ਪੁਰਤਗਾਲ ਦੇ ਕਪਤਾਨ ਅਤੇ ਸਭ ਤੋਂ ਮਹਾਨ ਫੁੱਟਬਾਲ ਖਿਡਾਰੀਆਂ ਵਿੱਚੋਂ ਇੱਕ ਕ੍ਰਿਸਟੀਆਨੋ ਰੋਨਾਲਡੋ ਨੇ ਇੱਕ ਵੱਡੀ ਉਪਲਬਧੀ ਹਾਸਲ ਕੀਤੀ ਹੈ। ਉਹ ਅੰਤਰਰਾਸ਼ਟਰੀ ਫੁਟਬਾਲ ਵਿੱਚ 200 ਮੈਚ ਖੇਡਣ ਵਾਲੇ ਪਹਿਲੇ ਖਿਡਾਰੀ ਬਣ ਗਏ ਹਨ। 38 ਸਾਲਾ ਰੋਨਾਲਡੋ ਨੇ ਆਪਣੇ ਡੈਬਿਊ ਤੋਂ ਲਗਭਗ 20 ਸਾਲ ਬਾਅਦ ਪੁਰਤਗਾਲ ਲਈ 200 ਮੈਚ ਪੂਰੇ ਕੀਤੇ। ਉਸ ਨੂੰ ਆਈਸਲੈਂਡ ਖਿਲਾਫ ਮੈਚ ਤੋਂ ਪਹਿਲਾਂ ਇਸ ਉਪਲਬਧੀ ਲਈ ਸਨਮਾਨਿਤ ਵੀ ਕੀਤਾ ਗਿਆ। ਰੋਨਾਲਡੋ ਦਾ ਨਾਂ ਗਿਨੀਜ਼ ਵਰਲਡ ਰਿਕਾਰਡ ‘ਚ ਦਰਜ ਹੋ ਗਿਆ ਹੈ। ਰੋਨਾਲਡੋ ਨੇ ਪੁਰਤਗਾਲ ਨੂੰ ਗਰੁੱਪ ਜੇ ‘ਚ ਚੌਥੀ ਜਿੱਤ ਦਿਵਾਈ। ਟੀਮ ਨੇ ਚਾਰ ਮੈਚਾਂ ਵਿੱਚ ਚਾਰ ਮੈਚ ਜਿੱਤ ਚੁਕੀ ਹੈ। ਰੋਨਾਲਡੋ ਦੇ ਹੁਣ ਅੰਤਰਰਾਸ਼ਟਰੀ ਪੱਧਰ ‘ਤੇ 123 ਗੋਲ ਹੋ ਗਏ ਹਨ।
200 ਮੈਚ ਖੇਡਣ ਤੋਂ ਬਾਅਦ ਰੋਨਾਲਡੋ ਨੇ ਕਿਹਾ ਕਿ “ਮੈਂ ਬਹੁਤ ਖੁਸ਼ ਹਾਂ। ਇਹ ਉਹ ਪਲ ਹੈ ਜਿਸਦੀ ਤੁਸੀਂ ਕਦੇ ਉਮੀਦ ਨਹੀਂ ਕਰਦੇ. 200 ਅੰਤਰਰਾਸ਼ਟਰੀ ਮੈਚ ਮੇਰੇ ਲਈ ਇੱਕ ਸ਼ਾਨਦਾਰ ਪ੍ਰਾਪਤੀ ਹੈ।” ਰੋਨਾਲਡੋ ਸਮੇਤ ਉਸਦੀ ਟੀਮ ਨੇ ਮੈਚ ਵਿੱਚ ਕਈ ਮੌਕੇ ਗੁਆਏ, ਪਰ ਅੰਤ ਵਿੱਚ ਪੁਰਤਗਾਲ ਦੀ ਟੀਮ ਨੂੰ ਸਫਲਤਾ ਮਿਲੀ। ਰੋਨਾਲਡੋ ਨੇ ਇਸ ਮੈਚ ਤੋਂ ਇਕ ਵਾਰ ਫਿਰ ਸਾਬਤ ਕਰ ਦਿੱਤਾ ਕਿ ਉਹ ਯੂਰੋ ਕੱਪ 2024 ਲਈ ਤਿਆਰ ਹੈ।
ਸਭ ਤੋਂ ਜ਼ਿਆਦਾ ਮੈਚਾਂ ਦੀ ਗੱਲ ਕਰੀਏ ਤਾਂ ਰੋਨਾਲਡੋ ਤੋਂ ਬਾਅਦ ਕੁਵੈਤ ਦਾ ਬਦਰ ਅਲ ਮੁਤਾਵਾ ਦੂਜੇ ਨੰਬਰ ‘ਤੇ ਹੈ। ਉਸ ਨੇ 196 ਮੈਚ ਖੇਡੇ ਹਨ। ਮੇਸੀ 175 ਮੈਚਾਂ ਦੇ ਨਾਲ ਸੂਚੀ ‘ਚ 11ਵੇਂ ਸਥਾਨ ‘ਤੇ ਹੈ, ਜਦਕਿ ਭਾਰਤ ਦੇ ਸੁਨੀਲ ਛੇਤਰੀ ਨੇ 137 ਮੈਚ ਖੇਡੇ ਹਨ।