ਪੁਲਾੜ ‘ਚ 371 ਦਿਨ ਬਿਤਾਉਣ ਤੋਂ ਬਾਅਦ ਅਮਰੀਕੀ ਪੁਲਾੜ ਯਾਤਰੀ ਫਰੈਂਕ ਰੂਬੀਓ ਧਰਤੀ ‘ਤੇ ਵਾਪਿਸ ਪਰਤ ਆਏ ਹਨ। ਇਨ੍ਹਾਂ ਨੂੰ ਕਜ਼ਾਕਿਸਤਾਨ ਦੇ ਦੂਰ-ਦੁਰਾਡੇ ਦੇ ਇਲਾਕੇ ‘ਚ ਸੋਯੂਜ਼ ਕੈਪਸੂਲ ‘ਚੋ ਉਤਾਰਿਆ ਗਿਆ। ਉਸ ਦੇ ਨਾਲ ਰੂਸੀ ਪੁਲਾੜ ਯਾਤਰੀ ਸਰਗੇਈ ਪ੍ਰੋਕੋਪਯੇਵ ਅਤੇ ਦਮਿਤਰੀ ਪੇਟਲਿਨ ਵੀ ਪੁਲਾੜ ਤੋਂ ਪਰਤ ਆਏ ਹਨ।
ਰੂਬੀਓ ਪੁਲਾੜ ਵਿੱਚ ਸਭ ਤੋਂ ਲੰਬੇ ਸਮੇਂ ਤੱਕ ਰਹਿਣ ਵਾਲੇ ਅਮਰੀਕੀ ਪੁਲਾੜ ਯਾਤਰੀ ਬਣ ਗਏ ਹਨ। ਉਸ ਨੇ ਇਹ ਰਿਕਾਰਡ 11 ਸਤੰਬਰ ਨੂੰ ਬਣਾਇਆ। ਉਹ 371 ਦਿਨ ਪੁਲਾੜ ਵਿੱਚ ਰਹੇ। ਇਸ ਤੋਂ ਪਹਿਲਾਂ ਅਮਰੀਕੀ ਪੁਲਾੜ ਯਾਤਰੀ ਮਾਰਕ ਵੈਂਡੇ ਹੀ ਨੇ ਸਾਲ 2022 ‘ਚ 355 ਦਿਨ ਦਾ ਰਿਕਾਰਡ ਬਣਾਇਆ ਸੀ। ਹਾਲਾਂਕਿ ਹੁਣ ਤੱਕ ਪੁਲਾੜ ‘ਚ ਸਭ ਤੋਂ ਜ਼ਿਆਦਾ ਸਮਾਂ ਬਿਤਾਉਣ ਦਾ ਰਿਕਾਰਡ ਰੂਸੀ ਪੁਲਾੜ ਯਾਤਰੀ ਵੈਲੇਰੀ ਪੋਲਿਆਕੋਵ ਦੇ ਨਾਂ ਹੈ, ਜਿਨ੍ਹਾਂ ਨੇ 437 ਦਿਨ ਪੁਲਾੜ ‘ਚ ਬਿਤਾਏ ਸਨ।
ਦੱਸ ਦਈਏ ਕਿ ਫਰੈਂਕ ਰੂਬੀਓ ਨੂੰ 180 ਦਿਨਾਂ ਲਈ ਪੁਲਾੜ ਮਿਸ਼ਨ ‘ਤੇ ਭੇਜਿਆ ਗਿਆ ਸੀ, ਪਰ ਉਸਦਾ ਪੁਲਾੜ ਯਾਨ ਕਬਾੜ ਨਾਲ ਟਕਰਾ ਗਿਆ। ਇਸ ਕਾਰਨ ਵਾਹਨ ਦਾ ਕੂਲਿੰਗ ਸਿਸਟਮ ਖਰਾਬ ਹੋ ਗਿਆ। ਇਸ ਕਾਰਨ ਅਮਰੀਕੀ ਪੁਲਾੜ ਯਾਤਰੀ ਨੂੰ ਲੰਬਾ ਸਮਾਂ ਰੁਕਣਾ ਪਿਆ। ਅਮਰੀਕਾ ਦੇ ਫਰੈਂਕ ਰੂਬੀਓ ਨੇ ਸਪੇਸ ਸਟੇਸ਼ਨ ‘ਤੇ ਰਹਿੰਦਿਆਂ ਧਰਤੀ ਦੇ ਦੁਆਲੇ 5963 ਚੱਕਰ ਲਗਾਏ। ਇਸ ਦੌਰਾਨ ਉਸ ਨੇ 15 ਕਰੋੜ 74 ਲੱਖ 12 ਹਜ਼ਾਰ 306 ਮੀਲ ਦਾ ਸਫ਼ਰ ਤੈਅ ਕੀਤਾ। ਜੇਕਰ ਇਸ ਦੀ ਤੁਲਨਾ ਚੰਦਰਮਾ ਦੀ ਯਾਤਰਾ ਨਾਲ ਕੀਤੀ ਜਾਵੇ ਤਾਂ ਇਸ ਦੂਰੀ ‘ਤੇ ਕੋਈ ਵੀ ਘੱਟੋ-ਘੱਟ 328 ਵਾਰ ਚੰਦ ਤੇ ਜਾ ਕੇ ਵਾਪਸ ਆ ਸਕਦਾ ਹੈ।