ਭਾਰਤ ਅਤੇ ਅਫਗਾਨਿਸਤਾਨ ਵਿਚਾਲੇ ਵਿਸ਼ਵ ਕੱਪ ਕ੍ਰਿਕਟ ਮੈਚ ਬੁੱਧਵਾਰ ਦੁਪਹਿਰ ਨੂੰ ਦਿੱਲੀ ਦੇ ਅਰੁਣ ਜੇਤਲੀ ਸਟੇਡੀਅਮ ‘ਚ ਖੇਡਿਆ ਜਾਵੇਗਾ। ਮੈਚ ਵਿੱਚ ਦਰਸ਼ਕਾਂ ਦੀ ਭਾਰੀ ਭੀੜ ਇਕੱਠੀ ਹੋਣ ਦੀ ਸੰਭਾਵਨਾ ਹੈ। ਅਜਿਹੇ ‘ਚ ਦਿੱਲੀ ਟ੍ਰੈਫਿਕ ਪੁਲਸ ਨੇ ਸਟੇਡੀਅਮ ਨੇੜੇ ਕੁਝ ਸੜਕਾਂ ‘ਤੇ ਵਾਹਨਾਂ ਦੇ ਦਾਖਲੇ ‘ਤੇ ਪਾਬੰਦੀ ਲਗਾ ਦਿੱਤੀ ਹੈ। ਟਰੈਫਿਕ ਪੁਲੀਸ ਨੇ ਵਾਹਨ ਚਾਲਕਾਂ ਨੂੰ ਬਦਲਵੇਂ ਰਸਤੇ ਅਪਣਾਉਣ ਦੀ ਸਲਾਹ ਦਿੱਤੀ ਹੈ।
ਦਿੱਲੀ ਟ੍ਰੈਫਿਕ ਪੁਲਸ ਦੇ ਅਧਿਕਾਰੀ ਨੇ ਦੱਸਿਆ ਕਿ ਮੈਚ ਦੌਰਾਨ ਦਰਿਆਗੰਜ ਤੋਂ ਬਹਾਦਰ ਸ਼ਾਹ ਜ਼ਫਰ ਮਾਰਗ ਅਤੇ ਗੁਰੂ ਨਾਨਕ ਚੌਕ ਤੋਂ ਆਸਫ ਅਲੀ ਰੋਡ ਤੱਕ ਕਿਸੇ ਵੀ ਭਾਰੀ ਵਾਹਨ ਅਤੇ ਬੱਸ ਨੂੰ ਚੱਲਣ ਦੀ ਇਜਾਜ਼ਤ ਨਹੀਂ ਦਿੱਤੀ ਜਾਵੇਗੀ।
ਟ੍ਰੈਫਿਕ ਪੁਲਸ ਨੇ ਵਾਹਨ ਚਾਲਕਾਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਬੁੱਧਵਾਰ ਨੂੰ ਦੁਪਹਿਰ 12 ਵਜੇ ਤੋਂ ਲੈ ਕੇ ਅੱਧੀ ਰਾਤ 12 ਵਜੇ ਤੱਕ ਰਾਜਘਾਟ ਤੋਂ ਜਵਾਹਰ ਲਾਲ ਨਹਿਰੂ ਮਾਰਗ, ਕਮਲਾ ਮਾਰਕੀਟ ਤੋਂ ਰਾਜਘਾਟ, ਆਸਫ ਅਲੀ ਰੋਡ ਤੁਰਕਮਾਨ ਗੇਟ ਤੋਂ ਦਿੱਲੀ ਗੇਟ ਅਤੇ ਬਹਾਦਰ ਸ਼ਾਹ ਮਾਰਗ, ਜ਼ਫਰ ਮਾਰਗ ਤੋਂ ਰਾਮਚਰਨ ਅਗਰਵਾਲ ਚੌਕ ਤੋਂ ਦਿੱਲੀ ਗੇਟ ਤੱਕ ਆਵਾਜਾਈ ਤੋਂ ਬਚਣ।
ਇਸ ਦੇ ਨਾਲ ਹੀ ਟ੍ਰੈਫਿਕ ਪੁਲਸ ਅਧਿਕਾਰੀ ਨੇ ਦੱਸਿਆ ਕਿ ਗੇਟ ਨੰਬਰ 1 ਤੋਂ 7 ਤੱਕ ਦੇ ਐਂਟਰੀ ਗੇਟ ਸਟੇਡੀਅਮ ਦੇ ਦੱਖਣੀ ਹਿੱਸੇ ‘ਚ ਸਥਿਤ ਹਨ ਅਤੇ ਇਨ੍ਹਾਂ ਗੇਟਾਂ ‘ਤੇ ਐਂਟਰੀ ਬਹਾਦਰ ਸ਼ਾਹ ਜ਼ਫਰ ਮਾਰਗ ਤੋਂ ਹੋਵੇਗੀ। ਗੇਟ ਨੰਬਰ 8 ਤੋਂ 15 ਸਟੇਡੀਅਮ ਦੇ ਪੂਰਬੀ ਪਾਸੇ ਹਨ। ਇਨ੍ਹਾਂ ਗੇਟਾਂ ‘ਤੇ ਐਂਟਰੀ ਅੰਬੇਡਕਰ ਸਟੇਡੀਅਮ ਬੱਸ ਟਰਮੀਨਲ ਦੇ ਅੱਗੇ ਜਵਾਹਰ ਲਾਲ ਨਹਿਰੂ ਮਾਰਗ ਤੋਂ ਹੋਵੇਗੀ। ਗੇਟ ਨੰਬਰ 16 ਤੋਂ 18 ਸਟੇਡੀਅਮ ਦੇ ਪੱਛਮੀ ਪਾਸੇ ਸਥਿਤ ਹਨ ਅਤੇ ਇਨ੍ਹਾਂ ਗੇਟਾਂ ‘ਤੇ ਐਂਟਰੀ ਪੈਟਰੋਲ ਪੰਪ ਨੇੜੇ ਬਹਾਦਰ ਸ਼ਾਹ ਜ਼ਫਰ ਮਾਰਗ ਤੋਂ ਹੋਵੇਗੀ।