ਅਮਰੀਕੀ ਫੌਜੀ ਜਹਾਜ਼ ਸੀਵੀ-22 ਓਸਪ੍ਰੇ ਕਰੈਸ਼ ਹੋ ਗਿਆ। ਇੰਜਣ ਨੂੰ ਅੱਗ ਲੱਗਣ ਤੋਂ ਬਾਅਦ ਇਹ ਜਾਪਾਨ ਦੇ ਯਾਕੁਸ਼ੀਮਾ ਟਾਪੂ ਨੇੜੇ ਸਮੁੰਦਰ ਵਿੱਚ ਡਿੱਗ ਗਿਆ। ਜਹਾਜ਼ ‘ਚ 8 ਲੋਕ ਸਵਾਰ ਸਨ। ਬੀਬੀਸੀ ਮੁਤਾਬਕ ਮਛੇਰਿਆਂ ਨੇ ਸਮੁੰਦਰ ਕਿਨਾਰੇ ਇੱਕ ਵਿਅਕਤੀ ਨੂੰ ਬਚਾਇਆ ਹੈ। ਹਾਲਾਂਕਿ ਉਸ ਦੀ ਹਾਲਤ ਬਾਰੇ ਜਾਣਕਾਰੀ ਨਹੀਂ ਦਿੱਤੀ ਗਈ। ਰਿਪੋਰਟ ਮੁਤਾਬਕ ਯਾਕੁਸ਼ੀਮਾ ਟਾਪੂ ਨੇੜੇ ਜਹਾਜ਼ ਦਾ ਮਲਬਾ ਵੀ ਮਿਲਿਆ ਹੈ। ਜਾਪਾਨੀ ਮੀਡੀਆ NHK ਮੁਤਾਬਕ ਅਮਰੀਕੀ ਫੌਜ ਦਾ ਜਹਾਜ਼ ਯਾਕੁਸ਼ੀਮਾ ਹਵਾਈ ਅੱਡੇ ‘ਤੇ ਉਤਰਨ ਵਾਲਾ ਸੀ।
ਜਾਪਾਨ ਦੇ ਮੁੱਖ ਕੈਬਨਿਟ ਸਕੱਤਰ ਹਿਰੋਕਾਜ਼ੂ ਮਾਤਸੁਨੋ ਨੇ ਕਿਹਾ ਕਿ ਜਹਾਜ਼ ਯਾਮਾਗੁਚੀ ਦੇ ਇਵਾਕੁਨੀ ਬੇਸ ਤੋਂ ਓਕੀਨਾਵਾ ਦੇ ਕਡੇਨਾ ਬੇਸ ਵੱਲ ਜਾ ਰਿਹਾ ਸੀ। ਦੁਪਹਿਰ 2:40 ਵਜੇ (ਭਾਰਤੀ ਸਮੇਂ ਅਨੁਸਾਰ 11:10 ਵਜੇ) ਜਹਾਜ਼ ਰਡਾਰ ਤੋਂ ਗਾਇਬ ਹੋ ਗਿਆ। ਇਸ ਤੋਂ ਠੀਕ 7 ਮਿੰਟ ਬਾਅਦ ਕੋਸਟ ਗਾਰਡ ਨੂੰ ਜਹਾਜ਼ ਦੇ ਕਰੈਸ਼ ਹੋਣ ਦੀ ਖਬਰ ਮਿਲੀ। ਜਾਪਾਨੀ ਮੀਡੀਆ NHK ਮੁਤਾਬਕ ਹਾਦਸੇ ਦੀ ਖਬਰ ਮਿਲਦੇ ਹੀ 2 ਹੈਲੀਕਾਪਟਰ ਅਤੇ 6 ਕਿਸ਼ਤੀਆਂ ਨੂੰ ਬਚਾਅ ਕਾਰਜ ਲਈ ਭੇਜਿਆ ਗਿਆ।
ਰਾਇਟਰਜ਼ ਦੇ ਅਨੁਸਾਰ, ਜਾਪਾਨ ਵਿੱਚ ਓਸਪ੍ਰੇ ਦੀ ਤਾਇਨਾਤੀ ਨੂੰ ਲੈ ਕੇ ਬਹਿਸ ਹੋਈ ਸੀ। ਇਸ ਤੈਨਾਤੀ ਦਾ ਵਿਰੋਧ ਕਰ ਰਹੇ ਲੋਕਾਂ ਨੇ ਕਿਹਾ ਕਿ ਓਸਪ੍ਰੇ ਦੇ ਕਰੈਸ਼ ਹੋਣ ਦਾ ਖਤਰਾ ਹੈ। ਹਾਲਾਂਕਿ, ਅਮਰੀਕੀ ਅਤੇ ਜਾਪਾਨੀ ਫੌਜ ਦਾ ਕਹਿਣਾ ਹੈ ਕਿ ਓਸਪ੍ਰੇ ਬਿਲਕੁਲ ਸੁਰੱਖਿਅਤ ਉੱਡਦਾ ਹੈ। ਓਸਪ੍ਰੇ ਏਅਰਕ੍ਰਾਫਟ ਬੋਇੰਗ (BA.N) ਅਤੇ ਬੇਲ ਹੈਲੀਕਾਪਟਰ ਦੁਆਰਾ ਸਾਂਝੇ ਤੌਰ ‘ਤੇ ਤਿਆਰ ਕੀਤਾ ਗਿਆ ਹੈ। ਇਹ ਹੈਲੀਕਾਪਟਰ ਅਤੇ ਫਿਕਸਡ ਵਿੰਗ ਏਅਰਕ੍ਰਾਫਟ ਦੋਵਾਂ ਦੀ ਤਰ੍ਹਾਂ ਉੱਡ ਸਕਦਾ ਹੈ। ਯੂਐਸ ਨੇਵੀ ਅਤੇ ਜਾਪਾਨੀ ਆਰਮੀ ਦੋਵੇਂ ਇਸਦੀ ਵਰਤੋਂ ਕਰਦੇ ਹਨ।
