ਚੰਡੀਗੜ੍ਹ : – ਪੰਜਾਬੀ ਗਾਇਕ ਸਿੱਧੂ ਮੂਸੇਵਾਲਾ ਕਤਲ ਕੇਸ ਵਿੱਚ ਅਫਸਾਨਾ ਖਾਨ ਤੋਂ ਗੈਂਗਸਟਰਾਂ ਨਾਲ ਸਬੰਧਾਂ ਨੂੰ ਲੈ ਕੇ ਐਨਆਈਏ ਨੇ ਉਸ ਤੋਂ ਪੰਜ ਘੰਟੇ ਪੁੱਛਗਿੱਛ ਕੀਤੀ। ਜਿਸ ਤੋਂ ਬਾਅਦ ਅੱਜ ਉਸ ਨੇ ਖੁਦ ਲਾਈਵ ਹੋ ਕੇ ਵੱਡੇ ਖੁਲਾਸੇ ਕੀਤੇ ਅਤੇ ਦੱਸਿਆ ਕਿ ਏਜੰਸੀ ਨੇ ਉਸ ਤੋਂ ਕਿਹੜੇ-ਕਿਹੜੇ ਸਵਾਲ ਪੁੱਛੇ। ਇਸ ਦੇ ਨਾਲ ਹੀ ਅਫਸਾਨਾ ਖਾਨ ਨੇ ਮੀਡੀਆ ਅਤੇ ਪੰਜਾਬੀ ਮਿਊਜ਼ਿਕ ਇੰਡਸਟਰੀ ਨੂੰ ਵਿਸ਼ੇਸ਼ ਅਪੀਲ ਕਰਦੇ ਹੋਏ ਕਿਹਾ ਕਿ ਉਹ ਐਨਆਈਏ ਦੀ ਪੁੱਛਗਿੱਛ ਨੂੰ ਗਲਤ ਰੰਗ ਨਾ ਦੇਣ। ਮਿਊਜ਼ਿਕ ਇੰਡਸਟਰੀ ‘ਤੇ ਚੁਟਕੀ ਲੈਂਦਿਆਂ ਅਫਸਾਨਾ ਖਾਨ ਨੇ ਕਿਹਾ ਕਿ ਮੈਂ ਉਨ੍ਹਾਂ ‘ਚੋਂ ਨਹੀਂ ਹਾਂ ਜੋ ਅੱਜ ਗੀਤ ਗਾ ਕੇ ਆਪਣੇ ਭਰਾ ਲਈ ਇਨਸਾਫ ਦੀ ਮੰਗ ਕਰ ਰਹੇ ਹਨ। ਮੇਰੇ ਅਤੇ ਮੇਰੇ ਭਰਾ ਵਿੱਚ ਬਹੁਤ ਪਿਆਰ ਸੀ।
ਆਪਣੀ ਲਾਈਵ ‘ਚ ਅਫਸਾਨਾ ਖਾਨ ਨੂੰ ਸੋਸ਼ਲ ਮੀਡੀਆ ਯੂਜ਼ਰਸ ‘ਤੇ ਗੁੱਸੇ ‘ਚ ਵੀ ਦੇਖਿਆ ਗਿਆ, ਉਸ ਨੇ ਕਿਹਾ ਕਿ NIA ਨੇ ਮੈਨੂੰ ਕਿਸੇ ਗੈਂਗਸਟਰ ਦੇ ਸਬੰਧਾਂ ਬਾਰੇ ਨਹੀਂ ਪੁੱਛਿਆ। ਮੈਨੂੰ ਮੂਸੇਵਾਲਾ ਨਾਲ ਮੇਰੇ ਰਿਸ਼ਤੇ, ਸਾਡੇ ਪ੍ਰੋਜੈਕਟਾਂ, ਗੀਤਾਂ ਅਤੇ ਇੰਡਸਟਰੀ ਬਾਰੇ ਸਵਾਲ ਪੁੱਛੇ ਗਏ ਹਨ। ਲੋਕਾਂ ਨੂੰ ਬੋਲਣ ਤੋਂ ਪਹਿਲਾਂ ਇੱਕ ਵਾਰ ਜ਼ਰੂਰ ਸੋਚਣਾ ਚਾਹੀਦਾ ਹੈ। ਜਿਹੜੇ ਲੋਕ ਮੈਨੂੰ ਸਵਾਲ ਕਰ ਰਹੇ ਹਨ ਕਿ ਮੈਂ ਮੂਸੇਵਾਲਾ ਨੂੰ ਭਰਾ ਸਮਝਦੀ ਸੀ ਜਾਂ ਉਸ ਦੇ ਮਰਨ ਤੋਂ ਬਾਅਦ ਰੋਟੀਆਂ ਸੇਕ ਰਹੀ ਹਾਂ, ਇਹ ਕਹਿਣਾ ਬੰਦ ਕਰ ਦਿਓ। ਮੇਰੇ ਖਿਲਾਫ ਝੂਠੀਆਂ ਅਫਵਾਹਾਂ ਫੈਲਾਉਣਾ ਬੰਦ ਕਰੋ।
ਜ਼ਿਕਰਯੋਗ ਹੈ ਕਿ ਮੂਸੇਵਾਲਾ ਕਤਲ ਕਾਂਡ ‘ਚ NIA ਨੇ ਅਫਸਾਨਾ ਖਾਨ ਨੂੰ ਗੈਂਗਸਟਰ-ਅੱਤਵਾਦੀ ਸਿੰਡੀਕੇਟ ਮਾਮਲੇ ‘ਚ ਸੰਮਨ ਜਾਰੀ ਕੀਤਾ ਸੀ। ਇਸ ਸਬੰਧ ‘ਚ NIA ਨੇ ਮੰਗਲਵਾਰ ਨੂੰ ਅਫਸਾਨਾ ਖਾਨ ਤੋਂ ਕਰੀਬ 5 ਘੰਟੇ ਪੁੱਛਗਿੱਛ ਕੀਤੀ ਸੀ।