ਪੈਰਿਸ ਓਲੰਪਿਕ ‘ਚ ਵੀਰਵਾਰ ਨੂੰ ਮਹਿਲਾ ਤੀਰਅੰਦਾਜ਼ੀ ਦਾ ਰੈਂਕਿੰਗ ਦੌਰ ਸ਼ੁਰੂ ਹੋ ਗਿਆ ਹੈ। ਭਾਰਤੀ ਟੀਮ ਇਸ ਦੌਰ ‘ਚ ਚੌਥੇ ਸਥਾਨ ‘ਤੇ ਰਹੀ। ਉਸ ਨੇ 1983 ਅੰਕ ਬਣਾਏ। ਟੀਮ ਸਿੱਧੇ ਕੁਆਰਟਰ ਫਾਈਨਲ ਵਿੱਚ ਪਹੁੰਚ ਗਈ ਹੈ।
ਇਸ ਦੌਰ ‘ਚ ਕੋਰੀਆ ਨੇ ਓਲੰਪਿਕ ਰਿਕਾਰਡ ਤੋੜਿਆ ਅਤੇ 2046 ਅੰਕਾਂ ਨਾਲ ਪਹਿਲੇ ਸਥਾਨ ‘ਤੇ ਰਿਹਾ। ਚੀਨ (1996 ਅੰਕ) ਦੂਜੇ ਅਤੇ ਮੈਕਸੀਕੋ (1986 ਅੰਕ) ਤੀਜੇ ਸਥਾਨ ‘ਤੇ ਰਹੇ।
ਦੱਸ ਦਈਏ ਕਿ ਭਾਰਤੀ ਤੀਰਅੰਦਾਜ਼ ਅੰਕਿਤਾ ਨੇ ਸੀਜ਼ਨ ਦਾ ਸਰਵੋਤਮ ਪ੍ਰਦਰਸ਼ਨ ਕੀਤਾ, ਉਹ 666 ਅੰਕਾਂ ਨਾਲ 11ਵੇਂ ਨੰਬਰ ‘ਤੇ ਰਹੀ। ਭਜਨ 659 ਅੰਕਾਂ ਨਾਲ 22ਵੇਂ ਸਥਾਨ ‘ਤੇ ਅਤੇ ਦੀਪਿਕਾ ਕੁਮਾਰੀ 658 ਅੰਕਾਂ ਨਾਲ 23ਵੇਂ ਸਥਾਨ ‘ਤੇ ਰਹੀ। ਇਨ੍ਹਾਂ ਤਿੰਨਾਂ ਨੂੰ ਰਾਊਂਡ ਆਫ 64 ਖੇਡਣਾ ਹੋਵੇਗਾ।
ਪੁਰਸ਼ਾਂ ਦੀ ਟੀਮ ਕੁਆਲੀਫਾਈਂਗ ਸ਼ਾਮ 5:45 ਵਜੇ ਸ਼ੁਰੂ ਹੋਵੇਗੀ । ਭਾਰਤ ਨੂੰ ਪੁਰਸ਼ ਤੀਰਅੰਦਾਜ਼ੀ ਟੀਮ ਤੋਂ ਬਹੁਤ ਉਮੀਦਾਂ ਹਨ, ਜਿਸ ਨੇ ਇਸ ਸਾਲ ਸ਼ੰਘਾਈ ਵਿੱਚ ਵਿਸ਼ਵ ਕੱਪ ਫਾਈਨਲ ਵਿੱਚ ਕੋਰੀਆ ਨੂੰ ਹਰਾ ਕੇ ਇਤਿਹਾਸ ਰਚਿਆ ਸੀ।
ਭਾਰਤੀ ਟੀਮ ‘ਚ ਤਰੁਣਦੀਪ ਰਾਏ ਅਤੇ ਪਿਛਲੇ ਓਲੰਪਿਕ ਭਾਗੀਦਾਰ ਪ੍ਰਵੀਨ ਜਾਧਵ ਦੇ ਰੂਪ ‘ਚ ਤਜ਼ਰਬੇਕਾਰ ਖਿਡਾਰੀ ਸ਼ਾਮਲ ਹਨ, ਜਦਕਿ ਨੌਜਵਾਨ ਖਿਡਾਰੀ ਧੀਰਜ ਬੋਮਾਦੇਵਰਾ ਨੇ ਇਕ ਮਹੀਨਾ ਪਹਿਲਾਂ ਹੀ ਟੋਕੀਓ ਓਲੰਪਿਕ ਦੇ ਚਾਂਦੀ ਦਾ ਤਗਮਾ ਜੇਤੂ ਇਟਲੀ ਦੇ ਮੌਰੋ ਨੇਸਪੋਲੀ ਨੂੰ ਹਰਾ ਕੇ ਅੰਤਾਲੀਆ ਵਿਸ਼ਵ ਕੱਪ ‘ਚ ਕਾਂਸੀ ਦਾ ਤਗਮਾ ਜਿੱਤਿਆ ਹੈ।
ਓਲੰਪਿਕ ‘ਚ ਭਾਰਤੀ ਤੀਰਅੰਦਾਜ਼ ਅਜੇ ਤੱਕ ਕੁਆਰਟਰ ਫਾਈਨਲ ਤੋਂ ਅੱਗੇ ਨਹੀਂ ਵਧ ਸਕੇ ਹਨ । ਭਾਰਤ ਸਿਰਫ ਸਿਡਨੀ ਓਲੰਪਿਕ 2000 ਵਿੱਚ ਤੀਰਅੰਦਾਜ਼ੀ ਲਈ ਕੁਆਲੀਫਾਈ ਨਹੀਂ ਕਰ ਸਕਿਆ ਸੀ। ਇਸ ਤੋਂ ਇਲਾਵਾ ਉਸ ਨੇ ਸਾਰੀਆਂ ਉਲੰਪਿਕ ਖੇਡਾਂ ਵਿੱਚ ਹਿੱਸਾ ਲਿਆ, ਪਰ ਉਹ ਆਪਣੇ ਪ੍ਰਦਰਸ਼ਨ ਵਿੱਚ ਸੁਧਾਰ ਨਹੀਂ ਕਰ ਸਕਿਆ।
ਲੰਡਨ ਓਲੰਪਿਕ 2012 ਤੋਂ ਬਾਅਦ ਇਹ ਪਹਿਲਾ ਮੌਕਾ ਹੈ ਜਦੋਂ ਸਾਰੇ ਛੇ ਖਿਡਾਰੀ ਭਾਰਤੀ ਟੀਮ ਵਿੱਚ ਸ਼ਾਮਲ ਹੋਏ ਹਨ। ਭਾਰਤੀ ਪੁਰਸ਼ ਅਤੇ ਮਹਿਲਾ ਟੀਮਾਂ ਨੇ ਰੈਂਕਿੰਗ ਦੇ ਆਧਾਰ ‘ਤੇ ਓਲੰਪਿਕ ਲਈ ਕੁਆਲੀਫਾਈ ਕੀਤਾ ਹੈ, ਭਾਵ ਭਾਰਤੀ ਤੀਰਅੰਦਾਜ਼ ਇਸ ਵਾਰ ਪੰਜ ਤੀਰਅੰਦਾਜ਼ੀ ਮੁਕਾਬਲਿਆਂ ‘ਚ ਹਿੱਸਾ ਲੈਣਗੇ।
