ਭਾਰਤ ਦੇ ਚੰਦਰਯਾਨ-3 ਨੇ ਬੁੱਧਵਾਰ ਨੂੰ ਚੰਦਰਮਾ ‘ਤੇ ਸਫਲ ਲੈਂਡਿੰਗ ਕੀਤੀ। ਇਸ ਨਾਲ ਭਾਰਤ ਚੰਦਰਮਾ ਦੇ ਦੱਖਣੀ ਧਰੁਵ ‘ਤੇ ਪਹੁੰਚਣ ਵਾਲਾ ਦੁਨੀਆ ਦਾ ਪਹਿਲਾ ਦੇਸ਼ ਬਣ ਗਿਆ ਹੈ। ਇਸ ਦੇ ਨਾਲ ਹੀ ਇਸਰੋ ਦੇ ਲਾਈਵ ਸਟ੍ਰੀਮਿੰਗ ਲਿੰਕ ਨੇ ਵੀ ਯੂਟਿਊਬ ‘ਤੇ ਇਤਿਹਾਸ ਰਚ ਦਿੱਤਾ। ਚੰਦਰਯਾਨ-3 ਦੇ ਲੈਂਡਿੰਗ ਦੀ ਲਾਈਵ ਸਟ੍ਰੀਮਿੰਗ ਨੂੰ 8.06 ਮਿਲੀਅਨ ਲੋਕਾਂ ਨੇ ਇੱਕੋ ਸਮੇਂ ਦੇਖਿਆ, ਜਿਸ ਨੇ ਯੂਟਿਊਬ ਇਤਿਹਾਸ ਦੇ ਸਾਰੇ ਰਿਕਾਰਡ ਤੋੜ ਦਿੱਤੇ।
ਦੱਸ ਦਈਏ ਕਿ ਹੁਣ ਤਕ ਯੂਟਿਊਬ ‘ਤੇ, ਬ੍ਰਾਜ਼ੀਲ ਬਨਾਮ. ਕੋਰੀਆ ਦੇ ਫੁੱਟਬਾਲ ਮੈਚ ਦੀ ਲਾਈਵ ਸਟ੍ਰੀਮਿੰਗ ਨੂੰ 6.15 ਮਿਲੀਅਨ ਲੋਕਾਂ ਨੇ ਇੱਕੋ ਸਮੇਂ ਦੇਖਿਆ, ਜਿਸ ਨੂੰ ਬੁੱਧਵਾਰ ਨੂੰ ਚੰਦਰਯਾਨ-3 ਦੀ ਲਾਈਵ ਸਟ੍ਰੀਮਿੰਗ ਨੇ ਮਾਤ ਦਿੱਤੀ। ਇਸ ਦੇ ਨਾਲ ਹੀ ਬ੍ਰਾਜ਼ੀਲ ਬਨਾਮ ਕ੍ਰੋਏਸ਼ੀਆ ਫੁੱਟਬਾਲ ਮੈਚ ਤੀਜੇ ਨੰਬਰ ‘ਤੇ ਹੈ, ਜਿਸ ਨੂੰ 5.2 ਮਿਲੀਅਨ ਲੋਕਾਂ ਨੇ ਇੱਕੋ ਸਮੇਂ ਦੇਖਿਆ ਸੀ।
ਇਸਰੋ ਦੇ ਅਧਿਕਾਰਤ ਯੂਟਿਊਬ ਚੈਨਲ ‘ਤੇ ਚੰਦਰਯਾਨ-3 ਦੀ ਲੈਂਡਿੰਗ ਤੋਂ ਪਹਿਲਾਂ ਸਬਸਕ੍ਰਾਈਬਰਸ ਦੀ ਗਿਣਤੀ 2.68 ਮਿਲੀਅਨ ਯਾਨੀ ਕਰੀਬ 26 ਲੱਖ ਸੀ, ਜੋ ਹੁਣ ਸਫਲ ਲੈਂਡਿੰਗ ਤੋਂ ਬਾਅਦ ਵਧ ਕੇ 35 ਲੱਖ ਹੋ ਗਈ ਹੈ। ਲੈਂਡਿੰਗ ਦਾ ਸਿੱਧਾ ਪ੍ਰਸਾਰਣ ਲਗਭਗ ਇੱਕ ਘੰਟਾ 11 ਮਿੰਟ ਤੱਕ ਚੱਲਿਆ ਅਤੇ ਇਸਰੋ ਨੇ ਸਿਰਫ ਇੱਕ ਘੰਟੇ ਵਿੱਚ ਨੌਂ ਲੱਖ ਸਬਸਕ੍ਰਾਈਬਰਸ ਪ੍ਰਾਪਤ ਕੀਤੇ। ਇਸਰੋ ਦੇ ਲਾਈਵ ਪ੍ਰਸਾਰਣ ਨੂੰ ਇੱਕੋ ਸਮੇਂ ਤਿੰਨ ਗੁਣਾ ਤੋਂ ਵੱਧ ਸਬਸਕ੍ਰਾਈਬਰਸ ਨੇ ਦੇਖਿਆ।