ਟਾਟਾ ਗਰੁੱਪ ਵੋਲਟਾਸ ਲਿਮਟਿਡ ਦੇ ਘਰੇਲੂ ਉਪਕਰਣ ਕਾਰੋਬਾਰ ਨੂੰ ਵੇਚਣ ‘ਤੇ ਵਿਚਾਰ ਕਰ ਰਿਹਾ ਹੈ। ਸੂਤਰਾਂ ਦੇ ਹਵਾਲੇ ਨਾਲ ਬਲੂਮਬਰਗ ਦੀ ਇਕ ਰਿਪੋਰਟ ‘ਚ ਇਹ ਦਾਅਵਾ ਕੀਤਾ ਗਿਆ ਹੈ। ਸੂਤਰ ਮੁਤਾਬਕ, ਟਾਟਾ ਗਰੁੱਪ ਨੂੰ ਲੱਗਦਾ ਹੈ ਕਿ ਇਹ ਬਹੁਤ ਹੀ ਮੁਕਾਬਲੇਬਾਜ਼ੀ ਵਾਲਾ ਬਾਜ਼ਾਰ ਹੈ ਅਤੇ ਆਉਣ ਵਾਲੇ ਦਿਨਾਂ ‘ਚ ਇਸ ਨੂੰ ਆਪਣਾ ਕਾਰੋਬਾਰ ਵਧਾਉਣ ‘ਚ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ।
ਸੂਤਰਾਂ ਨੇ ਦੱਸਿਆ ਕਿ ਇਹ ਵਿਚਾਰ ਅਜੇ ਸ਼ੁਰੂਆਤੀ ਪੜਾਅ ‘ਤੇ ਹਨ।ਅੱਜ ਕੰਪਨੀ ਦੇ ਸ਼ੇਅਰਾਂ ਵਿੱਚ 1.70% ਦੀ ਗਿਰਾਵਟ ਦੇਖੀ ਗਈ ਹੈ। ਇਹ 14.10 ਰੁਪਏ (-1.70%) ਦੀ ਗਿਰਾਵਟ ਨਾਲ 813.80 ਰੁਪਏ ‘ਤੇ ਬੰਦ ਹੋਇਆ। ਪਿਛਲੇ ਇੱਕ ਸਾਲ ਵਿੱਚ ਇਸਦੇ ਸ਼ੇਅਰਾਂ ਵਿੱਚ 22.80 (-2.73%) ਦੀ ਗਿਰਾਵਟ ਦੇਖੀ ਗਈ ਹੈ। ਇਕ ਸਾਲ ਪਹਿਲਾਂ ਕੰਪਨੀ ਦਾ ਸ਼ੇਅਰ 836.60 ਰੁਪਏ ‘ਤੇ ਸੀ। ਜਦੋਂ ਕਿ 14 ਅਕਤੂਬਰ 2021 ਨੂੰ ਕੰਪਨੀ ਦੇ ਸ਼ੇਅਰ 1324 ਰੁਪਏ ‘ਤੇ ਸਨ। ਯਾਨੀ ਹੁਣ ਤੱਕ 36% ਤੋਂ ਜ਼ਿਆਦਾ ਦੀ ਗਿਰਾਵਟ ਆਈ ਹੈ।
ਹਾਲ ਹੀ ਵਿੱਚ, ਵੋਲਟਾਸ ਵਿੱਤੀ ਸਾਲ 2023-24 ਦੀ ਦੂਜੀ ਤਿਮਾਹੀ (ਸਤੰਬਰ ਤਿਮਾਹੀ) ਦੇ ਨਤੀਜੇ ਜਾਰੀ ਕੀਤੇ ਗਏ ਸਨ। ਇਸ ਦੇ ਮੁਤਾਬਕ ਇਸ ਸਮੇਂ ਦੌਰਾਨ ਕੰਪਨੀ ਦਾ ਐਡਜਸਟਡ ਮੁਨਾਫਾ ਪਿਛਲੇ ਸਾਲ ਦੀ ਇਸੇ ਤਿਮਾਹੀ ਦੇ ਮੁਕਾਬਲੇ 64.4 ਫੀਸਦੀ ਘੱਟ ਕੇ 35.6 ਕਰੋੜ ਰੁਪਏ ਰਹਿ ਗਿਆ ਹੈ। ਪਿਛਲੇ ਸਾਲ ਦੀ ਦੂਜੀ ਤਿਮਾਹੀ ‘ਚ ਕੰਪਨੀ ਦਾ ਮੁਨਾਫਾ 100 ਕਰੋੜ ਰੁਪਏ ਰਿਹਾ ਸੀ। ਜਦੋਂ ਕਿ ਆਮਦਨ 29.7% ਘਟ ਕੇ 2293 ਕਰੋੜ ਰੁਪਏ ਰਹਿ ਗਈ।
ਵੋਲਟਾਸ ਦੀ ਸ਼ੁਰੂਆਤ 1954 ਵਿੱਚ ਹੋਈ ਸੀ। ਇਹ ਏਅਰ ਕੰਡੀਸ਼ਨਰ, ਵਾਟਰ ਕੂਲਰ ਅਤੇ ਫਰਿੱਜ ਸਮੇਤ ਕਈ ਉਤਪਾਦ ਬਣਾਉਂਦਾ ਹੈ। ਕੰਪਨੀ ਭਾਰਤ, ਮੱਧ ਪੂਰਬ, ਦੱਖਣ-ਪੂਰਬੀ ਏਸ਼ੀਆ ਅਤੇ ਅਫਰੀਕਾ ਵਿੱਚ ਕੰਮ ਕਰਦੀ ਹੈ। ਕੰਪਨੀ ਦੇ ਸਤੰਬਰ ਤਿਮਾਹੀ ਦੇ ਨਤੀਜਿਆਂ ਦੇ ਅਨੁਸਾਰ, ਭਾਰਤ ਵਿੱਚ ਫਰਿੱਜ ਲਈ ਇਸਦੀ ਮਾਰਕੀਟ ਹਿੱਸੇਦਾਰੀ 3.3% ਅਤੇ ਵਾਸ਼ਿੰਗ ਮਸ਼ੀਨਾਂ ਲਈ 5.4% ਹੈ।
