ਹਿਮਾਚਲ ਦੇ ਕਿਨੌਰ ‘ਚ ਜ਼ਮੀਨ ਖਿਸਕਣ ਕਾਰਨ ਹਿੰਦੁਸਤਾਨ-ਤਿੱਬਤ ਸਰਹੱਦ ਨੂੰ ਜੋੜਨ ਵਾਲਾ ਨੈਸ਼ਨਲ ਹਾਈਵੇ-5 ਪਿਛਲੇ 3 ਦਿਨਾਂ ਤੋਂ ਬੰਦ ਹੈ। ਅਗਲੇ 2 ਦਿਨਾਂ ਵੀ ਸੜਕ ਬਹਾਲ ਹੋਣ ਦੀ ਉਮੀਦ ਘੱਟ ਹੈ। ਇਸ ਕਾਰਨ ਸਮੁੱਚਾ ਕਿਨੌਰ ਜ਼ਿਲ੍ਹਾ ਦੇਸ਼ ਅਤੇ ਦੁਨੀਆ ਦੇ ਬਾਕੀ ਹਿੱਸਿਆਂ ਨਾਲੋਂ ਕੱਟਿਆ ਹੋਇਆ ਹੈ। ਕਿਨੌਰ ਜ਼ਿਲ੍ਹੇ ਵਿੱਚ ਜਨਜੀਵਨ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋਇਆ ਹੈ।
ਦੱਸੇ ਅਜ ਰਿਹਾ ਹੈ ਕਿ ਬਾਗਬਾਨਾਂ ਦੇ ਸੇਬਾਂ ਦੇ ਹਜ਼ਾਰਾਂ ਬਕਸੇ ਸੜਕ ਕਿਨਾਰੇ ਖੜ੍ਹੇ ਟਰੱਕਾਂ, ਟੱਪਰੀ ਮੰਡੀ ਅਤੇ ਬਾਗਬਾਨਾਂ ਦੇ ਗੋਦਾਮਾਂ ਵਿੱਚ ਫਸੇ ਹੋਏ ਹਨ। ਇਸ ਕਾਰਨ ਖਾਸ ਕਰਕੇ ਟਰੱਕਾਂ ਅਤੇ ਡੱਬਿਆਂ ਵਿੱਚ ਭਰੇ ਸੇਬ ਸੜਨ ਦਾ ਖ਼ਤਰਾ ਬਣਿਆ ਹੋਇਆ ਹੈ। ਤਿੰਨ ਦਿਨਾਂ ਤੋਂ ਕਿਨੌਰ ਜ਼ਿਲ੍ਹੇ ਵਿੱਚ ਰੋਜ਼ਾਨਾ ਵਰਤੋਂ ਦੀਆਂ ਖਾਣ-ਪੀਣ ਵਾਲੀਆਂ ਵਸਤਾਂ, ਦੁੱਧ, ਦਹੀਂ, ਰੋਟੀ, ਮੱਖਣ ਅਤੇ ਸਬਜ਼ੀਆਂ ਆਦਿ ਦੀ ਸਪਲਾਈ ਨਹੀਂ ਹੋ ਸਕੀ। ਈਂਧਨ ਦੀ ਸਪਲਾਈ ਨਾ ਹੋਣ ਕਾਰਨ ਹੁਣ ਪੈਟਰੋਲ ਅਤੇ ਡੀਜ਼ਲ ਦੀ ਕਮੀ ਹੋਣ ਲੱਗੀ ਹੈ।
ਨਾਥਪਾ ‘ਚ NH-5 ਸ਼ੁੱਕਰਵਾਰ ਰਾਤ 3 ਵਜੇ ਤੋਂ ਪੂਰੀ ਤਰ੍ਹਾਂ ਬੰਦ ਕਰ ਦਿੱਤਾ ਗਿਆ। ਹਾਲਾਂਕਿ ਇਸ ਤੋਂ ਦੋ ਦਿਨ ਪਹਿਲਾਂ ਪਹਾੜੀ ਤੋਂ ਵਾਰ-ਵਾਰ ਪੱਥਰ ਡਿੱਗ ਰਹੇ ਸਨ ਪਰ ਸ਼ੁੱਕਰਵਾਰ ਅੱਧੀ ਰਾਤ ਤੱਕ ਆਵਾਜਾਈ ਰੁਕ-ਰੁਕ ਕੇ ਜਾ ਰਹੀ ਸੀ। ਸ਼ੁੱਕਰਵਾਰ ਰਾਤ ਤੋਂ ਹੀ ਆਵਾਜਾਈ ਪੂਰੀ ਤਰ੍ਹਾਂ ਬੰਦ ਹੈ। ਬੀਤੇ ਕੱਲ੍ਹ ਵੀ ਹਾਈਵੇਅ ਦੇ ਦੋਵੇਂ ਪਾਸੇ 50 ਮੀਟਰ ਤੱਕ ਮਲਬਾ ਹਟਾਇਆ ਜਾ ਸਕਿਆ ਸੀ, ਜਦੋਂ ਕਿ 150 ਮੀਟਰ ਹਿੱਸੇ ‘ਤੇ ਅਜੇ ਵੀ ਵੱਡੀਆਂ ਚੱਟਾਨਾਂ ਮੌਜੂਦ ਹਨ। ਲੋਕ ਨਿਰਮਾਣ ਵਿਭਾਗ ਦਾ NH ਵਿੰਗ ਜੰਗੀ ਪੱਧਰ ‘ਤੇ ਸੜਕਾਂ ਦੀ ਮੁਰੰਮਤ ਵਿੱਚ ਲੱਗਾ ਹੋਇਆ ਹੈ।