ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੋ ਦਿਨਾਂ ਗੁਜਰਾਤ ਦੌਰੇ ‘ਤੇ ਹਨ। ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਸ਼ੁੱਕਰਵਾਰ ਸਵੇਰੇ ਵੰਦੇ ਭਾਰਤ ਐਕਸਪ੍ਰੈਸ ਨੂੰ ਗਾਂਧੀਨਗਰ ਸਟੇਸ਼ਨ ਤੋਂ ਹਰੀ ਝੰਡੀ ਦਿਖਾ ਕੇ ਰਵਾਨਾ ਕੀਤਾ। ਇਹ ਦੇਸ਼ ਦੀ ਤੀਜੀ ਵੰਦੇ ਭਾਰਤ ਟਰੇਨ ਹੈ। ਇਹ ਟਰੇਨ ਗਾਂਧੀਨਗਰ ਤੋਂ ਅਹਿਮਦਾਬਾਦ ਵਿਚਕਾਰ ਚੱਲੇਗੀ। ਪ੍ਰਧਾਨ ਮੰਤਰੀ ਨੇ ਨਵੀਂ ਰੇਲਗੱਡੀ ਵਿੱਚ ਸਫ਼ਰ ਵੀ ਕੀਤਾ। ਟਰੇਨ ‘ਚ ਉਨ੍ਹਾਂ ਨਾਲ ਰੇਲਵੇ ਕਰਮਚਾਰੀ, ਮਹਿਲਾ ਉੱਦਮੀ ਅਤੇ ਕਈ ਨੌਜਵਾਨ ਵੀ ਮੌਜੂਦ ਸਨ। ਇਸ ਦੌਰਾਨ ਸੂਬੇ ਦੇ ਮੁੱਖ ਮੰਤਰੀ ਭੂਪੇਂਦਰ ਪਟੇਲ, ਰੇਲ ਮੰਤਰੀ ਅਸ਼ਵਿਨੀ ਵੈਸ਼ਨਵ ਅਤੇ ਰੇਲ ਰਾਜ ਮੰਤਰੀ ਦਰਸ਼ਨਾ ਜਰਦੋਸ਼ ਵੀ ਮੌਜੂਦ ਸਨ।
ਜ਼ਿਕਰਯੋਗ ਹੈ ਕਿ ਗੁਜਰਾਤ ‘ਚ ਚੱਲਣ ਵਾਲੀ ਇਸ ਵੰਦੇ ਭਾਰਤ ਟਰੇਨ ‘ਚ ਪਹਿਲੀ ਵਾਰ KAVACH (ਟਰੇਨ ਕਲੀਸ਼ਨ ਅਵੈਡੈਂਸ ਸਿਸਟਮ) ਤਕਨੀਕ ਲਾਂਚ ਕੀਤੀ ਜਾ ਰਹੀ ਹੈ। ਇਸ ਤਕਨੀਕ ਦੀ ਮਦਦ ਨਾਲ ਦੋ ਟਰੇਨਾਂ ਦੀ ਆਹਮੋ-ਸਾਹਮਣੇ ਟੱਕਰ ਵਰਗੇ ਹਾਦਸਿਆਂ ਨੂੰ ਰੋਕਿਆ ਜਾ ਸਕੇਗਾ।
ਇਹ ਟਰੇਨ 0 ਤੋਂ 100 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਰਫਤਾਰ ਸਿਰਫ 52 ਸਕਿੰਟਾਂ ‘ਚ ਹਾਸਲ ਕਰ ਲੈਂਦੀ ਹੈ। ਯਾਤਰੀਆਂ ਦੀ ਸਹੂਲਤ ਲਈ ਰੇਲਗੱਡੀ ਵਿੱਚ ਆਟੋਮੈਟਿਕ ਦਰਵਾਜ਼ੇ ਅਤੇ ਸਲਾਈਡਿੰਗ ਫੁੱਟ ਸਟੈਂਪਸ ਦੇ ਨਾਲ-ਨਾਲ ਟੱਚ-ਫ੍ਰੀ ਸਲਾਈਡਿੰਗ ਦਰਵਾਜ਼ੇ ਲਗਾਏ ਗਏ ਹਨ।
AC ਨਿਗਰਾਨੀ ਲਈ ਕੋਚ ਕੰਟਰੋਲ ਮੈਨੇਜਮੈਂਟ ਸਿਸਟਮ, ਅਤੇ ਕੰਟਰੋਲ ਕੇਂਦਰ ਅਤੇ ਰੱਖ-ਰਖਾਅ ਸਟਾਫ ਨਾਲ ਸੰਚਾਰ ਅਤੇ ਫੀਡਬੈਕ ਲਈ GSM/GPRS ਵਰਗੀ ਆਧੁਨਿਕ ਤਕਨਾਲੋਜੀ ਦਾ ਇਸਤੇਮਾਲ ਕੀਤਾ ਗਿਆ ਹੈ।
ਅਪਾਹਜ ਯਾਤਰੀਆਂ ਲਈ ਵਿਸ਼ੇਸ਼ ਟਾਇਲਟ ਮੁਹੱਈਆ ਕਰਵਾਏ ਗਏ ਹਨ। ਇਸੇ ਤਰ੍ਹਾਂ ਨੇਤਰਹੀਣ ਯਾਤਰੀਆਂ ਦੀ ਸਹੂਲਤ ਲਈ ਸੀਟਾਂ ਦੇ ਨੰਬਰਾਂ ‘ਤੇ ਬਰੇਲ ਲਿਪੀ ਨਾਲ ਉੱਕਰੀ ਹੋਈ ਹੈ ਤਾਂ ਜੋ ਅਜਿਹੇ ਯਾਤਰੀ ਆਸਾਨੀ ਨਾਲ ਆਪਣੀਆਂ ਸੀਟਾਂ ‘ਤੇ ਪਹੁੰਚ ਸਕਣ।
