਸਾਲ ਦੀ ਮਾਨਸੀ ਦਾ ਵਜ਼ਨ 32 ਕਿਲੋ ਹੈ।
ਮਾਨਸੀ ਵੀ ਚਾਹਤ ਵਾਂਗ ਗੰਭੀਰ ਬੀਮਾਰੀ ਦੀ ਲਪੇਟ ‘ਚ ਹੈ। ਮਾਨਸੀ ਦੀ ਸਰੀਰਕ ਦਿੱਖ ਆਮ ਬੱਚਿਆਂ ਨਾਲੋਂ ਤਿੰਨ ਗੁਣਾ ਜ਼ਿਆਦਾ ਹੈ। ਮਾਨਸੀ ਦੇ ਪਿਤਾ ਸੂਰਜ ਦੱਸਦੇ ਹਨ ਕਿ ਉਹ ਆਮ ਬੱਚਿਆਂ ਵਾਂਗ ਹੱਸਦੀ ਅਤੇ ਖੇਡਦੀ ਹੈ। ਭੋਜਨ ਵੀ ਆਮ ਮਾਤਰਾ ਵਿੱਚ ਖਾਂਦੀ ਹੈ। ਚਾਹਤ ਵਾਂਗ ਰਾਤ ਨੂੰ ਦਸ ਵਜੇ ਸੌਣ ਤੋਂ ਬਾਅਦ ਮਾਨਸੀ ਹਰ ਰੋਜ਼ ਸਵੇਰੇ ਤਿੰਨ ਵਜੇ ਉੱਠਦੀ ਹੈ। ਉਹ ਸਾਨੂੰ ਵੀ ਉਠਾਉਂਦੀ ਹੈ ਅਤੇ ਖੇਡਣ ‘ਤੇ ਜ਼ੋਰ ਦਿੰਦੀ ਹੈ। ਉਹ ਗੋਡਿਆਂ ਭਾਰ ਰੁੜਦੀ ਹੈ ਅਤੇ ਘਰ ਦੇ ਵਿਹੜੇ ਵਿੱਚ ਖੇਡਦੀ ਹੈ। ਖੇਡਦੇ ਸਮੇਂ ਉਸ ਦਾ ਸਾਹ ਫੁਲ ਜਾਂਦਾ ਹੈ ਅਤੇ ਉਹ ਜ਼ਮੀਨ ‘ਤੇ ਲੇਟ ਜਾਂਦੀ ਹੈ।
ਜਾਣਕਾਰੀ ਮੁਤਾਬਿਕ ਪਰਿਵਾਰ ਉਸ ਦਾ ਇਲਾਜ ਗੁਰੂ ਨਾਨਕ ਦੇਵ ਹਸਪਤਾਲ ਵਿੱਚ ਕਰਵਾ ਰਿਹਾ ਹੈ। ਉੱਥੇ ਉਸ ਨੂੰ ਲੇਪਟਿਨ ਹਾਈਪੋਥੈਲੇਮਸ ਨਾਂ ਦੀ ਬੀਮਾਰੀ ਦੱਸੀ ਜਾਂਦੀ ਹੈ। ਡਾਕਟਰ ਉਸ ਦੀ ਖੁਰਾਕ ਵਿੱਚ ਕਾਰਬੋਹਾਈਡਰੇਟ ਦੀ ਵਰਤੋਂ ਨਾ ਕਰਨ ਦੀ ਸਲਾਹ ਦੇ ਰਹੇ ਹਨ। ਇਲਾਜ ਮੁਫ਼ਤ ਕੀਤਾ ਜਾ ਰਿਹਾ ਹੈ, ਪਰ ਜੇਕਰ ਕਿਸੇ ਪ੍ਰਾਈਵੇਟ ਹਸਪਤਾਲ ਵਿੱਚ ਇਲਾਜ ਕਰਵਾਇਆ ਜਾਵੇ ਤਾਂ ਲੱਖਾਂ ਰੁਪਏ ਖ਼ਰਚ ਹੋਣ ਦਾ ਅਨੁਮਾਨ ਹੈ।