ਦੇਸ਼ ਦੇ ਵੱਖ-ਵੱਖ ਹਿੱਸਿਆਂ ‘ਚੋ ਆਏ ਦਿਨ ਕਰੋੜਾਂ ਰੁਪਏ ਦੀ ਤਸਕਰੀ ਦਾ ਸੋਨਾ ਫੜਿਆ ਜਾਂਦਾ ਹੈ। ਹੁਣ ਕਸਟਮ ਵਿਭਾਗ ਦੀ ਟੀਮ ਨੇ ਚੌਧਰੀ ਚਰਨ ਸਿੰਘ ਅੰਤਰਰਾਸ਼ਟਰੀ ਹਵਾਈ ਅੱਡੇ ‘ਤੇ ਕਰੀਬ 2.5 ਕਰੋੜ ਰੁਪਏ ਦਾ ਸੋਨਾ ਜ਼ਬਤ ਕੀਤਾ ਹੈ। ਲਖਨਊ ਏਅਰਪੋਰਟ ‘ਤੇ ਸਵੇਰੇ 5 ਵਜੇ 4.05 ਕਿਲੋ ਸੋਨਾ ਜ਼ਬਤ ਕੀਤਾ ਗਿਆ, ਇਸ ਤਸਕਰੀ ਵਾਲੇ ਸੋਨੇ ਦੀ ਕੀਮਤ 2.55 ਕਰੋੜ ਰੁਪਏ ਦੱਸੀ ਜਾ ਰਹੀ ਹੈ।
ਲਖਨਊ ਦੇ ਕਸਟਮ ਅਧਿਕਾਰੀਆਂ ਨੇ ਹਵਾਈ ਅੱਡੇ ‘ਤੇ ਤਸਕਰੀ ਦੇ ਦੋ ਮਾਮਲਿਆਂ ਦਾ ਪਰਦਾਫਾਸ਼ ਕੀਤਾ।ਪਹਿਲੇ ਮਾਮਲੇ ‘ਚ ਕੌਫੀ ਮਸ਼ੀਨ ‘ਚ 3.497 ਕਿਲੋਗ੍ਰਾਮ ਵਜ਼ਨ ਵਾਲਾ ਸੋਨਾ ਲੁਕਾਇਆ ਗਿਆ ਸੀ, ਜਿਸ ਨੂੰ ਸਕੈਨਿੰਗ ਦੌਰਾਨ ਸ਼ੱਕ ਦੇ ਆਧਾਰ ‘ਤੇ ਰੋਕ ਲਿਆ ਗਿਆ। ਬਾਅਦ ਵਿੱਚ ਮਸ਼ੀਨ ਦੇ ਅੰਦਰੂਨੀ ਹਿੱਸੇ ਨੂੰ ਕੱਟਣ ਤੋਂ ਬਾਅਦ ਅੰਦਰੋਂ ਸੋਨੇ ਦੇ ਦੋ ਭਾਰੀ ਟੁਕੜੇ ਮਿਲੇ। ਇਹ ਸੋਨਾ ਦੁਬਈ ਤੋਂ IX 194 ਫਲਾਈਟ ਰਾਹੀਂ ਲਿਆਂਦਾ ਜਾ ਰਿਹਾ ਸੀ।
ਦੂਜੇ ਮਾਮਲੇ ‘ਚ ਤਸਕਰ ਕੋਲੋਂ 554 ਗ੍ਰਾਮ ਸੋਨਾ ਬਰਾਮਦ ਹੋਇਆ। ਇਹ ਯਾਤਰੀ ਫਲਾਈਟ ਨੰਬਰ 6E1424 ਰਾਹੀਂ ਸ਼ਾਰਜਾਹ ਤੋਂ ਆ ਰਿਹਾ ਸੀ। ਹਾਲ ਹੀ ‘ਚ ਪ੍ਰੋਫਾਈਲਿੰਗ ਦੇ ਆਧਾਰ ‘ਤੇ ਆਈਜੀਆਈ ਏਅਰਪੋਰਟ ‘ਤੇ ਕਸਟਮ ਵਿਭਾਗ ਨੇ ਦੁਬਈ ਤੋਂ ਆਉਣ ਵਾਲੇ ਤਿੰਨ ਵਿਦੇਸ਼ੀ ਨਾਗਰਿਕਾਂ ਨੂੰ ਰੋਕਿਆ। ਕਸਟਮ ਵਿਭਾਗ ਨੇ ਜਾਂਚ ਦੌਰਾਨ ਲਗਭਗ 1.99 ਕਰੋੜ ਰੁਪਏ ਦਾ ਸੋਨਾ ਜ਼ਬਤ ਕੀਤਾ ਹੈ। ਤਿੰਨਾਂ ਯਾਤਰੀਆਂ ਨੂੰ ਕਸਟਮ ਐਕਟ, 1962 ਦੇ ਤਹਿਤ ਗ੍ਰਿਫਤਾਰ ਕੀਤਾ ਗਿਆ ਹੈ। ਇਹ ਤਿੰਨੋਂ ਤਸਕਰ ਪੈਂਟ ਅਤੇ ਅੰਡਰਵੀਅਰ ਵਿੱਚ ਲੁਕਾ ਕੇ ਇਹ ਸੋਨਾ ਲਿਆ ਰਹੇ ਸਨ।