ਗੁਜਰਾਤ ਦੇ ਪੋਰਬੰਦਰ ਤੱਟ ਨੇੜੇ ਭਾਰਤੀ ਤੱਟ ਰੱਖਿਅਕ (ICG) ਦਾ ਇੱਕ ਐਡਵਾਂਸਡ ਲਾਈਟ ਹੈਲੀਕਾਪਟਰ (ਧਰੁਵ) ਅਰਬ ਸਾਗਰ ਵਿੱਚ ਡਿੱਗ ਗਿਆ। ਹੈਲੀਕਾਪਟਰ ‘ਚ ਸਵਾਰ 4 ਚਾਲਕ ਦਲ ਦੇ ਮੈਂਬਰਾਂ ‘ਚੋਂ 3 ਲਾਪਤਾ ਹਨ। ਇੱਕ ਨੂੰ ਬਚਾ ਲਿਆ ਗਿਆ ਹੈ। ਹੈਲੀਕਾਪਟਰ ਦਾ ਮਲਬਾ ਮਿਲ ਗਿਆ ਹੈ।
ਆਈਸੀਜੀ ਨੇ ਮੰਗਲਵਾਰ (3 ਸਤੰਬਰ) ਨੂੰ ਸਵੇਰੇ 10:12 ਵਜੇ ਹਾਦਸੇ ਦੀ ਸੂਚਨਾ ਦਿੱਤੀ। ਅਧਿਕਾਰੀਆਂ ਨੇ ਦੱਸਿਆ ਕਿ ਹੈਲੀਕਾਪਟਰ ਪੋਰਬੰਦਰ ਤੱਟ ਤੋਂ 45 ਕਿਲੋਮੀਟਰ ਦੂਰ ਇਕ ਕਾਰਗੋ ਜਹਾਜ਼ ‘ਤੇ ਬਚਾਅ ਮਿਸ਼ਨ ਲਈ ਗਿਆ ਸੀ। ਹੈਲੀਕਾਪਟਰ ਵਿੱਚ ਦੋ ਪਾਇਲਟ ਅਤੇ ਦੋ ਗੋਤਾਖੋਰ ਸਵਾਰ ਸਨ। ਇੱਕ ਗੋਤਾਖੋਰ ਨੂੰ ਬਚਾ ਲਿਆ ਗਿਆ ਹੈ।
ਕੋਸਟ ਗਾਰਡ ਮੁਤਾਬਕ ਹਰੀ ਲੀਲਾ ਜਹਾਜ਼ ‘ਤੇ ਸਵਾਰ ਇਕ ਕਰਮਚਾਰੀ ਜ਼ਖਮੀ ਹੋ ਗਿਆ। ਸੋਮਵਾਰ ਰਾਤ 11 ਵਜੇ ਉਨ੍ਹਾਂ ਨੂੰ ਬਚਾਉਣ ਲਈ ਹੈਲੀਕਾਪਟਰ ਗਿਆ ਸੀ। ਹੈਲੀਕਾਪਟਰ ਅਜੇ ਹਰੀ ਲੀਲਾ ਪਹੁੰਚਿਆ ਹੀ ਸੀ ਕਿ ਇਸ ਦੀ ਐਮਰਜੈਂਸੀ ਹਾਰਡ ਲੈਂਡਿੰਗ ਕਰਨੀ ਪਈ। ਇਸ ਦੌਰਾਨ ਉਹ ਸਮੁੰਦਰ ਵਿੱਚ ਡਿੱਗ ਗਿਆ।