ਯੂਪੀ ਦੇ ਅਲੀਗੜ੍ਹ ਦੇ ਦਾਦੋ ‘ਚ ਆਲਮਪੁਰ ਬਾਈਪਾਸ ‘ਤੇ ਬੁੱਧਵਾਰ ਨੂੰ ਵੱਡਾ ਹਾਦਸਾ ਵਾਪਰ ਗਿਆ। ਕਾਸਗੰਜ ਰੋਡ ‘ਤੇ ਮਜ਼ਦੂਰਾਂ ਨਾਲ ਭਰੀ ਬੱਸ ਤੇ ਹਾਈ ਟੈਂਸ਼ਨ ਵਾਲੀ ਬਿਜਲੀ ਦੀ ਲਾਈਨ ਟੁੱਟ ਕੇ ਡਿਗ ਗਈ। ਹਾਈ ਟੈਂਸ਼ਨ ਲਾਈਨ ਦੇ ਡਿੱਗਣ ਕਾਰਨ ਬੱਸ ਵਿੱਚ ਕਰੰਟ ਆ ਗਿਆ ਅਤੇ ਅੱਗ ਲੱਗ ਗਈ। ਘਟਨਾ ਦੇ ਸਮੇ ਬੱਸ ਵਿੱਚ 70 ਭੱਠਾ ਮਜ਼ਦੂਰ ਸਵਾਰ ਸਨ ਬੁੱਧਵਾਰ ਦੁਪਹਿਰ ਵੇਲੇ ਇਹ ਹਾਦਸਾ ਵਾਪਰਿਆ। ਇਸ ਹਾਦਸੇ ‘ਚ 12 ਤੋਂ ਵੱਧ ਮਜ਼ਦੂਰ ਜ਼ਖਮੀ ਹੋ ਗਏ ਹਨ।
ਜਾਣਕਾਰੀ ਮੁਤਾਬਿਕ ਮਜ਼ਦੂਰਾਂ ਨੂੰ ਮਹੋਬਾ ਤੋਂ ਇੱਟਾਂ ਦੇ ਭੱਠੇ ‘ਤੇ ਕੰਮ ਕਰਨ ਲਈ ਲਿਆਂਦਾ ਜਾ ਰਿਹਾ ਸੀ। ਮਜ਼ਦੂਰਾਂ ਦਾ ਬਹੁਤ ਸਾਰਾ ਸਮਾਨ ਵੀ ਬੱਸ ਦੀ ਛੱਤ ‘ਤੇ ਰੱਖਿਆ ਹੋਇਆ ਸੀ। ਆਸਪਾਸ ਦੇ ਲੋਕਾਂ ਅਨੁਸਾਰ ਹਾਈ ਟੈਂਸ਼ਨ ਲਾਈਨ ਬਾਈਪਾਸ ਤੋਂ ਲੰਘਦੇ ਸਮੇਂ ਬੱਸ ਦੇ ਉੱਪਰ ਰੱਖੇ ਸਮਾਨ ਵਿੱਚ ਫਸ ਗਈ। ਹਾਈ ਟੈਂਸ਼ਨ ਲਾਈਨ ਦੇ ਸਮਾਨ ਵਿੱਚ ਫਸ ਜਾਣ ਕਾਰਨ ਉਹ ਟੁੱਟ ਕੇ ਚਾਲੂ ਬੱਸ ‘ਤੇ ਜਾ ਡਿੱਗੀ। ਕਰੰਟ ਲੱਗਣ ਤੋਂ ਪਹਿਲਾਂ ਬੱਸ ਵਿੱਚ ਰੌਲਾ ਪੈ ਗਿਆ ਅਤੇ ਦੇਖਦੇ ਹੀ ਦੇਖਦੇ ਬੱਸ ਨੂੰ ਅੱਗ ਲੱਗ ਗਈ। ਘਟਨਾ ਦੀ ਸੂਚਨਾ ਮਿਲਦੇ ਹੀ ਫਾਇਰ ਬ੍ਰਿਗੇਡ ਨੇ ਮੌਕੇ ‘ਤੇ ਪਹੁੰਚ ਕੇ ਅੱਗ ‘ਤੇ ਕਾਬੂ ਪਾਇਆ ਅਤੇ ਜ਼ਖਮੀਆਂ ਨੂੰ ਬਾਹਰ ਕੱਢਿਆ। ਇਸ ਤੋਂ ਬਾਅਦ ਪਿੰਡ ਦੇ ਲੋਕ ਜ਼ਖ਼ਮੀਆਂ ਨੂੰ ਲੈ ਕੇ ਤੁਰੰਤ ਹਸਪਤਾਲ ਵੱਲ ਭੱਜੇ। ਜ਼ਖ਼ਮੀਆਂ ਦਾ ਸੀਐਚਸੀ ਵਿੱਚ ਇਲਾਜ ਚੱਲ ਰਿਹਾ ਹੈ।