ਨਡਾਲਾ : ਭੁਲੱਥ ਵਿਖੇ ਬੇਗੋਵਾਲ ਤੋਂ ਜਲੰਧਰ ਜਾ ਰਹੇ ਆਟੋ ਰਿਕਸ਼ਾ ਦੀ ਕਾਰ ਨਾਲ ਟੱਕਰ ਹੋਣ ਕਾਰਨ ਆਟੋ ਵਿਚ ਬੈਠੇ 3 ਪਰਵਾਸੀ ਮਜ਼ਦੂਰਾਂ ਦੀ ਮੌਤ ਹੋ ਗਈ ਜਦਕਿ 9 ਮਜ਼ਦੂਰ ਜ਼ਖਮੀ ਹੋ ਗਏ ਜਿਨ੍ਹਾਂ ਨੂੰ ਭੁਲੱਥ ਤੇ ਜਲੰਧਰ ਦੇ ਹਸਪਤਾਲਾਂ ਵਿੱਚ ਦਾਖ਼ਲ ਕਰਵਾਇਆ ਗਿਆ ਹੈ। ਭੁਲੱਥ ਪੁਲਿਸ ਨੇ ਕਾਰ ਚਾਲਕ ਨੂੰ ਗਿ੍ਰਫ਼ਤਾਰ ਕਰਕੇ ਮਾਮਲਾ ਦਰਜ ਕਰ ਲਿਆ ਹੈ । ਪੁਲਿਸ ਨੂੰ ਦਿੱਤੇ ਬਿਆਨਾਂ ਵਿੱਚ ਕੁਲਦੀਪ ਪਾਲ ਪੁੱਤਰ ਬਾਈ ਲਾਲ ਵਾਸੀ ਨੇ ਦੱਸਿਆ ਕਿ ਉਹ ਆਪਣੇ 10-12 ਸਾਥੀਆਂ ਸਮੇਤ ਵੇਟਰ ਦਾ ਕੰਮ-ਕਾਰ ਕਰਦਾ ਹੈ। 8 ਜਨਵਰੀ ਨੂੰ ਉਸ ਸਮੇਂ 12 ਵਿਅਕਤੀ ਵੇਟਰ ਦਾ ਕੰਮ ਕਰਨ ਲਈ ਕਸਬਾ ਬੇਗੋਵਾਲ ਦੇ ਰੈਸਟੋਰੈਂਟਾਂ ਵਿਖੇ ਆਟੋ ਰਿਕਸ਼ਾ ’ਚ ਜਾ ਰਹੇ ਸਨ।
ਸ਼ਨਿਚਰਵਾਰ ਰਾਤ 9.30 ਵਜੇ ਵਾਪਸ ਜਲੰਧਰ ਜਾਂਦੇ ਸਮੇਂ ਜਦ ਮਹਾਰਾਜਾ ਪੈਲੇਸ ਭੁਲੱਥ ਨਜ਼ਦੀਕ ਪੁੱਜੇ ਤਾਂ ਤੇਜ਼ ਰਫਤਾਰ ਐਕਸਯੂਵੀ ਕਾਰ ਨੇ ਆਟੋ ਰਿਕਸ਼ੇ ਟੱਕਰ ਮਾਰ ਦਿੱਤੀ। ਜ਼ੋਰਦਾਰ ਟੱਕਰ ਕਾਰਨ ਆਟੋ ਪਲਟ ਗਿਆ। ਆਟੋ ਵਿਚ ਸਵਾਰ ਸਾਰੇ ਜ਼ਖਮੀਆਂ ਨੂੰ ਸਿਵਲ ਹਸਪਤਾਲ ਭੁਲੱਥ ਪਹੁੰਚਾਇਆ ਗਿਆ ਜਿੱਥੇ ਡਾਕਟਰਾਂ ਨੇ ਸੁਮਿਤ ਮਿਸ਼ਰਾ ਅਤੇ ਆਸ਼ੂਤੋਸ਼ ਉਰਫ ਸੋਨੂੰ ਨੂੰ ਮ੍ਰਿਤਕ ਐਲਾਨ ਦਿੱਤਾ ਤੇ 5 ਜਣਿਆਂ ਨੂੰ ਦਾਖ਼ਲ ਕਰ ਲਿਆ ਤੇ 5 ਜਣਿਆਂ ਨੂੰ ਗੰਭੀਰ ਜ਼ਖਮੀ ਹੋਣ ਕਾਰਨ ਸਿਵਲ ਹਸਪਤਾਲ ਜਲੰਧਰ ਰੈਫਰ ਕਰ ਦਿੱਤਾ ਗਿਆ। ਇਸੇ ਦੌਰਾਨ ਜ਼ਖਮਾਂ ਦੀ ਤਾਬ ਨਾ ਝੱਲਦਿਆਂ ਮਨੀਸ਼ ਯਾਦਵ ਦੀ ਵੀ ਮੌਤ ਹੋ ਗਈ। ਭੁਲੱਥ ਪੁਲਿਸ ਨੇ ਕਾਰ ਦੇ ਚਾਲਕ ਹਰਪ੍ਰੀਤ ਸਿੰਘ ਨੂੰ ਕਾਬੂ ਕਰਕੇ ਅਗਲੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।
